ក្រុមសហព័ន្ធ និងសហជីពមូលដ្ឋានជិត ៤០រោងចក្រ និងអង្គការសមាគមពាក់ព័ន្ធវិស័យការងារមួយចំនួន ជួបពិគ្រោះយោបល់គ្នាលើលទ្ធផលសិក្សាអំពីតម្រូវការរស់នៅ និងការប្រឈមរបស់កម្មករ។ លទ្ធផលនេះ គឺការត្រៀមរៀបចំសំណើ ដើម្បីចរចាប្រាក់ឈ្នួលអប្បបរមាសម្រាប់វិស័យកាត់ដេរ និងដេរស្បែកជើងសម្រាប់ឆ្នាំ២០១៨។
ប្រធានសហភាពការងារកម្ពុជា លោក អាត់ ធន់ ថ្លែងថា ថ្វីបើប្រមុខរដ្ឋាភិបាលបានប្រកាសអំពីការដំឡើងប្រាក់ឈ្នួលកម្មករថ្មីៗនេះក្ដី ក៏ក្រុមសហព័ន្ធ និងសហជីពមូលដ្ឋានទាំងជិត ៤០រោងចក្រ មានឯកភាពគ្នាដាក់តួលេខដោយឡែកមួយសម្រាប់ចរចាប្រាក់ឈ្នួលកម្មករ៖ « ២២៣ , ៨៤ដុល្លារជាតួលេខចុង ដែលយើងបានឯកភាពអម្បាញ់មិញ។ លេខនេះជាលេខមូលមួយ ដែលយើងត្រៀមនឹងធ្វើការចរចាជាមួយនឹងនិយោជក និងរដ្ឋាភិបាល ដើម្បីកំណត់ដំឡើងប្រាក់ឈ្នួលឲ្យកម្មករ។ ជាងនេះទៅទៀត អង្គប្រជុំក៏បានឯកភាពថាមិនគួរយកតែទឡ្ហីករណ៍ប្រាក់ឈ្នួលសុទ្ធទេ គួរតែឲ្យរដ្ឋាភិបាលពិនិត្យមើលការបន្ថយ ឬការធានាអំពីអតិផរណាផ្សេងៗ កុំឲ្យវាឡើងខ្ពស់ពេក។ បើសិនជាឡើងមិនខ្ពស់ បានន័យថាប្រាក់ឈ្នួលយើងអាចមានល្មម យើងអាចចាយគ្រាន់ តែបើឡើងខ្ពស់ ទោះបីឡើងទៅទៀត ក៏ពិបាក »។
នៅលើទំព័រហ្វេសប៊ុក (facebook) របស់លោកនាយករដ្ឋមន្ត្រី ហ៊ុន សែន កាលពីថ្ងៃទី២០ សីហា បានសរសេរថា ចំនួនរោងចក្របានកើនឡើងជាបន្តបន្ទាប់ ដែលបានផ្ដល់ការងារដល់ពលរដ្ឋ ហើយក្នុងនោះប្រាក់ខែក៏ត្រូវបានដំឡើងជាបន្តបន្ទាប់ ដែលនៅឆ្នាំ២០១៨ តិចបំផុត គឺអាចឡើងដល់ ១៦៨ដុល្លារក្នុងមួយខែ បូកនឹងប្រាក់អត្ថប្រយោជន៍ផ្សេងៗទៀត គឺច្រើន។
លោក អាត់ ធន់ បញ្ជាក់ថា ការដាក់តួលេខចំនួន ២២៣,៨៤ដុល្លារ ដើម្បីចរចានេះ គឺបន្ទាប់ពីសហភាពការងារកម្ពុជា ផ្អែកលើការស្រាវជ្រាវតម្រូវការ ៧ចំណុចរបស់កម្មករសម្រាប់ទ្រទ្រង់ជីវភាពរស់នៅសមរម្យ៖ « ចុងក្រោយនេះ គឺយើងរកឃើញលេខ១៩៥ គឺសម្រាប់កម្មករនិយោជិតចំណាយ ដោយឥតគិតការផ្ញើទៅផ្ទះ ៣៨ដុល្លារទេ។ បើសិនជាយើងគិតការផ្ញើទៅផ្ទះទៀត គឺ២២៣ »។
ទន្ទឹមគ្នានេះ ប្រធានសហជីពខ្លះដូចជាលោក ប៊ុន វណ្ណ ដែលបានចូលរួមកិច្ចពិគ្រោះយោបល់នៅរសៀលថ្ងៃទី២៤ សីហា ក៏លើកដែរថា សហភាពការងារកម្ពុជា គួរតែទាមទារឲ្យមានការការពារអតិផរណាដែរ។
ដើម្បីដោះស្រាយបញ្ហានេះ លោកនាយករដ្ឋមន្ត្រីសង្កត់ធ្ងន់ចំពោះការឡើងថ្លៃផ្ទះជួលឲ្យកម្មករ៖ « នៅតែប៉ុន្មានថ្ងៃទៀត ខែមករា នឹងមកដល់ហើយ។ អ៊ីចឹងត្រូវគេថាបិទក្រោលសេះ មុននឹងសេះចេញផុត។ អ៊ីចឹងខ្ញុំអំពាវនាវក្នុងនាមរាជរដ្ឋាភិបាល ទៅចំពោះម្ចាស់ផ្ទះសំណាក់ទាំងអស់ សុំមេត្តាយោគយល់ និងសុំកុំមើលឃើញថាការដំឡើងប្រាក់បៀវត្សរ៍អប្បបរមាជូនកម្មករ គឺជាសាច់ជ្រូកបីជាន់សម្រាប់អស់លោកអ្នក »។
ការវាយតម្លៃលើបញ្ហាទាមទារដំឡើងប្រាក់ឈ្នួលរបស់កម្មករ ត្រូវបានក្រុមប្រឹក្សាការងារត្រីភាគី គឺភាគីថៅកែរោងចក្រ ភាគីសហជីពកម្មករ និងភាគីរាជរដ្ឋាភិបាល ធ្វើឡើងជារៀងរាល់ឆ្នាំ។ ស្របពេលដែលប្រមុខរាជរដ្ឋាភិបាលប្រកាសដំឡើងប្រាក់ឈ្នួលយ៉ាងតិច ១៦៨ដុល្លារក្នុងមួយខែ ហើយសហជីពដាក់ចំនួន ២២៣,៨៤ដុល្លារ ត្រូវបានលោក អាត់ ធន់ បញ្ជាក់ថា ជាការធ្វើតាមយន្តការ និងគោលការណ៍ចរចាប្រាក់ឈ្នួលនៅក្នុងក្រុមប្រឹក្សាការងារត្រីភាគី។ លោកថា តួលេខ និងចំណុចទាមទារដែលខាងភាគីសហជីពសម្រេចនេះ លោកនឹងចងក្រងជារបាយការណ៍យកទៅចរចានៅចំពោះមុខក្រុមប្រឹក្សាការងារត្រីភាគី នៅខែកញ្ញា និងខែតុលា ខាងមុខ។ ប្រាក់ឈ្នួលអប្បបរមាដែលកំណត់ថ្មី នឹងត្រូវចាប់អនុវត្តនៅថ្ងៃទី១ ខែមករា ឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។