អង្គភាពប្រឆាំងអំពើពុករលួយ (ACU) ប្រកាសថា ការប្រឆាំងការសម្អាតប្រាក់ ឬការលាងលុយកខ្វក់ គឺជាភារកិច្ចបន្ទាន់មួយរបស់អង្គភាពមួយនេះ។ ការលើកឡើងនេះ ធ្វើឡើងក្នុងសិក្ខាសាលាមួយស្ដីពី “ការប្រើប្រាស់ឧបករណ៍ប្រឆាំងការសម្អាតប្រាក់ ក្នុងការប្រយុទ្ធប្រឆាំងនឹងអំពើពុករលួយ” ដែលត្រូវបានរៀបចំឡើងដោយអង្គភាពប្រឆាំងអំពើពុករលួយ សហការជាមួយធនាគារពិភពលោក (World Bank) ដែលមានរយៈពេល ៣ថ្ងៃ គឺចាប់ពីថ្ងៃទី៦ ដល់ថ្ងៃទី៩ មីនា នៅសណ្ឋាគារ ឡឺ រ៉ូយ៉ាល់ (Raffle Le Royal) រាជធានីភ្នំពេញ។
ការសិក្សាដើម្បីស្វែងរកឧបករណ៍នានាដើម្បីប្រយុទ្ធប្រឆាំងនឹងការលាងសម្អាតប្រាក់នេះ មានការចូលរួមពីមន្ត្រីនគរបាលយុត្តិធម៌ និងមន្ត្រីនៃស្ថាប័នតុលាការចំនួន ៣៧នាក់។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ថ្លែងថា ការប្រឆាំងនឹងការសម្អាតប្រាក់ ឬលាងលុយកខ្វក់ គឺជាកិច្ចការបន្ទាន់មួយរបស់អង្គភាពប្រឆាំងអំពើពុករលួយ។ លោកទទួលស្គាល់ថា មានករណីលាងសម្អាតប្រាក់នៅកម្ពុជា ហើយវានៅតែត្រូវបានធ្វើដោយងាយស្រួល៖ «យើងមិនបានឃើញដោយជាក់ស្តែងថា បញ្ហានេះ កើតឡើងយ៉ាងម៉េចទេ ប៉ុន្តែយើងចាប់ផ្ដើមពីវគ្គសិក្សានេះ យើងបំពាក់បំប៉នចំនួន ៣៧នាក់ នៅ ថ្ងៃនេះ ក្លាយទៅជាគ្រូបង្គោល ក្លាយទៅជាគ្រាប់ពូជមួយ ។ ហើយផ្ដើមពីនេះ ដល់ចុងឆ្នាំយ៉ាងយូរ យើងត្រូវតែមើលឲ្យឃើញឡើងវិញ ថាតើកម្ពុជា យើងនេះ ការសម្អាតប្រាក់មានយ៉ាងម៉េច ? ហើយត្រូវបង្ក្រាបឲ្យមានផលយ៉ាងដូចម៉េច ? អ៊ីចឹងបើប្អូនសួរខ្ញុំថា តើការសម្អាតប្រាក់នៅកម្ពុជា វាមានទេ ? អ្នកណា ? ក្រសួង ឬស្ថាប័នណា ? យើងខ្ញុំថាទុកឲ្យចុងឆ្នាំ យើងខ្ញុំនឹងឆ្លើយជូន។ យើងត្រូវការទទួលសិល្ប៍សិន ហើយ ថ្ងៃនេះ គឺមកបញ្ចូលសិល្ប៍ហើយ»។
លោកបន្តថា ក្រៅពីស៊ើបអង្កេតរកការសម្អាតប្រាក់តាមវិស័យធនាគារ មន្ត្រីនគរបាលយុត្តិធម៌ក៏ត្រូវស្វែងរកបទល្មើសនេះនៅក្នុងវិស័យអចលនវត្ថុ ការនាំទំនិញចេញចូល ការរត់ពន្ធ ការកាប់ព្រៃឈើ បទល្មើសនេសាទ បទល្មើសសត្វព្រៃ ការជួញដូរផ្លូវភេទ និងការជួញដូរគ្រឿងញៀន ជាដើម។
លោក ឱម យ៉ិនទៀង រំពឹងថា តាមរយៈការសិក្សានេះ មន្ត្រីនគរបាលយុត្តិធម៌ និងតុលាការ នឹងក្លាយជាអ្នកជំនាញខាងស៊ើបអង្កេត និងកាត់ទោសបទល្មើសពាក់ព័ន្ធនឹងការសម្អាតប្រាក់នេះ។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ គាំទ្រគំនិតផ្ដួចផ្ដើមនេះ។ លោកថា ការប្រឆាំងនឹងការលាងលុយកខ្វក់ គឺជាតម្រូវការរបស់កម្ពុជា និងប្រទេសជាមិត្តមួយចំនួន ដែលធ្វើកិច្ចការប្រយុទ្ធប្រឆាំងនឹងអំពើពុករលួយ៖ «ការលាងលុយកខ្វក់នេះ វាគឺជាមធ្យោបាយសម្រាប់ឧក្រិដ្ឋជន