នេះជាព្រះរាជវត្តមានសែព្រះរាជវង្សលើកទីពីរហើយរបស់ព្រះមហាក្សត្រ ក្នុងការគាំទ្រវិស័យអប់រំដល់កុមារចេញពីគំនរសំរាម ដោយព្រះអង្គចាត់ទុកថា បេសកកម្មរបស់អង្គការដើម្បីភាពញញឹមនៃកុមារ ឬ ប៉េ.អែស.អឺ (PSE) នេះ គឺជាផ្នែកមួយដែលមិនអាចខ្វះបាននៅក្នុងសង្គម ដើម្បីជំរុញកំណើននៃការអភិវឌ្ឍ ហើយការផ្ដល់លទ្ធភាពក្នុងទម្រង់ណាមួយអាចរាប់បានថា គឺការរួមចំណែកក្នុងការកាត់បន្ថយភាពក្រីក្ររបស់កម្ពុជា។
មានព្រះរាជបន្ទូលនៅក្នុងពិធីសម្ពោធដាក់ឲ្យប្រើប្រាស់អគារអន្តេវាសិកដ្ឋាន និងបន្ទះអគារពន្លឺព្រះអាទិត្យ ក្នុងមណ្ឌលអង្គការដើម្បីភាពញញឹមនៃកុមារ នៅថ្ងៃទី៧ កុម្ភៈ ព្រះបាទសម្ដេច ព្រះបរមនាថ នរោត្តម សីហមុនី ព្រះអង្គចាត់ទុកកិច្ចខិតខំប្រឹងប្រែងនេះថា ជាការជំរុញឲ្យស្ថានភាពរបស់កុមារមានលំនឹងបន្តទៀត។ ហើយជាពិសេស ពួកគេអាចមើលឃើញពីអនាគតដ៏វែងឆ្ងាយបាន។ លើសពីនេះ ព្រះបាទសម្ដេច ព្រះបរមនាថ នរោត្តម សីហមុនី ព្រះអង្គមានបន្ទូលថា រាជរដ្ឋាភិបាលក្រោមគោលនយោបាយរបស់លោកនាយករដ្ឋមន្ត្រី ហ៊ុន សែន បានធ្វើឲ្យកម្ពុជា និងដៃគូពាក់ព័ន្ធ មានលទ្ធភាពរួមចំណែកក្នុងការកសាងសង្គមមួយប្រកបដោយចិរភាព រហូតមកដល់ពេលនេះ។
«សំឡេង»
របាយការណ៍របស់អង្គការដើម្បីភាពញញឹមនៃកុមារ បានឲ្យដឹងថា អស់រយៈពេល ១៩ឆ្នាំកន្លងទៅនេះ គិតចាប់តាំងពីអង្គការដើម្បីភាពញញឹមនៃកុមារ បានបង្កើតឡើងឆ្នាំ១៩៩៥ មានកុមារជាង ១ម៉ឺននាក់ហើយ បានទទួលការបណ្ដុះបណ្ដាល និងផ្គត់ផ្គង់ពីជំនាញវិជ្ជាជីវៈ។ ដោយឡែកអគារអន្តេវាសិកដ្ឋាន ដែលទើបសម្ពោធរួចនៅពីថ្ងៃទី៧ កុម្ភៈ អាចទទួលសិស្សឲ្យស្នាក់នៅរហូតដល់ជាង ៧០០នាក់។
នាយកកម្មវិធីនៃអង្គការដើម្បីភាពញញឹមនៃកុមារ លោក ពិន សារពេជ្ញ ឲ្យដឹងថា ថ្វីបើមកដល់ពេលនេះ មណ្ឌលរបស់លោកបានរួមចំណែកមួយយ៉ាងធំក្ដី ប៉ុន្តែថា នៅមានកិច្ចការជាច្រើនទៀតដែលទាមទារ ដើម្បីដោះស្រាយ។ លោកបន្តថា អ្វីដែលអង្គការដើម្បីភាពញញឹមនៃកុមារ សម្រេចជ្រើសរើសកុមារដើម្បីយកមកផ្គត់ផ្គង់នេះ គឺផ្ដោតសំខាន់ចំពោះកុមាររស់ក្រោមបន្ទាត់នៃភាពក្រីក្រ ដែលក្រុមគ្រួសារមិនអាចរកចំណូលបានលើសពីមួយដុល្លារក្នុងមួយថ្ងៃប៉ុណ្ណោះ។
«សំឡេង»
គិតមកដល់ពេលនេះ មានកុមារជាង ៨០% ហើយក្នុងចំណោមកុមារសរុបជាង ១ម៉ឺននាក់ ដែលឆ្លងកាត់ការបណ្ដុះបណ្ដាលពីមណ្ឌល។ ពួកគេទទួលបានការងារធ្វើទាំងនៅក្នុងស្រុក និងនៅលើឆាកអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។