គ្រួសារមួយរស់នៅក្នុងភូមិត្រពាំងរាំង ឃុំមេមត់ ស្រុកមេមត់ ខេត្តកំពង់ចាម ដាក់ពាក្យប្ដឹងនៅអង្គការខារាមកម្ពុជា ឲ្យជួយស្វែងរកកូនស្រីឈ្មោះ រឿន ដានី ដែលទៅធ្វើការជាជំនួយការមេផ្ទះ នៅប្រទេសម៉ាឡេស៊ី ហើយបាត់ដំណឹងកូនជិត ៤ឆ្នាំ ក្រោយពីរដ្ឋាភិបាលផ្អាកក្រុមហ៊ុនមិនឲ្យនាំពលករចេញថែមទៀត កាលពីរឆ្នាំមុន។
លោក អិត សារឿន អាយុ ៤១ឆ្នាំ មានកូន ៩នាក់ បានឲ្យដឹងថា កូនស្រីច្បងអាយុ ១៨ឆ្នាំ ឈ្មោះ រឿន ដានី ទៅធ្វើការជាជំនួយការមេផ្ទះនៅប្រទេសម៉ាឡេស៊ី ជាមួយកូនស្រីអ្នកភូមិត្រពាំងរាំង ២នាក់ទៀត តាមក្រុមហ៊ុន អិម.វ៉ាយ.អែស (MYS) តាំងពីថ្ងៃទី២៧ ខែតុលា ឆ្នាំ២០១០។
លោកថា កូនស្រី រឿន ដានី ទៅធ្វើការនៅប្រទេសម៉ាឡេស៊ី បាន ៦ខែ ក្រុមហ៊ុនបានឲ្យម្តាយជួបកូនស្រីតាមទូរស័ព្ទបានម្តង។ ក្រោយពីរដ្ឋាភិបាលផ្អាកក្រុមហ៊ុននានាមិនឲ្យនាំពលករទៅធ្វើការនៅក្រៅប្រទេសមក ដំណឹងអំពីកូនស្រីគាត់ក៏បាត់ឈឹងជិត ៤ឆ្នាំ៖ «ខាងខ្ញុំចេះតែភ័យព្រួយបារម្ភ ខ្លាចដូចថាអាណត្តិវាទៅនោះ តែ ២ឆ្នាំវិលវិញ ហើយដល់ច្រើនឆ្នាំពេក អត់ឃើញវាវិលវិញខ្លាចអ៊ីចេះមួយអ៊ីចុះពីរ ខ្លាចគេបោក ឬក៏វាស្លាប់អីទៅ យើងអត់ដឹងដំណឹង»។
លោកស្រី មុំ ធឿន អាយុ ៣៨ឆ្នាំ ជាម្តាយ រឿន ដានី ថ្លែងថា ពេលកូនគាត់ចេញពីភូមិទៅនោះ ក្រុមហ៊ុន អិម.វ៉ាយ.អែស បានសន្យាថា ២ឆ្នាំ កូនគាត់ចប់កិច្ចសន្យា នឹងមកផ្ទះវិញហើយ។ ឥឡូវជិត ៤ឆ្នាំហើយ មិនឃើញកូនគាត់ត្រឡប់មកវិញទេ ទើបគាត់បារម្ភខ្លាំងមិនដឹងកូនស្លាប់ ឬរស់។ លោកស្រីបន្ថែមថា ក្មេងស្រី ២នាក់ ដែលចេញទៅបម្រើតាមផ្ទះនៅប្រទេសម៉ាឡេស៊ី ជាមួយកូនស្រីគាត់ ពួកគេបានមកដល់ផ្ទះវិញហើយ បាត់តែកូនស្រី រឿង ដានី មិនឃើញមកវិញ។ លោកស្រីថា ទោះបីកូនស្រីស្លាប់ ឬរស់ សូមឲ្យគាត់ជាឪពុកម្តាយ បានទទួលដំណឹងផង៖ «ក្រុមហ៊ុនបិទ ខ្ញុំមិនដឹងទៅរកឯណា បើខ្ញុំទៅរកអត់ឃើញផង»។
