Opens in new windowបេក្ខជនដែលប្រឡងជាប់សញ្ញាប័ត្រមធ្យមសិក្សាទុតិយភូមិ ឬ បាក់ឌុប នៅឆ្នាំ២០១៥ មានចំនួន ៤៦.៥៦០នាក់ ក្នុងចំណោមបេក្ខជនប្រឡងសរុប ៨៣.៣២៥នាក់ ដែលក្នុងនោះ មាន ៩.៤៣៤នាក់ ជាបេក្ខជនស្វៃរិន។
នៅក្នុងហ្វូងមនុស្សប្រមាណ ១០០នាក់ កំពុងប្រជ្រៀតគ្នាមើលលទ្ធផលប្រឡង ដែលបិតលើជញ្ជាំងមណ្ឌលប្រឡងសាលាបឋមសិក្សាគំរូក្រុង នាក្រុងកំពង់ឆ្នាំង បេក្ខជនស្វៃរិនប្រឡងជាប់ម្នាក់ គឺកញ្ញា ប៊ុត ជុំសុភ័ក្រ សម្ដែងទឹកមុខត្រេកអរ នៅពេលឃើញឈ្មោះរបស់ខ្លួនជាប់។ ប៉ុន្តែ សុភ័ក្រ បានប្រែទឹកមុខមួយរំពេច នៅពេលសាកសួរទាក់ទងនឹងមុខជំនាញ និងលទ្ធភាពរៀនបន្ត។
បេក្ខជនស្វៃរិនរូបនេះ ក៏មិនខុសពីបេក្ខជនប្រឡងជាប់សញ្ញាប័ត្រមធ្យមសិក្សាទុតិយភូមិ ឬ បាក់ឌុប ជាច្រើនទៀត ដែលជួបប្រទះនឹងបញ្ហាជីវភាព ហើយត្រូវរកប្រាក់ផ្គត់ផ្គង់ការសិក្សាដោយខ្លួនឯងដែរ។
ក្រោយពេលប្រឡងបាក់ឌុប ធ្លាក់កាលពីឆ្នាំ២០១៤ មានរយៈពេលមួយឆ្នាំពេញ សុភ័ក្រ ប្ដេជ្ញាប្រឡងឲ្យជាប់ ដោយនាងចិញ្ចឹមចិត្តចង់រៀនបន្ត ខណៈដែលនាងធ្វើជាកម្មការិនីក្នុងរោងចក្រកាត់ដេរមួយនៅស្រុកកំពង់ត្រឡាច។ បច្ចុប្បន្ននាង នៅសល់លុយពីការចំណាយលើបន្ទប់ជួលស្នាក់នៅ និងផ្គត់ផ្គង់គ្រួសារខ្លះ នាងឆ្លៀតសន្សំលុយបានចំនួន ៣០០ដុល្លារហើយ ដើម្បីរៀនបន្តនៅភ្នំពេញ៖ «ខ្លួនខ្ញុំផ្ទាល់អត់មានអីច្បាស់លាស់ និងចំណេះដឹងគ្រប់គ្រាន់ដែរ អ៊ីចឹងខ្ញុំមានតែធ្វើការរោងចក្រសិន។ ក្រោយមកខ្ញុំនឹងចែកម៉ោងធ្វើការ និងម៉ោងរៀនឲ្យដាច់ស្រឡះ។ អាចខាតរៀនខ្លះ ព្រោះការងាររោងចក្រគេតម្រូវឲ្យយើងធ្វើការពេញម៉ោង»។
ជាកូនកសិករក្រីក្ររស់នៅស្រុករលាប្អៀរ កញ្ញា ប៊ុត ជុំសុភ័ក្រ រៀបរាប់ថា ឪពុកម្ដាយពុំមានលទ្ធភាពផ្ដល់ប្រាក់ឲ្យនាងរៀនបន្តទេ ប៉ុន្តែនាងសម្រេចចិត្តចេញពីគ្រួសារដោយខ្លួនឯងក្នុងពេលឆាប់ៗ ដើម្បីយកប្រាក់ដែលសន្សំបាន ៣០០ដុល្លារនោះទៅបង់ថ្លៃសាលារៀនបណ្ដើរ និងរកការងាររោងចក្រធ្វើបណ្ដើរ។ ក្រោយប្រឡងជាប់ នាងប្ដូរចិត្តពីធ្វើជាគ្រូបង្រៀន មកចង់រៀនផ្នែកកសិកម្មបន្តវិញ៖ «ប្រទេសកម្ពុជា ពឹងផ្អែកលើវិស័យកសិកម្ម ហើយក៏មិនទាន់មានយុវជនច្រើនរៀនផ្នែកកសិកម្មដែរ ដូច្នេះខ្ញុំថា នឹងមានឱកាសធ្វើការខាងហ្នឹងបាន»។
មិនខុសគ្នាប៉ុន្មានពីកញ្ញា សុភ័ក្រ ដែរ បេក្ខជនស្វៃរិនម្នាក់ទៀតមកពីស្រុកជលគីរី គឺលោក រ៉េន រ៉ាន ឲ្យដឹងថា បច្ចុប្បន្នលោកមានការងារមួយជាសន្តិសុខយាមគ្រឹះស្ថានមីក្រូហិរញ្ញវត្ថុ អេ.អឹម.ខេ (AMK) ហើយលោកមានបំណងរៀនបន្តនៅវិទ្យាស្ថានមួយឈ្មោះ ប្រាយថ៍ ហូប (Bright Hope) ដែលមានទីតាំងនៅក្នុងខេត្តកំពង់ឆ្នាំង។ ការសម្រេចបែបនេះ គឺដើម្បីឲ្យលោកមានឱកាសយាមឲ្យគ្រឹះស្ថានពីថ្ងៃច័ន្ទ ដល់ថ្ងៃសុក្រ ហើយរៀននៅថ្ងៃសៅរ៍ អាទិត្យ។
