សកម្មជនគណបក្សសង្គ្រោះជាតិ និងជាបេក្ខនារីឈរឈ្មោះលេខរៀងទី៣ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅសង្កាត់រលាប ក្រុងពោធិ៍សាត់ ត្រូវម៉ូតូបុកស្លាប់ពេលដើរឃោសនារកសំឡេងឆ្នោត។ មន្ត្រីគណបក្សប្រឆាំង និងមន្ត្រីអង្គការការពារសិទ្ធិមនុស្សលីកាដូ (LICADHO) ស្នើឲ្យអាជ្ញាធរមានសមត្ថកិច្ចស៊ើបអង្កេតករណីនេះឲ្យបានច្បាស់។
សកម្មជនគណបក្សសង្គ្រោះជាតិ នៅសង្កាត់រលាប គឺលោកស្រី ង៉ែត សុភាព បានស្លាប់នៅពាក់កណ្ដាលផ្លូវពេលបញ្ជូនទៅមន្ទីរពេទ្យបង្អែកខេត្តពោធិ៍សាត់ បន្ទាប់ពីម៉ូតូបុកពីក្រោយពេញទំហឹងលើផ្លូវក្រាលកៅស៊ូក្នុងភូមិព្រែកត្នោត ក្នុងសង្កាត់រលាប នៅម៉ោងប្រមាណ ១០ព្រឹក ថ្ងៃទី២៤ ខែឧសភា។
សាក្សីនៅកន្លែងកើតហេតុ និងជាអ្នករួមដំណើរឃោសនា លោក ណុំ រ៉ុន រៀបរាប់ថា ជនរងគ្រោះកំពុងដើរលើចិញ្ចើមផ្លូវផ្នែកខាងស្ដាំបន្ទាប់ពីចូលបិទខិត្តប័ណ្ណគោលនយោបាយរបស់គណបក្ស នៅក្នុងផ្ទះពលរដ្ឋ ស្រាប់តែមានក្មេងស្ទាវពីរនាក់បើកម៉ូតូម៉ាក់សង់សេរី២០១០ យ៉ាងលឿន មកដល់ផ្លូវកោងមិនបន្ថយល្បឿន ជ្រុលទៅបុកជនរងគ្រោះពេញទំហឹងអូសប្រហែល ៥ម៉ែត្រ៖ «ផ្លូវហ្នឹងជាផ្លូវកែង ប៉ុន្តែវាជិះលឿនបណ្ដោយ អត់មានគិតថា កន្លែងហ្នឹងមានយើងឃោសនាអីទេ។ បើតាមខ្ញុំយល់អ៊ីចេះទេ ក្មេងហ្នឹងប្រហែលជក់ថ្នាំ វាពុលថ្នាំវាដូចអត់សូវដឹងអី»។
លោកបញ្ជាក់ថា ក្រុមការងារដែលកំពុងហែក្បួនមានគ្នាជាង ១០នាក់ បានព្យាយាមជួយសង្គ្រោះជនរងគ្រោះ ប៉ុន្តែដោយឈាមហូរតាមមាត់ និងច្រមុះច្រើនពេក ទើបទូរស័ព្ទហៅឡានពេទ្យ។ ចម្ងាយផ្លូវពីមន្ទីរពេទ្យមកកន្លែងកើតហេតុប្រមាណ ៣គីឡូម៉ែត្រ ឡានពេទ្យចំណាយពេលប្រហែល ១ម៉ោងទើបមកដល់ និងដឹកទៅសង្គ្រោះ ស្របពេលជនរងគ្រោះហូរឈាមស្ទើរខ្សោះទៅហើយ។
អាស៊ីសេរី មិនអាចទាក់ទងប្រធានការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់ លោក រស់ ចំរើន ដើម្បីសាកសួរបន្ថែមជុំវិញបញ្ហានេះបានទេ នៅថ្ងៃទី២៤ ខែឧសភា។
