គ្រូបង្រៀនបានរៀបរាប់ឲ្យដឹងថា រាល់ពេលបើកប្រាក់ខែម្ដងៗ ពុំដែលមានគ្រូបង្រៀនណាទទួលបានប្រាក់ខែបង្រៀនរបស់ខ្លួនឲ្យបានគ្រប់ចំនួន ទៅតាមប្រាក់ខែដែលទទួលបាននោះទេ គឺតែងតែមានការបាត់បង់កន្ទុយប្រាក់សេសសល់ក្រោម ៥ពាន់រៀលនោះជាដរាប។
គ្រូបង្រៀននៅឃុំម៉ឺនជ័យ ស្រុករំដួល សុំមិនឲ្យបញ្ចេញឈ្មោះម្នាក់ មានប្រសាសន៍នៅថ្ងៃទី៣ វិច្ឆិកា ថា រាល់ពេលបើកប្រាក់ពីប្រធានគណនេយ្យម្ដងៗ គ្រូបង្រៀនតែងតែរអ៊ូរទាំរឿងបញ្ហាការបាត់បង់ប្រាក់ខែរបស់ខ្លួន ប៉ុន្តែពុំមានគ្រូបង្រៀនណាម្នាក់ហ៊ានហាមាត់សួរទៅមន្ត្រីគណនេយ្យអប់រំស្រុកឡើយ ព្រោះខ្លាចនាំផលលំបាកដល់ខ្លួននៅពេលបើកប្រាក់ខែក្រោយទៀត។
លោកថា ជាងនេះទៅទៀត មន្ត្រីគណនេយ្យអប់រំស្រុក ថែមទាំងបានប្រើពាក្យអសុរោះទៅលើគ្រូបង្រៀន ពេលបើកប្រាក់ខែទៀតផង៖ «ពេលយើងសួរនាំអារឿងបៀវត្សហ្នឹង គាត់ថាអានេះគ្រាន់តែលុយប៉ុណ្ណឹងសុទ្ធតែតាមដានតាមអីទៀត សុទ្ធតែរិះសុទ្ធតែត្បេះ ថាអាឯងរិះម្ល៉េះ អាឯងត្បេះម្ល៉េះ និយាយអ៊ីចឹងបង និយាយពាក្យមិនសមរម្យដាក់យើងអ៊ីចឹង។ ហើយមានការរើសអើងៗថា ដូចយើងសួរនាំអ៊ីចឹង គាត់មានការកត់សម្គាល់ទុក ថាអូយើងចង់ដឹងរឿងប្រាក់ខែប្រាក់អីហ្នឹង។ កន្ទុយប្រាក់បៀវត្សខ្ញុំនេះបាត់កន្ទុយ ២ពាន់អ៊ីចឹង គាត់អត់ឲ្យយើង គាត់យកលេសថាទ្រទ្រង់ការិយាល័យទ្រទ្រង់អីអ៊ីចឹងទៅបាត់រហូត»។
រីឯគ្រូបង្រៀនបឋមសិក្សានៅស្រុករំដួល ម្នាក់ទៀតបានមានប្រសាសន៍ស្រដៀងគ្នានេះដែរថា នៅពេលដែលគ្រូបង្រៀនណាមិនចង់កាត់ប្រាក់ខែដែលមានកន្ទុយសេសសល់ ឲ្យទៅមន្ត្រីគណនេយ្យអប់រំស្រុក គ្រូបង្រៀននោះនឹងទទួលពាក្យគំរោះគំរើយឆ្លើយតបមកវិញជាក់ជាពុំខាន៖ «ភាគច្រើនអ៊ីចឹងហ្មង អាហ្នឹងគេអត់បញ្ជាក់មូលហេតុផង។ វាថាគេកាត់ៗទៅ យើងអត់ដឹងផង អត់ដឹងថាកាត់ៗដើម្បីអី កាត់ធ្វើអីផង ខ្ញុំមិនបានដឹងដែរអារឿងហ្នឹង។ បាទ! អត់មានបានសួរផង វាកាត់ៗទៅចេះតែឆ្ងល់ទៅ បើកហើយមកផ្ទះទៅ»។
