ការរៀបចំវេទិកាពិភាក្សាស្ដីពីតួនាទីព្រះសង្ឃ និងបញ្ញវន្តក្នុងសកម្មភាពនយោបាយ និងពិធីបុណ្យឧទ្ទិសកុសលជូនដល់បុព្វបុរសខ្មែរអ្នកស្នេហាជាតិ នៅសហគមន៍បឹងកក់ កាលពីព្រឹកថ្ងៃទី១៧ ខែកុម្ភៈ បានប្រព្រឹត្តទៅចប់ចុងចប់ដើម ដោយគ្មានការរំខានពីសំណាក់អាជ្ញាធរដូចសព្វមួយដងឡើយ។
វេទិកានិងពិធីបង្សុកូលជូនចំពោះកម្មករ ៥នាក់ដែលបានស្លាប់ក្នុងការបង្ក្រាបដោយកងកម្លាំងអាជ្ញាធរ កាលពីដើមខែមករា បានដំណើរការដោយមានប្រជាពលរដ្ឋចូលរួមប្រមាណ ១០០នាក់ មកពីសហគមន៍បឹងកក់ អតីតអ្នកបឹងកក់ សហគមន៍បុរីកីឡា និងព្រះសង្ឃមកពីបណ្ដាញព្រះសង្ឃឯករាជ្យជាង ២០អង្គផង។
ស្ថាបនិកនៃបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ ដែលនិមន្តសម្របសម្រួលវេទិកា មានថេរដីកាថា កម្មវិធីទាំងមូលទទួលបានជោគជ័យ។
វាគ្មិន ៤រូបនិងព្រះសង្ឃ ១អង្គ បានត្រូវនិមន្តនិងអញ្ជើញចូលរួមផ្តល់យោបល់និងបទពិសោធន៍ក្នុងវេទិកា គឺមានលោក កែម ឡី អ្នកស្រាវជ្រាវផ្នែកអភិវឌ្ឍន៍សង្គម លោក យ៉េង វីរៈ នាយកប្រតិបត្តិនៃមជ្ឈមណ្ឌលអប់រំច្បាប់សម្រាប់សហគមន៍ អ្នកស្រី ទេព វន្នី តំណាងសហគមន៍បឹងកក់ លោក ទិប ទាវ នាយកប្រតិបត្តិសហព័ន្ធនិស្សិតបញ្ញវន្តកម្ពុជា និងព្រះតេជព្រះគុណ ឃឹម សំអឿន ព្រះចៅអធិការវត្តភ្នំខ្ពស់ ស្រុកបាណន់ ខេត្តបាត់ដំបង។
លោក យ៉េង វីរៈ មានប្រសាសន៍ថា ព្រះសង្ឃ បញ្ញវន្ត និងប្រជាពលរដ្ឋមានតួនាទីយ៉ាងសំខាន់ក្នុងសកម្មភាពនយោបាយដែលមិនអាចខ្វះបាន។
ទោះយ៉ាងណាក៏ដោយ លោក កែម ឡី ថ្លែងថា បញ្ញវន្តខ្មែរភាគច្រើនមិនហ៊ានបញ្ចេញមតិយោបល់ពាក់ព័ន្ធដល់រឿងនយោបាយឡើយ។
លោក កែម ឡី មានប្រសាសន៍បន្ថែមថា បញ្ញវន្តខ្មែរគួរតែបញ្ចប់នូវវប្បធម៌ខ្លាចរអារ ហើយហ៊ាននិយាយ ហ៊ានថា ដើម្បីជាវិភាគទានក្នុងការកែលម្អនិងអភិវឌ្ឍន៍សង្គម។
នៅក្នុងវេទិកាប្រជាពលរដ្ឋមួយចំនួនមកពីសហគមន៍បឹងកក់ អតីតអ្នកបឹងកក់ និងសហគមន៍បុរីកីឡា បានសួរវាគ្មិនដែលសំណួរទាំងអស់របស់ពួកគាត់សុទ្ធតែអំពីការរំលោភសិទ្ធិដីធ្លី សិទ្ធិនិងលំនៅឋាន ដែលពួកគាត់អះអាងថា បណ្ដាលពីការអភិវឌ្ឍន៍ពុំមានតម្លាភាព។
ពុំមានតំណាងអាជ្ញាធរចូលរួមជាវាគ្មិននៅក្នុងវេទិកានោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។