រាជរដ្ឋាភិបាលប្រទេសកម្ពុជា សម្រេចឲ្យអាជ្ញាធរខេត្តរតនគិរី ស្ថាបនាផ្លូវតាមតំបន់ខ្សែក្រវាត់ព្រំដែនខេត្តរតនគិរី ជាប់នឹងខេត្តយ៉ាឡាយ ប្រទេសវៀតណាម ជាលើកដំបូង ដើម្បីអភិវឌ្ឍវិស័យគមនាគមន៍តាមតំបន់ព្រំដែនដែលមិនធ្លាប់មានពីមុនមក។ ប្រជាពលរដ្ឋរស់នៅតាមតំបន់ព្រំដែននាតំបន់នោះ សាទរគំនិតផ្ដួចផ្ដើមអភិវឌ្ឍន៍ផ្លូវដែលជាផ្នែកសំខាន់អាចការពារទឹកដីកុំឲ្យមានការរំលោភបំពានពីប្រទេសជិតខាងតទៅទៀត។
ផ្លូវលំប្រភេទក្រួសក្រហមជាង ២០គីឡូម៉ែត្រ ត្រូវបានឈូសឆាយរួចហើយចាប់ពីបង្គោលព្រំដែនលេខ៣០ ចំណុចច្រកទ្វារព្រំដែនអន្តរជាតិកម្ពុជា-វៀតណាម ក្នុងស្រុកអូរយ៉ាដាវ ខេត្តរតនគិរី បំណងតភ្ជាប់តាមខ្សែក្រវាត់ព្រំដែនឆ្ពោះទៅតំបន់កន្ទុយនាគ បង្គោលព្រំដែនលេខ១ នៃតំបន់មុំបីកម្ពុជា វៀតណាម និងឡាវ។
ការសាងសង់ផ្លូវតាមខ្សែក្រវាត់ព្រំដែននេះ គឺជាគម្រោងថ្នាក់ជាតិក្រោមការអនុវត្តផ្ទាល់ដោយកងវិស្វកម្មនៃអគ្គបញ្ជាការកងខេមរភូមិន្ទ និងអាជ្ញាធរខេត្តរតនគិរី។ គម្រោងនេះចាប់ផ្តើមពីថ្ងៃទី១ ខែមករា និងគ្រោងបញ្ចប់សម្រាប់រយៈពេល ១០០ថ្ងៃ។
អភិបាលរង និងជាអ្នកនាំពាក្យសាលាខេត្តរតនគិរី លោក ញ៉ែម សំអឿន មានប្រសាសន៍ថា នេះជាគម្រោងអភិវឌ្ឍន៍ផ្លូវតាមខ្សែបន្ទាត់ព្រំដែនលើកដំបូងនៅខេត្តប៉ែកឦសាន ដែលជាផ្នែកអភិវឌ្ឍន៍វិស័យគមនាគមន៍កាន់តែរីកចម្រើននៅតំបន់ជនបទ។ លោកបន្តថា គម្រោងនេះនឹងបន្តស្ថាបនាទៅជាផ្លូវក្រាលកៅស៊ូនៅពេលអនាគត ដើម្បីបង្កការងាយស្រួលធ្វើដំណើរនៅតាមខ្សែក្រវាត់ព្រំដែន៖ «ឥឡូវយើងធ្វើរហូតដល់កន្ទុយនាគ ពីបង្គោលលេខ៣០ ទៅ គោលនយោបាយរបស់រាជរដ្ឋាភិបាលគឺ ១០០ថ្ងៃឲ្យហើយ យើងត្រួសត្រាយជាក្រួសក្រហមសិន»។
នៅខេត្តរតនគិរី ព្រំដែនជាប់នឹងប្រទេសវៀតណាម ចាប់ពីបង្គោលព្រំដែនលេខ១ មកទល់នឹងបង្គោលព្រំដែនលេខ៣៩ ព្រំប្រទល់ខេត្តមណ្ឌលគិរី ក្នុងនោះបង្គោលព្រំដែនពីលេខ១ ដល់លេខ៣០ រដ្ឋាភិបាលប្រទេសទាំងពីរ (កម្ពុជា-វៀតណាម) បានឯកភាពគ្នាបោះបង្គោលព្រំដែនផ្លូវការរួចរាល់ហើយ ក៏ប៉ុន្តែចាប់ពីបង្គោលព្រំដែនលេខ៣១ ដល់លេខ៣៩ កំពុងឋិតក្រោមការប្រទាញប្រទង់គ្នានៅឡើយ។