ឆ្លើយតបនឹងបញ្ហានេះ ប្រធានគណនេយ្យការិយាល័យអប់រំស្រុករំដួល លោក អ៊ុក សន បដិសេធច្រានចោលចំពោះការចោទប្រកាន់របស់គ្រូបង្រៀន ដែលថាលោកបានប្រើពាក្យអសុរោះ និងកាត់ប្រាក់បៀវត្សគ្រូបង្រៀននេះ។ លោកថា ឆ្នាំមុនៗធ្លាប់បានសុំឲ្យគ្រូជួយខ្លះមែន ប៉ុន្តែការយកនេះពុំមែនដើម្បីផលប្រយោជន៍ផ្ទាល់ខ្លួនឡើយ គឺនាំពីក្អែកទៅចែកតាវៅទេ ដើម្បីឲ្យឯកសារបានដំណើរការទៅរលូន៖ «ខ្ញុំមិនដឹងដែរ ព្រោះខ្ញុំមិនដែលយកគ្រូណាបាន ពីរបីពាន់ផង។ បើមាន ខ្ញុំយកបានតែ ១ពាន់ពីគ្រូណាមួយ វាដូចជាអត់មានគ្រូ។ គ្រូហ្នឹងមិនងាយទេ បងកាន់ងារហ្នឹងបើនិយាយជាមួយគ្រូហ្នឹង សូម្បីតែ១០០ ក៏សុំអាប់ដែរ កុំនិយាយឡើយសុំពីរបីពាន់»។
ប្រធានសមាគមគ្រូបង្រៀនឯករាជ្យកម្ពុជា លោក រ៉ុង ឈុន បង្ហាញថា ការលើកឡើងរបស់គ្រូបង្រៀន ដែលថា មន្ត្រីគណនេយ្យកាត់ប្រាក់ខែរបស់ពួកគាត់ គឺជារឿងត្រឹមត្រូវ។ ហើយអ្វីដែលមន្ត្រីគណនេយ្យអប់រំស្រុកបដិសេធពុំទទួលខុសត្រូវចំពោះបញ្ហានេះ គឺជាការឆ្លើយដើម្បីការពារខ្លួនប៉ុណ្ណោះ៖ «លក្ខខណ្ឌកម្រណាស់ គាត់ហ៊ានបញ្ចេញមតិហ៊ានជម្រាបដល់សារព័ត៌មាន គាត់ស្ថិតនៅក្នុងការភ័យខ្លាច។ អ៊ីចឹង អ្វីដែលគាត់លើកឡើង គាត់ទ្រាំលែងបានហើយ។ អ៊ីចឹង អីដែលគាត់លើកឡើងវាជាការពិត។ ហើយសុំឲ្យធ្វើយ៉ាងណាត្រូវតែលុបបំបាត់នូវរាល់ការកេងប្រវ័ញ្ចកាត់លុយ ១ពាន់ ទៅដល់ ៣ពាន់ ចំពោះគ្រូបង្រៀននេះបាទ»។
មន្ត្រីអប់រំ រាប់ពីគ្រូបង្រៀនបឋមសិក្សា គ្រូអនុវិទ្យាល័យ និងគ្រូបង្រៀនវិទ្យាល័យ គ្រូបង្រៀនទាំងនោះ ពេលបើកប្រាក់បៀវត្សរបស់ខ្លួន គឺត្រូវទៅបើកពីគណនេយ្យការិយាល័យអប់រំស្រុក។ ហើយគ្រូបង្រៀននៅស្រុករំដួល ដែលត្រូវទៅបើកប្រាក់ខែពីគណនេយ្យអប់រំស្រុកសរុបទាំងអស់ មានប្រមាណជាង ៥០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។