សង្គម​ស៊ីវិល​ទាមទារ​ឲ្យ​រដ្ឋាភិបាល​ស៊ើប​អង្កេត​អំពើ​ហិង្សា​លើ​អតីត​អ្នក​បើកបរ​ឡាន​កាពីតូល

ដោយ ខែ សុណង
2016-02-07
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
តវ៉ា កាពីតូល ៨៥៥ ២០១៦
អតីត​អ្នក​បើក​បរ​រថយន្ត​របស់​ក្រុមហ៊ុន​កាពីតូល ម្នាក់​ដែល​រង​របួស​ក្នុង​ពេល​តវ៉ា ផ្ដល់​បទសម្ភាសន៍​ដល់​វិទ្យុ​អាស៊ីសេរី នៅ​ព្រឹក​ថ្ងៃ​ទី​៦ កុម្ភៈ ឆ្នាំ​២០១៦។
RFA/Sorn Chanratha

អង្គការ​មិន​មែន​រដ្ឋាភិបាល​ជាង ៣០​ស្ថាប័ន បាន​ថ្កោលទោស​ចំពោះ​អំពើ​ហិង្សា​លើ​អតីត​អ្នក​បើកបរ​រថយន្ត​ក្រុង​កាពីតូល (CAPITOL) ហើយ​អំពាវនាវ​ឲ្យ​មាន​ការ​ដោះ​លែង​ជន​រងគ្រោះ​ពីរ​នាក់ ដែល​អាជ្ញាធរ​ចាប់​ខ្លួន និង​ទាមទារ​ឲ្យ​មាន​ការ​ស៊ើប​អង្កេត​លើ​សំណុំ​រឿង​នេះ​ឲ្យ​បាន​ឆាប់​រហ័ស ប្រកប​ដោយ​តម្លាភាព និង​ឯករាជ្យ​ភាព។

សេចក្ដី​ថ្លែងការណ៍​រួម​ដែល​មាន​ស្ថាប័ន​ជាង ៣០ ដូចជា សហគមន៍​ដីធ្លី សហព័ន្ធ​សហជីព​កម្មករ អង្គការ​សមាគម សហភាព​សហជីព​កម្ពុជា បណ្ដាញ​កម្មករ បណ្ដាញ​យុវជន និង​បណ្ដាញ​ព្រះសង្ឃ ចេញ​ផ្សាយ​នៅ​ថ្ងៃ​ទី​៦ ខែ​កុម្ភៈ បាន​ថ្កោលទោស​ចំពោះ​អំពើ​ហិង្សា​កាល​ពី​ព្រឹក​ថ្ងៃ​សៅរ៍ ទី​៦ កុម្ភៈ ថា​បាន​ប្រព្រឹត្ត​ឡើង​ដោយ​សមាជិក​សមាគម​រួប​រួម​គ្នា​ដើម្បី​អភិវឌ្ឍន៍​កម្ពុជា ហៅ​កាត់​ថា ស៊ី.ស៊ី.ឌី.អេ (CCDA) ទៅ​លើ​អតីត​អ្នក​បើកបរ​រថយន្ត​ក្រុង និង​អ្នក​គាំទ្រ​អ្នក​បើកបរ​ក្នុង​ពេល​តវ៉ា​ឲ្យ​ថៅកែ​ក្រុមហ៊ុន យក​ពួក​គេ​ចូល​ធ្វើ​ការ​វិញ។ សេចក្ដី​ថ្លែងការណ៍​នេះ បាន​ទាមទារ​ឲ្យ​មាន​ការ​ដោះ​លែង​បុរស​ពីរ​នាក់ ដែល​អាជ្ញាធរ​ចាប់​ខ្លួន ហើយ​បើក​ការ​ស៊ើប​អង្កេត​លើ​ករណី​ហិង្សា​នេះ។

ទាក់ទង​ទៅ​នឹង​ការ​ឃាត់​ខ្លួន​អ្នក​ទាំង​ពីរ​នាក់​នេះ អតីត​អ្នក​បើកបរ​រថយន្ត​ក្រុង​កាពីតូល គ្រោង​នាំ​គ្នា​តវ៉ា​ទាមទារ​ឲ្យ​តុលាការ​រាជធានី​ភ្នំពេញ ដោះ​លែង​នៅ​ថ្ងៃ​ទី​៨ កុម្ភៈ។

