អង្គការជនពិការកម្ពុជា លើកឡើងថា បញ្ហាប្រឈមរបស់ជនពិការក្នុងការរកការងារធ្វើ គឺបណ្ដាលមកពីចំណេះដឹងរបស់ជនពិការនៅមានកម្រិត មិនមានមធ្យោបាយធ្វើដំណើរសមស្របសម្រាប់ជនពិការ ឥរិយាបថអវិជ្ជមានរបស់ម្ចាស់សហគ្រាសមកលើជនពិការ ការមិនគាំទ្រពីគ្រួសារ និងសហគមន៍ និងការគ្មានទំនុកចិត្តរបស់ជនពិការផ្ទាល់តែម្តង។
ថ្លែងនៅថ្ងៃទី៣ ខែកុម្ភៈ ក្នុងវេទិកាការងារសម្រាប់យុវជនពិការ នាយកអង្គការជនពិការកម្ពុជា លោក ងិន សៅរ័ត្ន ស្នើទៅប្រមុខរដ្ឋាភិបាល និងវិស័យឯកជន ឲ្យផ្តល់ឱកាសការងារ និងអាទិភាពដល់ជនពិការ ដើម្បីអាចរកប្រាក់ចិញ្ចឹមជីវិតបានដោយខ្លួនឯង។ ជាងនេះទៅទៀត លោកក៏ស្នើទៅជនពិការខ្លួនឯង ត្រូវព្យាយាមពង្រឹងសមត្ថភាពខ្លួនឯងផងដែរ៖ «យើងខ្ញុំសូមអំពាវនាវគ្រប់ស្ថាប័ន ជាពិសេសវិស័យឯកជន សុំផ្តល់ឱកាសជាអាទិភាពដល់ជន ពិការ ដើម្បី ឲ្យពួក គាត់រស់នៅបានថ្លៃថ្នូរ»។
អង្គការជនពិការកម្ពុជា រកឃើញថា ជនពិការសព្វថ្ងៃបម្រើការងារនៅស្ថាប័នរដ្ឋចំនួន ៤០ស្ថាប័ន ជិត ៤.០០០នាក់ក្នុងឆ្នាំ២០១៥។ អនុក្រឹត្យរបស់រដ្ឋាភិបាល ស្ដីពីការជ្រើសរើសជនពិការចូលបម្រើការងារតាមកូតាកំណត់ នៅវិស័យរដ្ឋចំនួន ២ភាគរយ និងវិស័យឯកជន ១ភាគរយ នៃបុគ្គលិកសរុប ប៉ុន្តែ លោក ងិន សៅរ័ត្ន ថាចំនួនជនពិការដែលកំពុងបម្រើការងារនោះ មិនបានដូចអនុក្រឹត្យទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។