តំណាងអ្នករត់រ៉ឺម៉កទេសចរណ៍ ឬហៅថាម៉ូតូកង់បីនៅក្រុងប៉ោយប៉ែត ខេត្តបន្ទាយមានជ័យ ចំនួន ៣នាក់ នៅព្រឹកថ្ងៃទី១០ សីហា នាំគ្នាទៅរកអន្តរាគមន៍ពីសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ឲ្យជួយអន្តរាគមន៍ទៅប៉ូលិសច្រកព្រំដែនអន្តរជាតិប៉ោយប៉ែត។ ពួកគាត់អះអាងថា ប៉ូលិសអន្តោប្រវេសន៍ច្រកនេះរារាំងមិនឲ្យពួកគាត់ចូលទៅដឹកទំនិញនៅព្រំដែនថៃ បានដូចពេលមុននោះទេ។ ប្រធានប៉ុស្តិ៍ប៉ូលិសអន្តោប្រវេសន៍ច្រកប៉ោយប៉ែត អះអាងថា មូលហេតុដែលធ្វើដូច្នេះ ដើម្បីរៀបចំសណ្ដាប់ធ្នាប់ឲ្យបានល្អនៅច្រកព្រំដែន។
ក្រុមអ្នករត់រ៉ឺម៉កទេសចរណ៍នៅក្រុងប៉ោយប៉ែត ចាត់ទុកការរារាំងរបស់ប៉ូលិសច្រកព្រំដែនមួយនេះ ថាធ្វើឲ្យប៉ះពាល់ដល់របរដឹកជញ្ជូនរបស់ពលរដ្ឋក្រីក្រ ដោយបាត់បង់ប្រាក់ចំណូលប្រចាំថ្ងៃ។
តំណាងអ្នករត់រ៉ឺម៉កទេសចរណ៍នៅច្រកព្រំដែនប៉ោយប៉ែត លោក លី ហួ ឲ្យដឹងនៅថ្ងៃទី១០ សីហា ថា ប៉ូលិសអន្តោប្រវេសន៍ច្រកព្រំដែនអន្តរជាតិប៉ោយប៉ែត បណ្ដេញពួកគាត់មិនឲ្យចូលដឹកទំនិញនៅព្រំដែនថៃ បានដូចពេលមុននោះទេ។ លោកអះអាងថា ពួកគាត់រស់នៅពឹងផ្អែកទៅលើរបរដឹកទំនិញនៅច្រកព្រំដែនមួយនេះ រកប្រាក់ចំណូលដោះស្រាយជីវភាពប្រចាំថ្ងៃ។
លោកទទូចឲ្យប៉ូលិស អនុញ្ញាតឲ្យពួកគាត់បានចូលទៅដឹកទំនិញនៅព្រំដែនថៃ ដូចដើមវិញ៖ « តាក់ស៊ីពេញតែផ្លូវ គេអត់មានរៀបចំគេ ដេញតែម៉ូតូកង់ពួកខ្ញុំ។ ខ្ញុំចូលផ្លូវដើមពុទ្រា ក៏គេមិនឲ្យចូលដែរ ហើយមកដល់បារាស់ព្រំដែន ក៏គេមិនឲ្យចូលដែរ។ គេឲ្យពួកខ្ញុំទៅកន្លែងផ្សេង មិនទៅមិនកើតទេ ព្រោះជាកន្លែងដែលពួកខ្ញុំធ្លាប់រកស៊ីច្រើនឆ្នាំហើយ »។
ឆ្លើយតបនឹងបញ្ហានេះ ប្រធានប៉ុស្តិ៍ប៉ូលិសអន្តោប្រវេសន៍ច្រកព្រំដែនប៉ោយប៉ែត លោក ស៊ឹម សំអាត មានប្រសាសន៍ថា មូលហេតុដែលលោកមិនឲ្យរ៉ឺម៉កទេសចរណ៍ចូលទៅច្រកព្រំដែនថៃ ដោយសារពួកគាត់ចតគ្មានសណ្ដាប់ធ្នាប់។ លោកបន្ថែមថា ការធ្វើដូច្នេះដើម្បីរៀបចំចរាចរណ៍នៅច្រកព្រំដែនមួយនេះឲ្យបានមានសណ្ដាប់ធ្នាប់ល្អ៖ « ពេលដែលគាត់ទៅចតទីនោះ កាន់តែធ្វើឲ្យម៉ូតូឌុបមួយចំនួនក៏ចតបានដែរ ហើយទូលនំលក់ក៏គេទៅលក់បានដូចគ្នា ហើយធ្វើឲ្យអនាម័យគ្មាន និងស្ទះចរាចរណ៍គ្រប់មធ្យោបាយតូចធំទាំងអស់ដែលឆ្លងកាត់។ ដូច្នេះខ្ញុំត្រូវតែឲ្យពួកគាត់ចេញមកខាងក្រៅ »។
ទោះជាយ៉ាងណាក្ដី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី កត់សម្គាល់ថា យុទ្ធសាស្ត្ររៀបចំសណ្ដាប់ធ្នាប់របស់ប៉ូលិសច្រកព្រំដែនមួយនេះ មិនអាចយកជាការបាននោះទេ ល្គឹកណាប៉ូលិសមិនចាត់វិធានការទៅលើឡានដឹកទំនិញធំៗ ឡានរបស់ក្រុមហ៊ុនកាស៊ីណូជាច្រើនគ្រឿងដែលចតគ្មានសណ្ដាប់ធ្នាប់នោះ៖ « ការធ្វើនេះមិនយុត្តិធម៌សម្រាប់អ្នកក្រ និងគ្មានរបៀបរៀបរយតាមស្តង់ដារទេ។ មួយវិញទៀត រដ្ឋាភិបាលគួរតែគិតគូរឡើងវិញដើម្បីឲ្យអ្នកក្រីក្រតូចតាចមានដីចំណីផ្លូវបានរកស៊ីខ្លះផង »។
នៅច្រកព្រំដែនក្រុងប៉ោយប៉ែត មានរ៉ឺម៉កទេសចរណ៍រត់ឈ្នួលដឹកទំនិញទាំងអស់ជាង ៣០គ្រឿង។ រហូតមកទល់ពេលនេះ ពុំមានរ៉ឺម៉កទេសចរណ៍ណាអាចចូលទៅដឹកទំនិញនៅគល់ស្ពានច្រកព្រំដែនជាប់ប្រទេសថៃ បាននៅឡើយទេ។ ពួកគាត់ប្រមូលផ្ដុំគ្នានៅលើផ្លូវជាតិលេខ៥ នៅម្ដុំរង្វង់មូលក្រុងប៉ោយប៉ែត ដើម្បីរង់ចាំមើលក្រែងសមត្ថកិច្ចឲ្យចូលទៅដឹកទំនិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។