Opens in new windowក្រសួងការងារ លើកឡើងថា ពីមួយឆ្នាំទៅមួយឆ្នាំ កម្ពុជា នៅតែខ្វះកម្លាំងពលកម្មផ្នែកជំនាញវិជ្ជាជីវៈ ដើម្បីឆ្លើយតបតម្រូវការទីផ្សារការងារបច្ចុប្បន្ន។ ទន្ទឹមគ្នានេះ ក្រសួងបានជំរុញឲ្យយុវជន ងាកមកសិក្សាជំនាញបច្ចេកទេសឲ្យបានច្រើន ដើម្បីចូលរួមក្នុងការអភិវឌ្ឍសេដ្ឋកិច្ចជាតិ។
ក្រសួងការងារ ព្យាយាមតម្រែតម្រង់ផ្លូវឲ្យសិស្ស ងាកមកសិក្សាលើផ្នែកជំនាញបច្ចេកទេសឲ្យបានច្រើននៅពេលនេះ សំដៅបំពេញចន្លោះប្រហោង និងកាត់បន្ថយគម្លាតទីផ្សារការងារ។ លើសពីនេះ ក៏ដើម្បីកុំឲ្យយុវជនផ្ដោតតែទៅលើមុខវិជ្ជាក្នុងវិស័យធុរកិច្ចច្រើនពេក រួមមានមុខជំនាញគ្រប់គ្រង គណនេយ្យ ធនាគារ និងហិរញ្ញវត្ថុ ជាដើម។
ការលើកឡើងនេះ ធ្វើឡើងនៅក្នុងវេទិកាផ្សព្វផ្សាយស្ដីពីការអប់រំ បណ្តុះបណ្តាល និងវិជ្ជាជីវៈ និងអាហារូបករណ៍ដល់យុវជន នៅមជ្ឈមណ្ឌលសន្និបាតកោះពេជ្រ កាលពីព្រឹកថ្ងៃទី២៦ ខែកញ្ញា។ កម្មវិធីនេះ មានគោលបំណងពន្យល់ បង្ហាញមុខជំនាញ និងបង្ហាញផ្លូវដល់សិស្ស ឲ្យជ្រើសរើសមុខជំនាញបានត្រឹមត្រូវ។
ថ្លែងទៅកាន់វេទិកាផ្សព្វផ្សាយ ដែលមានយុវជនភាគច្រើនជាសិស្សទើបបញ្ចប់បាក់ឌុបជាង ៣.០០០នាក់ រដ្ឋលេខាធិការក្រសួងការងារ និងបណ្តុះបណ្តាល វិជ្ជាជីវៈ លោក ពេជ សោភ័ន បានឲ្យដឹងថា ទោះជាកម្ពុជា មានកម្លាំងពលកម្មវ័យក្មេងច្រើន តែការផ្គត់ផ្គង់ជំនាញនៅតែមានកម្រិតទាបនៅឡើយ។ លោកថា បញ្ហានេះមកពីជំនាញបច្ចេកទេស និងវិជ្ជាជីវៈ ទាមទារការអត់ធ្មត់ខ្ពស់ និងកត្តាផ្នត់គំនិតសង្គមនៅតែមិនសូវឲ្យតម្លៃការងារបច្ចេកទេស៖ «ខាងបច្ចេកទេសអ្នកខ្លះយល់ថា ចេញទៅពិបាករកការងារធ្វើ ជួនកាលចេញគេយល់ថាផ្នែកធុរកិច្ច សេដ្ឋកិច្ចគេធ្វើការក្នុងម៉ាស៊ីនត្រជាក់ ប៉ុន្តែធាតុពិតមិនដូចការគិតនេះទេ គឺទីផ្សារគេត្រូវការអ្នកបច្ចេកទេសច្រើនជាង»។