លោក រ៉ាន បន្តថា បច្ចុប្បន្នមានម្ដាយលក់ចាប់ហួយដែលអាចផ្ដល់ប្រាក់ខ្លះផ្សំនឹងប្រាក់ខែលោក យកទៅបង់ថ្លៃសាលាបណ្ដោះអាសន្នបាន៖ «ខ្ញុំបារម្ភតិចតួចដែរ (ថវិកាផ្គត់ផ្គង់ការសិក្សា) ដោយសារថា មិនដឹងទៅមុខទៀតខ្ញុំអាចមានថវិការៀនបន្តទៀត ឬអត់?»។
ផ្ទុយស្រឡះពីយុវវ័យ រ៉េន រ៉ាន និង ប៊ុត ជុំសុភ័ក្រ ដែលទើបប្រឡងបាក់ឌុប ជាប់តែគ្មានលទ្ធភាពគ្រប់គ្រាន់ក្នុងការសិក្សាបន្តនៅសាលាល្អៗ ឬមានអ្នកទំនុកបម្រុងផ្នែកថវិកានោះ កញ្ញា ឡុច ចិន្ដាវីន ជាបេក្ខជនប្រឡងជាប់និទ្ទេស អី (E) មកពីវិទ្យាល័យព្រះបាទ សុរាម្រិត ថ្លែងទាំងត្រេកអរថា កញ្ញានឹងចាប់យកជំនាញសេដ្ឋកិច្ច ហើយកញ្ញា និងគ្រួសារកំពុងពិភាក្សាគ្នាថា នឹងទៅរៀននៅសាលាណា៖ «ឲ្យតែប្រឡងជាប់សប្បាយចិត្តហើយ! ខ្ញុំចង់រៀនផ្នែកសេដ្ឋកិច្ច ព្រោះខ្ញុំចង់អាហ្នឹង។ គ្រួសារមិនសូវមានមុខរបរធំដុំប៉ុន្មានទេ តែគាត់មានលទ្ធភាពឲ្យខ្ញុំរៀនបន្ត»។
ប្រធានអង្គការកម្មវិធីអភិវឌ្ឍន៍ធនធានយុវជន (YRDP) លោក ជាង សុខា ថ្លែងថា បេក្ខជនប្រឡងជាប់ ឬបញ្ចប់ថ្នាក់ឧត្ដមសិក្សា គឺមានឱកាសទទួលបានការងារត្រូវជំនាញប្រមាណ ២០ភាគរយប៉ុណ្ណោះ។ លោកថា នៅក្នុងរបត់នៃសមាហរណកម្មអាស៊ាន កម្ពុជាអាចក្លាយជាប្រទេសមួយសម្បូរការងារដែរ ហើយយុវវ័យដែលទទួលបានការបណ្ដុះបណ្ដាលជំនាញខ្លីៗ អាចនឹងមានឱកាសការងារច្រើនដែរ។
លោក ជាង សុខា បញ្ជាក់ថា បច្ចុប្បន្នក្រសួងការងារមានគេហទំព័រមួយផ្សព្វផ្សាយពីឱកាសការងារ តែការផ្សព្វផ្សាយនោះនៅមានកម្រិត ខណៈយុវវ័យនៅជនបទមិនអាចប្រើបច្ចេកវិទ្យាទំនើប៖ «កន្លែងនេះខ្ញុំគិតថា ជាចំណុចមួយដែលក្រសួងការងារ ឬរដ្ឋាភិបាលត្រូវយកចិត្តទុកដាក់ថែមទៀត ដើម្បីផ្សព្វផ្សាយព័ត៌មាននេះឲ្យបានទូលំទូលាយ ជាពិសេសយុវជននៅចុងកាត់មាត់ញក បើមិនដូច្នេះទេ ពួកគាត់នឹងក្លាយជាមនុស្សមួយដែលពុំមានព័ត៌មានអំពីការងារ ហើយប្រឈមកាន់តែខ្លាំងឡើងនៅពេលដំណើរការវិវត្តន៍ នៃបញ្ហាសមាហរណកម្មនេះមកដល់»។
នៅថ្ងៃប្រឡង និងពេលបិទផ្សាយលទ្ធផលប្រឡង នៅតាមមណ្ឌលនីមួយៗ មានភ្នាក់ងារផ្សព្វផ្សាយចុះចែកខិត្តប័ណ្ណដល់ក្រុមនិស្សិតជាប់ ឬធ្លាក់បាក់ឌុប អំពីការសិក្សានៅក្នុងសាកលវិទ្យាល័យ ឬវិទ្យាស្ថានរបស់ខ្លួន។ ស្របពេលគ្នានេះក៏មានក្រុមផ្សព្វផ្សាយឲ្យក្រុមហ៊ុនឯកជន ឬបណ្ដាញទីផ្សារលក់ផលិតផលដែលការងារបែបនេះតែងតែប្រើកម្លាំងមនុស្ស ឬចំណាយពេលច្រើនជាងប្រាក់ចំណូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។