សាច់ញាតិប្រជាពលរដ្ឋដែលអះអាងថា មន្ត្រីកងរាជអាវុធហត្ថក្រុងប៉ោយប៉ែត ខេត្តបន្ទាយមានជ័យ វាយពលរដ្ឋឲ្យរងរបួសធ្ងន់ដាច់ពោះវៀនជា ៣កំណាត់ ទទូចឲ្យជនល្មើសទទួលខុសត្រូវចំពោះមុខច្បាប់។
សាច់ញាតិជនរងគ្រោះនៅក្រុងប៉ោយប៉ែត សម្ដែងការសោកស្ដាយ និងខឹងសម្បាយ៉ាងខ្លាំងទៅនឹងមន្ត្រីកងរាជអាវុធហត្ថក្រុងនេះ ថាជាការប្រើអំណាចវាយធ្វើបាបមកលើប្រជាពលរដ្ឋស្លូតត្រង់ហើយគេចយករួចខ្លួន។
បងប្រុសជនរងគ្រោះរស់នៅភូមិបាលិលេយ្យ២ សង្កាត់ប៉ោយប៉ែត លោក សាន គឹមសែន ឲ្យដឹងនៅថ្ងៃទី១៦ ខែកុម្ភៈ ថា មន្ត្រីកងរាជអាវុធហត្ថក្រុងប៉ោយប៉ែត ខេត្តបន្ទាយមានជ័យ ប្រមាណ ៥នាក់ ប៉ុន្តែមិនចាំមុខនោះទេ បានប្រួតគ្នាវាយធ្វើបាបដោយទាត់មកលើប្អូនប្រុសរបស់ខ្លួន ឈ្មោះលោក សាន គឹមសាន អាយុ ២៣ឆ្នាំ ជាច្រើនជើងរហូតដាច់ពោះវៀនជា៣កំណាត់។
លោកអះអាងទៀតថា ការវាយតប់នេះ ដោយសារមន្ត្រីទាំងនោះខឹងប្អូនរបស់ខ្លួនមកជួយឃាត់រូបលោក ខណៈដែលកំពុងប្រកែកគ្នាជាមួយមន្ត្រីកងរាជអាវុធហត្ថ កាលពីយប់ថ្ងៃទី២១ ខែមករា កន្លងទៅ៖ «ខ្ញុំគិតថាគាត់ធ្វើដូច្នេះជាអំពើព្រៃផ្សៃមួយ ព្រោះបើគាត់ជាសមត្ថកិច្ច គាត់ចុះមកគឺមិនត្រូវធ្វើបានប្រជាពលរដ្ឋទេ ព្រោះបើថាយើងជាចោរលួច ចោរប្លន់ គេគួរវាយអ៊ីចឹង តែនេះគាត់មកដល់ស្រាប់តែវាយខ្ញុំយកតែម្ដង»។
លោកអះអាងបន្ថែមទៀតថា បន្ទាប់ពីមន្ត្រីអាវុធហត្ថទាត់ប្អូនរបស់លោកដាច់ពោះវៀន ៣កំណាត់ហើយ គឺមន្ត្រីទាំងនោះមិនបានមកអើពើចេញថ្លៃព្យាបាលដល់ជនរងគ្រោះនោះឡើយ។
ឆ្លើយតបនឹងបញ្ហានេះមេបញ្ជាការកងរាជអាវុធហត្ថក្រុងប៉ោយប៉ែត លោក នួន នីណារ៉ូ មានប្រសាសន៍បដិសេធថា មន្ត្រីអាវុធហត្ថមិនបានវាយធ្វើបាបទៅលើប្រជាពលរដ្ឋបណ្ដាលឲ្យរងរបួសដាច់ពោះវៀននោះទេ។ លោកអះអាងទៀតថា ប្រសិនបើខាងមន្ត្រីរបស់លោកពិតជាបានវាយទាត់ធាក់ជនរងគ្រោះមែន គឺលោកនឹងទទួលខុសត្រូវតាំងពីយូរណាស់បាត់ទៅហើយ៖ «ភាគីម្ខាងទៀតដែលថាធ្លាយពោះវៀនហ្នឹង គឺខាងខ្ញុំអត់បានប៉ះពាល់គាត់ទេបង ហើយណាមួយក្នុងកន្លែងកើតហេតុហ្នឹង ពួកខ្ញុំក៏មិនដឹងថាមានគាត់នៅក្នុងហ្នឹងដែរ។ ម្យ៉ាងទៀត ពេលកើតហេតុនោះមានប្រជាពលរដ្ឋច្រើននាក់ ហើយហេតុអីបានជាមិនឃើញពួកគាត់បង្ហោះក្នុងហ្វេសប៊ុក ហើយទើបតែមានព័ត៌មានពេលនេះទៅវិញ?»។
ទោះជាយ៉ាងនេះក្ដីមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា ខាងលោកជាប់រវល់ការងារមិនទាន់បានចុះស្រាវជ្រាវលើបញ្ហានេះនៅឡើយ ក៏ប៉ុន្តែលោកអះអាងថា បើទោះបីជាពុំទាន់ដឹងខាងណាខុស ឬខាងណាត្រូវក៏ដោយ គឺសមត្ថកិច្ចត្រូវតែចុះស្រាវជ្រាវលើកករណីនេះដើម្បីផ្ដល់យុត្តិធម៌ជូនដល់ជនរងគ្រោះ៖ «ដូច្នេះដើម្បីកុំឲ្យច្បាប់ស្តង់ដារ២ ត្រូវតែនៅពេលមានការដង្ហោយហៅ ក្រសួងយុត្តិធម៌ព្រះរាជអាជ្ញាដែលការពារពលរដ្ឋ ត្រូវចាប់ផ្ដើមធ្វើការពិនិត្យ និងចុះធ្វើការស៊ើបអង្កេត កុំមានគេថា តុលាការអាយ៉ងអត់មានយុត្តិធម៌អីនោះ គឺយើងធ្វើម៉េចឲ្យគេជឿជាក់ថា តុលាការគឺជាប្រព័ន្ធយុត្តិធម៌ ជួយរកយុត្តិធម៌ជូនពលរដ្ឋបាន»។
សាច់ញាតិអះអាងថា ជនរងគ្រោះបន្ទាប់ពីមន្ត្រីកងរាជអាវុធហត្ថទាក់ជាច្រើនជើងហើយ ក៏បានប្រកាច់នៅនឹងកន្លែង ហើយភ្លាមៗនោះសាច់ញាតិក៏បានបញ្ជូនទៅព្យាបាលនៅមន្ទីរពេទ្យនៅក្រុងប៉ោយប៉ែត និងបានបន្តព្យាបាលនៅមន្ទីរពេទ្យមិត្តភាពកម្ពុជា ជប៉ុន ស្រុកមង្គលបូរី ទាំងយប់តែម្ដង។ ជនរងគ្រោះសម្រាកព្យាបាលនៅមន្ទីរពេទ្យនេះជិតមួយខែ ហើយអ្នកជំងឺទើបតែត្រឡប់មកផ្ទះវិញកាលពីថ្ងៃទី១៥ ខែកុម្ភៈ ទាំងស្ថានភាពជំងឺមិនទាន់ជាស្រួលបួលនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។