រដ្ឋលេខាធិការក្រសួងការងារ លោក ពេជ សោភ័ន មានប្រសាសន៍បន្តថា កង្វះកម្លាំងពលកម្មជំនាញ បានក្លាយជាបញ្ហាប្រឈម ដើម្បីឈានជើងចូលទៅសមាហរណកម្មសេដ្ឋកិច្ចអាស៊ាន ដែលជាទីផ្សារការងារយ៉ាងធំ និងមានប្រជាជនជាង ៦០០លាននាក់។ លោកអំពាវនាវឲ្យយុវជន ព្យាយាមសិក្សាជំនាញឲ្យបានច្រើន ដើម្បីកាត់បន្ថយភាពមិនស៊ីសង្វាក់គ្នារវាងការអប់រំ និងតម្រូវការការងារ៖ «យើងបារម្ភថាដល់ថ្ងៃអនាគត មានអាស៊ានចូលមក បើយើងខ្វះអ្នកបច្ចេកទេសកម្លាំងពលកម្មខាងក្រៅគេចូលមក ពិសេសបងប្អូន និងយុវជនចាប់យកជំនាញបច្ចេកទេស ដើម្បីអភិវឌ្ឍស្រុកទេស»។
វេទិកាដែលមានរយៈពេលមួយថ្ងៃ យុវជននឹងអាចស្វែងយល់ដោយផ្ទាល់ នូវមុខជំនាញដែលខ្លួនចង់សិក្សាបន្តនៅតាមបណ្ដាគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ ចំនួនជិត ៤០គ្រឹះស្ថាន។ អ្នករៀបចំកម្មវិធីនេះ រំពឹងថា វេទិកានេះនឹងជំរុញឲ្យយុវជនជ្រើសរើសមុខជំនាញបានត្រឹមត្រូវ បន្ទាប់ពីយុវជនជួបអ្នកជំនាញខាងអប់រំ។
ចំណែកយុវជនមកពីខេត្តតាកែវ កញ្ញា ទឹប ស្រីនិច យល់ថា កម្មវិធីនេះល្អចំពោះសិស្សទើបបញ្ចប់បាក់ឌុប ដើម្បីបានស្វែងយល់ពីបញ្ហាប្រឈមរបស់សិស្ស និងស្គាល់ខ្លួនឯងកាន់តែច្បាស់ជាងមុន។ កញ្ញាចង់ឲ្យរដ្ឋាភិបាល បង្កើតកម្មវិធីនេះឲ្យបានច្រើន៖ «យុវជនទាំងអស់ ត្រូវតែសម្រេចចិត្តរើសយកជំនាញដែលយើងចង់រៀន មិនចឹងទេ មិនអាចជួយខ្លួនឯង និងសង្គមបានទេ»។
វេទិកានេះ ក្រសួងការងារ អះអាងថា ដើម្បីឆ្លើយតបបញ្ហាកង្វះកម្លាំងពលកម្មផ្នែកជំនាញបច្ចេកទេស និងវិជ្ជាជីវៈ រដ្ឋាភិបាលបានដាក់យុទ្ធសាស្ត្រកម្លាំងសេដ្ឋកិច្ចថ្មី តាមរយៈការអភិវឌ្ឍគោលនយោបាយឧស្សាហកម្មឆ្នាំ២០១៥-២០២៥ ដើម្បីប្រែក្លាយពីឧស្សាហកម្មអតិពលកម្ម ទៅឧស្សាហកម្មដោយប្រើប្រាស់ជំនាញ។ យុទ្ធសាស្ត្រនេះ រដ្ឋាភិបាលផ្ដោតលើវិស័យអាទិភាពចំនួន៥ សំខាន់ៗ រួមមាន ទី១ វិស័យឧស្សាហកម្មកាត់ដេរសម្លៀកបំពាក់។ ទី២ វិស័យសំណង់។ ទី៣ កសិឧស្សាហកម្ម។ ទី៤ ឧស្សាហកម្មកសិកម្ម ទេសចរណ៍ និងទី៥ ផ្នែកឧស្សាហកម្មព័ត៌មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។