ប៉ុន្តែប្រធានមន្ទីរពេទ្យបង្អែកខេត្តពោធិ៍សាត់ លោក ច័ន្ទ សុខា បញ្ជាក់ថា ក្រុមឡានសង្គ្រោះពុំមានចេតនាណាមួយក្នុងការពន្យារចេញឡានទៅដឹកជនរងគ្រោះមកសង្គ្រោះនោះទេ ប៉ុន្តែអ្នកទូរស័ព្ទហៅឡានពេទ្យប្រាប់ប្លង់មិនច្បាស់ទើបធ្វើឲ្យអ្នកបើកច្រឡំផ្លូវ។
លោករំលឹកថា គ្រប់ករណីសង្គ្រោះ គ្រូពេទ្យប្រើគ្រប់វិធីសាស្ត្រ និងអស់លទ្ធភាព បើទោះបីជាជនរងគ្រោះនៅដង្ហើមចុងក្រោយ៖ «បើទោះបីថាដឹងស្លាប់ហើយ ត្រូវតែមានការសង្គ្រោះចុងក្រោយ ដូចជាយើងដាក់អុកស៊ីហ្សែន ដាក់សេរ៉ូម យើងម៉ាស្សាអ៊ីចឹងទៀតដូចថា អាហ្នឹងជាជីវិតចុងក្រោយ តែយើងត្រូវសាកល្បងជួយទៀត»។
មន្ត្រីសម្របសម្រួលអង្គការលីកាដូ ខេត្តពោធិ៍សាត់ លោក អេង ឈុនហាន ថាលោកនឹងចុះអង្កេតលម្អិតជុំវិញករណីនេះ ដោយលោកបារម្ភក្រែងមិនមែនជាគ្រោះថ្នាក់ដោយចៃដន្យ៖ «ព្រោះគាត់នៅក្នុងដំណើរ សកម្មភាពឃោសនារកសំឡេងគាំទ្រ ហើយផ្លូវនេះមិនមែនចរាចរមមាញឹកខ្លាំង ផ្លូវស្រឡះសោះ ហើយគ្នារងគ្រោះជាអ្នកកំពុងធ្វើដំណើរដោយថ្មើរជើង ហើយម៉ូតូមកបុក»។
ទោះជាយ៉ាងណា ប្រធានប្រតិបត្តិគណបក្សសង្គ្រោះជាតិ ខេត្តពោធិ៍សាត់ លោក យ៉ាន់ សេងហ៊ត និងអ្នកដើរជាមួយជនរងគ្រោះក្នុងពេលហេតុការណ៍គ្រោះថ្នាក់កើតឡើងសន្និដ្ឋានថា គ្រោះថ្នាក់នេះកើតឡើងដោយចៃដន្យ ព្រោះកន្លែងកើតហេតុឋិតនៅចំចំណុចផ្លូវកោង ហើយអ្នកបើកម៉ូតូមិនប្រុងប្រយ័ត្ន ទើបមានគ្រោះថ្នាក់កើតឡើង មិនមែនជាការយាយី ឬធ្វើបាបទៅលើបក្សប្រឆាំងនោះទេ។
បច្ចុប្បន្នអ្នកបង្កម្នាក់ បានរត់គេចខ្លួន និងម្នាក់របួសក្បាលធ្ងន់ បញ្ជូនទៅសង្គ្រោះនៅមន្ទីរពេទ្យកាល់ម៉ែត ក្រុងភ្នំពេញ។ ចំណែកសពលោកស្រី ង៉ែត សុភាព ដែលប្ដីទើបស្លាប់ចោលដោយគ្រោះថ្នាក់ចរាចរណ៍កាលពីឆ្នាំមុនដែរនោះ បានបន្សល់ទុកកូន ៤នាក់ នៅជាមួយម្ដាយ និងសាច់ញាតិមើលថែ និងធ្វើបុណ្យឧទ្ទិសកុសលជូនលោកស្រីនៅភូមិឆ្លងកាត់សង្កាត់រលាប ក្រុងពោធិ៍សាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។