ប្រធានគណៈកម្មការសហគមន៍ទឹកស្អាតព្រៃខ្មែរ ឃុំរលាប្អៀរ ខេត្តកំពង់ឆ្នាំង ប្រតិកម្មនឹងអាជ្ញាធរភូមិឃុំ បន្ទាប់ពីមិនទទួលខុសត្រូវលើការខូចខាតប្រព័ន្ធទុយោទឹកកប់ដី ដែលគ្រឿងចក្រអភិវឌ្ឍផ្លូវក្នុងភូមិធ្វើឲ្យដាច់ទុយោធ្លាយទឹកជាច្រើនកន្លែង ហើយព្រមានបិទគម្រោងទឹកស្អាតរបស់ខ្លួនទៀត ប៉ុន្តែអាជ្ញាធរបដិសេធថា ពុំមានគម្រោងបិទដំណើរការផ្គត់ផ្គង់ទឹកស្អាតនេះទេ។
អ្នកភូមិព្រៃខ្មែរ ឃុំរលាប្អៀរ និងភូមិអណ្ដូងជ្រៃ ឃុំអណ្ដូងស្នាយ ចំនួន ១៣៥គ្រួសារ លែងមានទឹកស្អាតប្រើប្រាស់ជាងកន្លះខែហើយ បន្ទាប់ពីគ្រឿងចក្រកាយដាច់ទុយោទឹក ហើយគណៈកម្មការទឹកស្អាត មិនជួសជុលប្រើឡើងវិញ ដោយរង់ចាំឲ្យអាជ្ញាធរទទួលខុសត្រូវ។ ប្រធានគណៈកម្មការថាបានចំណាយលុយជាង ៦០ម៉ឺនរៀល ជួសជុលម្ដងហើយ ប៉ុន្តែគ្រឿងចក្រធ្វើឲ្យបែកទុយោម្ដងទៀត។
ប្រធានគណៈកម្មការសហគមន៍ទឹកស្អាតភូមិព្រៃខ្មែរ លោក សោម ស៊ីណៃ ថាមេឃុំរលាប្អៀរ លោក ពៅ ឈឿន មិនឲ្យអ្នកធ្វើផ្លូវ ឬលោកផ្ទាល់ក្នុងនាមជាអាជ្ញាធរឃុំទទួលខុសត្រូវលើការខូចខាតទេ បែរជាស្នើឲ្យតំណាងមន្ទីរអភិវឌ្ឍន៍ជនបទ បិទគម្រោងនេះទៀត។ លោកមិនជំទាស់នឹងមេឃុំឡើយ ប៉ុន្តែអាជ្ញាធរត្រូវដោះស្រាយលុយចំនួន ៧លានរៀល ដែលនៅជំពាក់គេថ្លៃទិញទុយោរួចសិន៖ « បើសិន គាត់មិនជួសជុល ឬបញ្ចប់ ខ្ញុំសំណូមពរដល់អាជ្ញាធរដែនដី មេភូមិ មេឃុំ ហើយ ក្រុមប្រឹក្សាឃុំ ទាំងអស់ជួយដោះស្រាយនូវ ការខូចខាត បែកបាក់នេះឲ្យខ្ញុំផង ខ្ញុំគ្មានលុយទេ ប្រមូលមួយខែៗគ្រាន់តែបង់អង្គការ ( គ្រឹះស្ថានមីក្រូហិរញ្ញវត្ថុ ) និង បង់ថ្លៃ ភ្លើង អស់ហើយ អត់មានសល់លុយទេ។ ខ្ញុំ មិនជំទាស់ អីទេ តែ ថាបើ អភិវឌ្ឍផ្លូវឲ្យបានទឹកផង កុំឲ្យប្រជាពលរដ្ឋអត់ មានទឹក ប្រើ។ សម្ដេចមានប្រសាសន៍ហើយថា មានទឹក មានផ្លូវ មានភ្លើង បីហ្នឹងចំណុច សំខាន់បំផុត »។