សេចក្ដី​ថ្លែងការណ៍​ដដែល បាន​សម្ដែង​ការ​សោកស្ដាយ​ចំពោះ​នគរបាល ដែល​មិន​បាន​ឆ្លើយ​តប​ឲ្យ​បាន​គ្រប់គ្រាន់ ដើម្បី​បញ្ចៀស​អំពើ​ហិង្សា​ដែល​ក្រុម​បាតុករ​បាន​ប្រើ​ញញួរ និង​ដំបង​ដែក​វាយ​ដំ​អតីត​អ្នក​បើកបរ​រថយន្ត​ក្រុង និង​អ្នក​គាំទ្រ​ក៏ដោយ។ ហិង្សា​នេះ បាន​បណ្ដាល​ឲ្យ​មនុស្ស​ចំនួន ១៤​នាក់​រង​របួស រួម​មាន​អតីត​អ្នក​បើកបរ​រថយន្ត​ក្រុង និង​អ្នក​គាំទ្រ​ជាច្រើន​នាក់ អ្នក​ឃ្លាំ​មើល​សិទ្ធិ​មនុស្ស​ម្នាក់ និង​មន្ត្រី​នគរបាល​ម្នាក់ ដែល​ពួក​គេ​ខ្លះ​បាន​របួស​បាក់​ដៃ និង​ច្រើន​នាក់​ផ្សេង​ទៀត រង​របួស​មុខ និង​ក្បាល។

អតីត​អ្នក​បើកបរ​រថយន្ត​ឲ្យ​ក្រុមហ៊ុន​រថយន្ត​ក្រុង​កាពីតូល ជាង ៤០​នាក់ និង​មន្ត្រី​សហជីព​ស៊ីខៅឌូ (CCAWDU) រួម​ទាំង​មន្ត្រី​សមាគម​កម្មករ និង​សេដ្ឋកិច្ច​ក្រៅ​ប្រព័ន្ធ​កម្ពុជា នៅ​ព្រឹក​ថ្ងៃ​ទី​៦ កុម្ភៈ បាន​នាំ​គ្នា​បន្ត​ការ​តវ៉ា​របស់​ខ្លួន​នៅ​ខាង​មុខ​ក្រុមហ៊ុន ជិត​ផ្សារ​អូរឫស្សី ក្នុង​សង្កាត់​បឹងព្រលិត ខណ្ឌ​៧មករា ដោយ​ឈរ​កាន់​បដា រារាំង​រថយន្ត​ដឹក​ភ្ញៀវ និង​ស្រែក​អំពាវនាវ​ដល់​សាធារណជន ឲ្យ​ផ្អាក​ប្រើប្រាស់​សេវា​ឡាន​ក្រុង​របស់​ក្រុមហ៊ុន​កាពីតូល។

អតីត​អ្នក​បើកបរ​រថយន្ត​ក្រុង​កាពីតូល បាន​តវ៉ា​ប្រមាណ ២​ខែ​មក​ហើយ បន្ទាប់​ពី​ថៅកែ​បញ្ឈប់​អ្នក​បើកបរ​រថយន្ត​ក្រុង ៤៥​នាក់ ដោយសារ​ពួក​គេ​បង្កើត​សហជីព និង​ចោទ​ពី​បទ​រំលោភ​កិច្ចសន្យា​ការងារ​ជាមួយ​ក្រុមហ៊ុន រំលោភ​បទបញ្ជា​ផ្ទៃ​ក្នុង​ដែល​បាន​លួច​កិបកេង​ទ្រព្យ​សម្បត្តិ​ក្រុមហ៊ុន និង​រំលោភ​ច្បាប់​ការងារ។ ក្រោយ​ពី​មាន​ការ​ស្នើសុំ​ពី​សាលា​រាជធានី​ភ្នំពេញ ឲ្យ​ក្រុមហ៊ុន​នេះ​ពិចារណា​ទទួល​យក​អ្នក​ទាំង​នោះ​វិញ ក្រុម​អ្នក​តវ៉ា​បាន​ផ្អាក​ជា​បណ្ដោះអាសន្ន កាល​ពី​ថ្ងៃ​ទី​២៦ ខែ​មករា ហើយ​បាន​ចាប់​ផ្ដើម​តវ៉ា​ជា​ថ្មី​កាល​ពី​ថ្ងៃ​ទី​១ កុម្ភៈ បន្ទាប់​ពី​ក្រុមហ៊ុន​បដិសេធ​មិន​ទទួល​ពួក​គេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល