កម្មករដែលបានមកធ្វើការងារតាមរោងចក្រនៅភ្នំពេញ ចាប់ផ្ដើមនាំគ្នាទៅអបអរបុណ្យចូលឆ្នាំនៅតាមស្រុកកំណើតរៀងៗខ្លួនហើយ។ ការចាកចេញជាបន្តបន្ទាប់របស់កម្មករ ធ្វើឲ្យរោងចក្រក្នុងតំបន់ឧស្សាហកម្មធំៗ ដូចជានៅតាមផ្លូវវ៉េងស្រេង ផ្ដើមស្ងាត់ជាបណ្ដើរៗតាំងពីថ្ងៃទី៩ មកម្ល៉េះ។
ទិដ្ឋភាពដែលធ្លាប់តែអ៊ូអរតាមរោងចក្រនានានៅរាជធានីភ្នំពេញ ប្រែជាស្ងប់ស្ងាត់។ កម្មករកម្មការិនីរោងចក្រកាត់ដេរ បានទៅស្រុកកំណើតរៀងៗខ្លួន ដើម្បីជួបជុំក្រុមគ្រួសារ ក្រោយពេលពួកគេបើកប្រាក់ខែ និងប្រាក់ខ្ចីពីថៅកែខ្លះ។
ទោះជាតាមមុខរោងចក្រភាគច្រើនស្ងាត់ជ្រងំ នៅសល់តែសន្តិសុខយាម ប៉ុន្តែនៅរោងចក្រខ្លះបានប្រគំតន្ត្រីជប់លៀងច្រៀងរាំនៅខាងក្នុងរោងចក្រ។
កម្មការិនីរោងចក្រម្នាក់ដែលមិនទាន់ត្រឡប់ទៅស្រុកកំណើតវិញ កញ្ញា ស្រីណែត ថាមុនឲ្យឈប់សម្រាក រោងចក្រដែលនាងធ្វើការបានជប់លៀងឲ្យកម្មករ។ នាងថាឆ្នាំនេះ ថៅកែរោងចក្រនាងមិនត្រឹមតែជប់លៀងឲ្យទេ ថែមទាំងបានបើកប្រាក់ខែសម្រាប់ខែមេសា ឲ្យមុន ហើយឲ្យខ្ចីលុយបន្ថែមសម្រាប់ចូលឆ្នាំទៀត៖ « អ្នកទើបចូល ៥០ ( ដុល្លារ ) អ្នកចូលដូចថាគេចូលយូរចឹងបាន ១០០ ( ដុល្លារ ) ប្រាក់ខែបើកហើយ បើកហើយឲ្យខ្ចីពីលើទៀតចា៎ បានច្រើន »។
បន្ទាប់ពីកម្មកររោងចក្រទៅលេងស្រុកកំណើតអស់ អាជីវករលក់បន្លែត្រីសាច់នៅមុខរោងចក្រ នឹងបិទតូបដើម្បីឈប់សម្រាកដែរ។
អ្នកលក់បន្លែម្នាក់នៅមុខរោងចក្រម្ដុំសួនឧស្សាហកម្មកាណាឌីយ៉ា លើកំណាត់ផ្លូវវ៉េងស្រេង ឈ្មោះ ពៅ ថាប៉ុន្មានថ្ងៃនេះលោកលក់មិនដាច់ដូចសពដងទេ។ លោកថា កម្មករកម្មការិនីបានចាកចេញពីភ្នំពេញតាំងតែពីថ្ងៃច័ន្ទ ដើមសប្ដាហ៍ ហើយការលក់បន្លែរបស់លោកក៏ចាប់ផ្ដើមធ្លាក់ចុះ៖ « ពីរថ្ងៃមុនដាច់គ្រាន់បើ ដល់ពេលថ្ងៃហ្នឹង គេទៅអស់ហើយ មួយៗហេ »។
នៅតាមមុខរោងចក្រក្នុងរាជធានីភ្នំពេញ ច្រើនតែមានអាជីវករលក់ដូររបស់របរកំប៉ិកកំប៉ុក។ កម្មករដែលចេញពីធ្វើការ ពួកគេចូលចិត្តទិញម្ហូប ត្រីសាច់ទៅចម្អិននៅបន្ទប់ជួលក្បែរៗនោះ។
អ្នកលក់មាន់ទានៅមុខរោងចក្រ លោក ឌី ណា ថាលោកនឹងបិទតូបលក់មាន់នៅថ្ងៃទី១៣ មេសា ព្រោះកម្មករទៅផ្ទះអស់ហើយ ដូច្នេះគ្មានអ្នកទិញទេ។ លោកមិនបារម្ភពីមាន់ទាដែលលក់សល់ទេ ព្រោះអាចយកទៅធ្វើម្ហូបសែនបុណ្យចូលឆ្នាំបាន៖ « បើម្សិលមិញលក់ដាច់ មនុស្សច្រើន ហើយប៉ុន្មានថ្ងៃមុនក៏លក់ដាច់ដែរ គេយកដូចថាទិញទៅជប់លៀងអ៊ីចឹងអ្ហា ប៉ុន្តែថ្ងៃនេះគឺស្ងាត់ »។
បើទោះជានៅតាមមុខរោងចក្រមានភាពស្ងប់ស្ងាត់ នៅចំណតឡានឈ្នួល ឬនៅតាមផ្លូវជាតិចេញពីរាជធានីភ្នំពេញ បែរជាអ៊ូអរ។
អ្នករត់ម៉ូតូឌុបមុខសួនឧស្សាហកម្មកាណាឌីយ៉ាម្នាក់ឈ្មោះ ចាន់ ថាលោកចាប់ផ្ដើមរត់ម៉ូតូឌុបដាច់ខ្លាំង ចាប់តាំងពីកម្មករបើកលុយហើយ។ លោកឌុបកម្មករទៅដាក់តាមចំណតឡានឈ្នួល៖ « ម៉ូតូឌុបរកបានច្រើនដែរបង ចាប់តាំងពីថ្ងៃទី១០ បើកលុយហើយ គេអ្នកខ្លះទៅគេទៅដល់ត្រឹមបេនឡាន »។
ក្រសួងការងារ និងបណ្ដុះបណ្ដាលវិជ្ជាជីវៈ បានជូនដំណឹងឲ្យកម្មករនិយោជិតទាំងអស់ឈប់សម្រាកចូលឆ្នាំខ្មែរចំនួន ៤ថ្ងៃ គឺថ្ងៃទី១៤ ១៥ ១៦ និងថ្ងៃទី១៧។
ទាក់ទងនឹងការឈប់សម្រាកថ្ងៃចូលឆ្នាំនេះ ប្រធានសហភាពសហជីពការងារកម្ពុជា លោក អាត់ ធន់ មើលឃើញល្អជាងឆ្នាំមុន។ ប៉ុន្តែលោកថា កម្មករភាគច្រើនចង់ប្រើប្រាស់ច្បាប់ឈប់សម្រាកប្រចាំឆ្នាំ ១៨ថ្ងៃបន្ថែមទៀត ដើម្បីឈប់បន្តជាមួយថ្ងៃចូលឆ្នាំ។ លោក អាត់ ធន់ ចង់ឲ្យកម្មករឈប់បន្ថែមពីលើថ្ងៃចូលឆ្នាំ ដោយប្រើច្បាប់ប្រចាំឆ្នាំយ៉ាងហោចណាស់ ១សប្ដាហ៍បន្ថែមទៀត ដើម្បីអាចលំហែកាយគ្រប់គ្រាន់។ តែលោកថា និយោជកមិនព្រមឲ្យកម្មករឈប់បន្តថែមថ្ងៃចូលឆ្នាំនោះទេ៖ « មានពេលលំហែកាយឈប់បានយូរ គាត់ថែសុខភាពគាត់ ហីគាត់វាមិនស្ត្រែស មិនធុញថប់ ឈប់ទៅគាត់ដើរលេងគាត់អី ផុតពីហ្នឹងគាត់ចូលធ្វើការវិញ ហីដល់ពេលចឹង ខ្ញុំគិតថាផលិតភាពដែលតាមពិសោធន៍ហ្នឹង គឺថាផលិតភាពហ្នឹងមានការកើនឡើងទៀត ហីគាត់មានការលើកទឹកចិត្តទៀត »។
ទាំងកម្មករ និងសហជីព អះអាងថា មិនទាន់ដឹងថារោងចក្រណាមិនអនុញ្ញាតឲ្យកម្មករនិយោជិតឈប់សម្រាកថ្ងៃបុណ្យចូលឆ្នាំនោះទេ។ ក្នុងករណីចាំបាច់ដែលសហគ្រាស គ្រឹះស្ថាន មិនអាចបញ្ឈប់សកម្មភាពរបស់ខ្លួនបានក្នុងឱកាសថ្ងៃឈប់សម្រាកចូលឆ្នាំខ្មែរបាន ម្ចាស់ ឬនាយកត្រូវសម្របសម្រួលជាមួយកម្មករនិយោជិតឲ្យមានការស្ម័គ្រចិត្ត ព្រមទាំងបែងចែកឲ្យមានពេលវេលា និងថ្ងៃឈប់សម្រាកបុណ្យឲ្យបានសមស្រប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។