មន្ត្រីសម្របសម្រួលស្ដីទីអង្គការអាដហុក (ADHOC) ខេត្តរតនគិរី លោក ឌិន ខុន្នី សាទរចំពោះការអភិវឌ្ឍផ្លូវតាមខ្សែក្រវាត់ព្រំដែន បើទោះបីមានការចោទប្រកាន់ថា នយោបាយបោះបង្គោលព្រំដែនរបស់រាជរដ្ឋាភិបាលកន្លងទៅនេះ ធ្វើឲ្យបាត់បង់ទឹកដីទៅប្រទេសវៀតណាម យ៉ាងណាក្តី។
លើសពីនេះ ការសាងសង់ផ្លូវនៅតាមខ្សែក្រវាត់ព្រំដែនជាមធ្យោបាយសម្រាប់ប្រជាពលរដ្ឋនៅតំបន់នោះធ្វើដំណើរ និងដឹកជញ្ជូនកសិផលបានងាយស្រួល ជាពិសេសផ្លូវនេះក៏ជាគំនូសតាងមួយជួយការពារមិនឲ្យប្រទេសជិតខាងរំលោភទឹកដីបានតទៅទៀត។ លោកអំពាវនាវសុំឲ្យរាជរដ្ឋាភិបាលអភិវឌ្ឍន៍បន្ថែមលើវិស័យទឹក និងអគ្គិសនី រួមទាំងគោលនយោបាយផ្ដល់ដីសម្បទានសង្គមកិច្ចនៅតំបន់ផ្លូវថ្មីជូនប្រជាពលរដ្ឋបានមករស់នៅប្រកបរបចិញ្ចឹមជីវិត បង្កើនសេដ្ឋកិច្ចជាតិបានកាន់តែរីកចម្រើន៖ «យើងមិនអាចវាស់វែងបានទេ រឿងចំណេញខាត ប៉ុន្តែយើងសាទរចំពោះរដ្ឋបាលខេត្ត និងរាជរដ្ឋាភិបាលដែលបានលើកកម្ពស់សេដ្ឋកិច្ចរបស់ពលរដ្ឋតំបន់ព្រំដែនដើម្បីឲ្យគាត់ទៅរស់នៅច្រើន»។
ចំណែកប្រជាពលរដ្ឋរស់នៅភូមិឡំ ឃុំប៉ក់ញ៉ៃ ស្រុកអូរយ៉ាដាវ លោក សេវ ស្វាន់ បង្ហាញការបារម្ភជាមួយក្ដីរីករាយទាក់ទិនការអភិវឌ្ឍផ្លូវនេះ។ លោកថា ការអភិវឌ្ឍផ្លូវតាមតំបន់ព្រំដែនជាការប្រសើរ ក៏ប៉ុន្តែតំបន់ព្រំដែនដែលកំពុងប្រទាញប្រទង់ដូចជានៅតំបន់ក្បែរភូមិឡំ ប្រសិនរាជរដ្ឋាភិបាលធ្វើផ្លូវអ្នកភូមិបារម្ភខ្លាចប្រទេសវៀតណាម ប្រើប្រាស់ផ្លូវថ្មីនោះដើម្បីកំណត់ជាខ្សែបន្ទាត់ព្រំដែន៖ «ខ្ញុំបារម្ភ ខ្ញុំភ័យខ្លាចដូចជាផ្លូវមុនដំបូង ពួកគេធ្លាប់ធ្វើអ៊ីចឹង គេថាធ្វើបណ្ដោះអាសន្ន គេថាផ្លូវហ្នឹង ព្រំដែនតែម្ដង»។
ទោះបីជាយ៉ាងនេះក៏ដោយ អ្នកនាំពាក្យសាលាខេត្តរតនគិរី លោក ញ៉ែម សំអឿន បញ្ជាក់ថា ការអភិវឌ្ឍផ្លូវតាមខ្សែក្រវាត់ព្រំដែនសាងសង់នៅកៀកបំផុតគឺត្រឹម ៥០ម៉ែត្រពីខ្សែបន្ទាត់ព្រំដែន។ ចំណែកតំបន់ដែលឋិតក្រោមការប្រទាញប្រទង់គ្នា សមត្ថកិច្ចនឹងធ្វើការសាងសង់តាមស្ថានភាពជាក់ស្ដែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។