Opens in new windowនាយកវិទ្យាល័យបវេល ស្រាយបំភ្លឺករណីក្រុមគ្រូបង្រៀនចោទប្រកាន់ថា លោកបានប្រព្រឹត្តអំពើពុករលួយលាក់ឈ្មោះបុគ្គលិកក្រោមឱវាទ ដើម្បីជាថ្នូរបានបើកប្រាក់ខែធ្វើប្រយោជន៍ផ្ទាល់ខ្លួននោះ គឺជាការមួលបង្កាច់ និងបង្ខូចកេរ្តិ៍ឈ្មោះ។
ប៉ុន្តែក្រុមគ្រូបង្រៀននៅតែអះអាងថា ករណីនេះ គឺជារឿងពិត ហើយពួកគាត់ស្នើឲ្យក្រសួងអប់រំ យុវជន និងកីឡា និងមន្ត្រីពាក់ព័ន្ធ បើកការស៊ើបអង្កេត និងចាត់វិធានការទៅលើអ្នកប្រព្រឹត្តិខុសតាមផ្លូវច្បាប់។
នាយកវិទ្យាល័យបវេល អះអាងថា បញ្ហាដែលកើតឡើងពីរូបលោកពាក់ព័ន្ធនឹងអំពើពុករលួយក្នុងសាលានោះ គឺជារឿងគំនុំពីសំណាក់គ្រូបង្រៀនម្នាក់ គឺលោក ងិន សុធារ៉ា ដែលកន្លងទៅលោកនាយកសាលាបានណែនាំ ពាក់ព័ន្ធនឹងរឿងវិន័យបង្រៀនសិស្សក្រៅម៉ោងសិក្សាការងាររដ្ឋ។
លោក ហ៊ួ វុទ្ធី នាយកវិទ្យាល័យបវេល មានប្រសាសន៍នៅថ្ងៃទី២២ កញ្ញា ថា លោកបម្រើការងារដើម្បីប្រយោជន៍សង្គម ហើយពុំមានចេតនាលាក់ឈ្មោះគ្រូបង្រៀនណាម្នាក់ ដើម្បីជាថ្នូរយកប្រាក់ខែរបស់គាត់ធ្វើជាប្រយោជន៍ផ្ទាល់ខ្លួននោះទេ។ លោកបញ្ជាក់ថា ករណីគ្រូបង្រៀនចំនួន ៦នាក់ ដែល លោក ងិន សុធារ៉ា អះអាងថា រូបលោកបានលាក់ឈ្មោះនោះ គឺជារឿងចោទប្រកាន់គ្មានការពិតនោះឡើយ៖ «ព្រោះបុគ្គលិក ៥នាក់ក្នុងចំណោម ៦នាក់ គាត់បានផ្លាស់ចេញទៅកន្លែងផ្សេងជាច្រើនឆ្នាំមកហើយ ក្រៅពីនោះគាត់បានដាក់ឈ្មោះលំហែមិត្តភាព ដូចជាស្ទូចត្រីអ៊ីចឹងទៅ ហើយគាត់មិនដឹងច្បាប់ គាត់ថាខ្ញុំលាក់ឈ្មោះបុគ្គលិក មិនត្រឹមត្រូវទេ»។
លោកបន្ថែមថា គ្រូបង្រៀនដែលចោទប្រកាន់មកលើរូបលោកនេះ ដោយសារកន្លងទៅ លោកធ្លាប់បានណែនាំ លោក ងិន សុធារ៉ា ឲ្យប្រាប់សិស្សដែលខ្លួនបង្រៀនគួរ ឲ្យពួកគេស្លៀកពាក់សមរម្យ ដើម្បីមានរបៀបរៀបរយនៅក្នុងសាលា។ លោកថា បញ្ហានេះធ្វើឲ្យ លោក ងិន សុធារ៉ា មិនពេញចិត្ត ហើយបង្កបញ្ហាមកលើរូបលោកជាបន្តបន្ទាប់។
ឆ្លើយតបនឹងបញ្ហានេះ គ្រូបង្រៀនវិទ្យាល័យបវេល លោក ងិន សុធារ៉ា អះអាងថា ករណីលោកនាយកសាលលាក់ឈ្មោះគ្រូបង្រៀនចំនួន ៦នាក់ ដែលពុំបានទៅបង្រៀនសិស្សនោះ គឺជារឿងពិត ពុំមែនជារឿងគំនុំផ្ទាល់ខ្លួនដូចការលើកឡើងនោះទេ។ លោកអះអាងថា គ្រូបង្រៀនទាំងនោះរួមមាន លោក អួង តុលា លោក អេង វីរៈ អ្នកស្រី ស៊ូ ឆព័ណ្ណ អ្នកស្រី អ៊ឹង កុលាប លោក ឌុល ម៉ារិន និងលោក ចាន់ ដារា។ អ្នកទាំងនោះ កន្លងទៅគ្រូខ្លះមិនបានបង្រៀនមួយឆ្នាំ និងខ្លះចំនួន ២ឆ្នាំ ជាដើម៖ «គាត់ហៅខ្ញុំទៅអប់រំនោះ លោកនាយកថាកូនសិស្សរបស់ខ្ញុំស្លៀកពាក់មិនសមរម្យ ហើយគាត់ដេញខ្ញុំមិនឲ្យបង្រៀនក្នុងសាលាទេ។ ខ្ញុំមិនមែនគុំកួនគាត់នោះទេ រឿងនេះគឺលោកគ្រូអ្នកគ្រូក្នុងសាលាស្ទើរទាំងអស់ គាត់មិនពេញចិត្តនឹងការគ្រប់គ្រងរបស់នាយកសាលា»។
ទាក់ទងនឹងបញ្ហានេះដែរ គ្រូបង្រៀនម្នាក់ទៀតនៅវិទ្យាល័យបវេល គឺលោក វិស ណូក មានប្រសាសន៍ថា នាយកសាលាពិតជាបានលាក់ឈ្មោះគ្រូបង្រៀនចំនួន ៦នាក់ ដែលពុំបានទៅបង្រៀនសិស្សប្រាកដមែន។ លោកមិនពេញចិត្តនឹងការគ្រប់គ្រងរបស់នាយកសាលាបច្ចុប្បន្ននោះទេ ពីព្រោះកន្លងមក នាយកសាលាធ្វើការអភិវឌ្ឍក្នុងសាលា ដោយពុំមានការប្រជុំប្រឹក្សាយោបល់ពីគ្រូបង្រៀននោះទេ៖ «លោកនាយកសាលានៅពេលធ្វើគម្រោងអីមួយ គាត់អត់បានពិភាក្សាជាមួយបុគ្គលិកទេ ដូចជាករណីកាប់ដើមឈើក្នុងសាលា ជាដើម គឺគាត់ធ្វើដោយមិនមានការប្រឹក្សាយោបល់ពីគ្រូបង្រៀនឡើយ»។
ក្រុមគ្រូបង្រៀនប្រមូលស្នាមមេដៃបានចំនួន ៣០នាក់ក្នុងចំណោមគ្រូបង្រៀនជាង ៨០នាក់ ដាក់ទៅអង្គភាពប្រឆាំងអំពើពុករលួយ និងក្រសួងអប់រំ យុវជន និងកីឡា ដើម្បីឲ្យចុះស្រាវជ្រាវ និងចាត់វិធានការតាមផ្លូវច្បាប់ទៅលើអ្នកប្រព្រឹត្តិខុស ជៀសវាងកុំឲ្យបុគ្គលផ្សេងយកគំរូតាមនៅថ្ងៃអនាគតទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។