លោក អ៊ុក ចន្ធី ដែលបានយកឯកសារក្មេងស្រី រឿន ដានី បាត់ខ្លួននៅប្រទេសម៉ាឡេស៊ី មកប្ដឹងនៅអង្គការខារាមកម្ពុជា បំណងឲ្យជួយរកក្មេងស្រីរូបនោះ បានឲ្យដឹងថា ក្រុមហ៊ុន អិម.វ៉ាយ.អែស បានបិទទ្វារហើយ។
នាយកប្រតិបត្តិអង្គការខារាមកម្ពុជា លោក យ៉ា ណាវុធ ថ្លែងថា អង្គការនេះបានទទួលពាក្យបណ្ដឹងឲ្យជួយស្វែងរកក្រុមគ្រួសារពលករបាត់ខ្លួននៅបរទេសកើនឡើងច្រើននៅឆ្នាំ២០១៣ បើធៀបនឹងឆ្នាំ២០១២។ លោកថា ថ្មីៗនេះអង្គការខារាមកម្ពុជា បានជួយពលករ ២៥នាក់ បានវិលមកដល់កម្ពុជា ហើយ។ លោកថា អ្នកបានវិលមកប្រទេសកំណើតវិញនោះ មានអ្នកខ្លះក៏មានសតិមិនល្អ ឯអ្នកខ្លះក៏មានជំងឺត្រូវជួយព្យាបាលថែម។ ចំណែកបណ្ដឹងថ្មីៗនេះ អង្គការខារាម នឹងដាក់សំណុំរឿងបញ្ជូនបន្តទៅមេធាវីនៅបរទេស ដើម្បីជួយស្វែងរកពលករបាត់ខ្លួនតាមពាក្យបណ្ដឹងរបស់ក្រុមគ្រួសារ៖ «ឧទាហរណ៍ បើសិនជាករណីបាត់ដំណឹងនោះវាត្រូវរករយៈពេលយូរ។ ប៉ុន្តែ បើជាករណីដូចជាអំពើហិង្សាដែលកើតមាននៅក្រៅប្រទេស ហើយកំពុងធ្វើការងារជាមួយថៅកែណាមួយ យើងស្គាល់អត្តសញ្ញាណថៅកែហ្នឹងច្បាស់ ទីតាំងត្រង់ណា អាហ្នឹងយើងងាយជួយពលរដ្ឋយើង»។
វិទ្យុអាស៊ីសេរី បានព្យាយាមទាក់ទងមន្ត្រីក្រសួងមហាផ្ទៃ នាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការដ្ឋាននគរបាលជាតិ ប៉ុន្តែមិនអាចជម្រាបសួរព័ត៌មានបាននៅថ្ងៃទី២៦ ខែវិច្ឆិកា។
កាលពីថ្ងៃទី១៥ ខែតុលា ឆ្នាំ២០១១ ប្រមុខរដ្ឋាភិបាលកម្ពុជា លោក ហ៊ុន សែន បានចេញសារាចរផ្អាកការជ្រើសរើស បណ្ដុះបណ្ដាល និងបញ្ជូនពលករជាស្ត្រីជំនួយការមេផ្ទះ ទៅប្រទេសម៉ាឡេស៊ី បណ្ដោះអាសន្ន ដោយសារមានព័ត៌មានអវិជ្ជមាន ទើបរដ្ឋាភិបាលសម្រេចផ្អាកក្រុមហ៊ុនស្ថាប័ននាំពលករទៅធ្វើការជាជំនួយការមេផ្ទះ នៅប្រទេសម៉ាឡេស៊ី លុះត្រាតែរដ្ឋាភិបាលបានជូនដំណឹងជាថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។