ពេលនោះហើយ សន្តិសុខសង្គមវាអាចជាក្តីបារម្ភមួយ ហើយវានាំឲ្យមានការប៉ះពាល់ទៅដល់ការវិនិយោគរបស់វិនិយោគិនដែលល្អៗ ដែលត្រឹមត្រូវ។ អ៊ីចឹងវាប៉ះពាល់ដល់ផលប្រយោជន៍កម្ពុជា ទាំងផល ប្រយោជន៍សេដ្ឋកិច្ច និងសង្គម ហើយក៏វាអាចប៉ះពាល់ ធ្ងន់ធ្ងរដល់ មុខមាត់របស់កម្ពុជា នៅលើឆាក អន្តរជាតិដែរ បើសិនជាបញ្ហាហ្នឹងវាមិនត្រូវបានរៀបចំឲ្យមានរបៀបរៀបរយ ហើយនិងការអនុវត្តច្បាប់ត្រួតពិនិត្យការលាងលុយ»។
ក្រុមអ្នកជំនាញនៃធនាគារពិភពលោក បានឲ្យនិយមន័យការលាងសម្អាតប្រាក់ ឬលាងលុយកខ្វក់ថា ជាទង្វើក្លែងប្រភពខុសច្បាប់នៃប្រាក់ដើម ដែលបានពីបទល្មើស។ វាកើតឡើងក្នុងរូបភាពនៃ “ការបម្លែង ឬការផ្ទេរទ្រព្យសម្បត្តិដោយដឹងថា ទ្រព្យសម្បត្តិនោះ គឺជាផលនៃបទល្មើស ក្នុងគោលបំណងបិទបាំង ឬក្លែងប្រភពដើមមិនស្របច្បាប់នៃទ្រព្យសម្បត្តិនោះ ឬជួយបុគ្គលដែលបានពាក់ព័ន្ធក្នុងបទល្មើស ដើម្បីឲ្យបុគ្គលនោះគេចផុតពីផលវិបាកតាមផ្លូវច្បាប់នូវសកម្មភាពរបស់ខ្លួន”។
ក្រៅពីនេះ ការលាងលុយកខ្វក់ ក៏កើតឡើងដោយសារ “ការបិទបាំង ឬការក្លែងសភាវៈពិត ប្រភព ទីតាំង សិទ្ធិចាត់ចែង ចលនា ឬកម្មសិទ្ធិ ឬសិទ្ធិលើទ្រព្យសម្បត្តិ ដោយដឹងថា ទ្រព្យសម្បត្តិទាំងនោះបានមកពីបទល្មើស។ វាក៏កើតឡើងដោយសារ "ការធ្វើលទ្ធកម្ម ការកាន់កាប់ ឬការប្រើប្រាស់ទ្រព្យសម្បត្តិ ដោយដឹងពេលទទួលបានទ្រព្យសម្បត្តិនោះថា ទ្រព្យសម្បត្តិទាំងនោះបានមកពីបទល្មើស”។
ការសម្អាតប្រាក់ ឬការលាងលុយកខ្វក់ គឺជាប់ទាក់ទងនឹងអំពើពុករលួយនៅត្រង់ថា អំពើពុករលួយជាប្រភេទបទល្មើសដែលត្រូវបានប្រព្រឹត្តដោយសារហេតុផលចង់ចំណេញផ្នែកហិរញ្ញវត្ថុ ឬអត្ថប្រយោជន៍ផ្សេងទៀត។ ក្នុងបរិបទនេះ អ្វីដែលមន្ត្រីពុករលួយចង់បាន គឺសប្បាយចិត្តជាមួយនឹងផលនៃអំពើពុករលួយនេះ ដោយមិនបង្កឲ្យមានការសង្ស័យលើប្រភពនៃទ្រព្យសម្បត្តិរបស់ខ្លួន ហើយគេនឹងប្រើប្រាស់យន្តការលាក់បាំងប្រភពទ្រព្យសម្បត្តិដែលបានមកដោយមិនត្រឹមត្រូវ និងបង្វែរប្រាក់ទាំងនោះចូលមកក្នុងសេដ្ឋកិច្ចស្របច្បាប់វិញ ដូច្នេះធ្វើឲ្យទ្រព្យសម្បត្តិនោះហាក់បីដូចជាមានភាពស្របច្បាប់។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ឃើញថា ដើម្បីឲ្យការប្រឆាំងនឹងការលាងលុយកខ្វក់នេះមានប្រសិទ្ធភាព លុះត្រាតែអង្គភាពប្រឆាំងអំពើពុករលួយ និងតុលាការមានឆន្ទៈពិតប្រាកដ ក្នុងការអនុវត្តច្បាប់លើបុគ្គលមានលុយ និងមានអំណាចដែលប្រព្រឹត្តបទល្មើសឧក្រិដ្ឋនេះ។ ម្យ៉ាងវិញទៀត លោកថាកិច្ចការនេះ ទាមទារឲ្យមានកិច្ចសហការល្អទាំងក្នុងក្របខ័ណ្ឌជាតិ និងអន្តរជាតិ ទើបទទួលបានជោគជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។