លោក សោម ស៊ីណៃ រំលឹកថា លោកបានខ្ចីលុយអង្គការចំនួន ១៥លានរៀល ទិញទុយោ និងជួលកម្មករកប់ទុយោក្នុងដី ក្រោយពីអង្គការលោកខាងកើតជួបលោកខាងលិច (EMW) ប្រគល់អាងចម្រោះទឹកស្អាតមួយនៅក្បែរបឹងឈ្វាំង ឲ្យគណៈកម្មការសហគមន៍គ្រប់គ្រងកាលពី ២ឆ្នាំមុន។ លោកថា ចំណូលក្នុងមួយខែបានចន្លោះពី ១លានទៅ ១លាន ៥០ម៉ឺនរៀល ប៉ុន្តែចំណាយថ្លៃភ្លើង និងកម្លាំងពលកម្មវិញក៏ច្រើនដែរ ទើបមិនទាន់រួចថ្លៃដើម។
ឆ្លើយតបបញ្ហានេះ មេភូមិព្រៃខ្មែរ លោក ហុក សារុន បដិសេធថា អាជ្ញាធរមិនបានបិទគម្រោងនេះទេ ព្រោះពលរដ្ឋនៅក្នុងភូមិត្រូវការទឹកប្រើប្រាស់ជាចាំបាច់ ប៉ុន្តែការអភិវឌ្ឍផ្លូវបានប៉ះដល់ទុយោទឹកធ្លាយ ដែលទាមទារឲ្យមានការជួសជុលឡើងវិញ ទើបប្រើបាន។ ចំណែកមេឃុំរលាប្អៀរ លោក ពៅ ឈឿន ថាលោកកំពុងជាប់ប្រជុំរង់ចាំ ២០នាទីទៀត ចាំសួររឿងនេះ ប៉ុន្តែក្រោយមក ទូរស័ព្ទមិនចូល។
អ្នកភូមិម្នាក់ដែលប្រើទឹកស្អាតរបស់សហគមន៍ លោកស្រី ខេន សុខន មានប្រសាសន៍ថា ភ្លៀងពីរមេធំៗធ្វើឲ្យគ្រួសារលោកស្រី និងអ្នកភូមិផ្សេងទៀតសល់ទឹកក្នុងពាងគ្រាន់បានប្រើប្រាស់ជំនួសទឹកស្អាតបណ្ដោះអាសន្ន ប៉ុន្តែទៅថ្ងៃមុខ បើគ្មានទឹកភ្លៀងមិនដឹងថាអ្នកភូមិដោះស្រាយយ៉ាងណានោះទេ។ លោកស្រីស្នើឲ្យគណៈកម្មការ ឬអាជ្ញាធរដោះស្រាយបញ្ហានេះឲ្យបានឆាប់៖ « ប៉ុន្មាន ថ្ងៃនេះ បាន ទឹកភ្លៀង មកប្រើ ទឹកភ្លៀង ហ្នឹងទៅ បើសិន អត់ខ្ញុំពិបាក មិនពិបាកតែផ្ទះខ្ញុំទេ ព្រោះម្នាក់ៗ ត្រូវការទឹក ហ្នឹងហើយ ។ លោក ជិន ជេដ្ឋា៖ ធ្លាប់ប្រើ ទឹកស្អាត ហើយពី មុនអត់ ធ្លាប់ប្រើ ទឹកស្អាត ខុសគ្នាយ៉ាងម៉េច ដែរ ? លោកស្រី ខេន សុខន៖ ខុសប្លែក ឆ្ងាយដែរហ្នឹងណា។ ខានប្រើហ្នឹងដោយសារគេ មកឈូស ថ្នល់ដាច់ទុយោអត់ទាន់បានត ដាច់ទឹក អត់បានប្រើ »។
ក្រៅពីអាងចម្រោះទឹកស្អាតរបស់គណៈកម្មការសហគមន៍ផ្ដល់ដោយអង្គការអន្តរជាតិនេះ ក៏មានអាងចម្រោះទឹកស្អាតខ្នាតតូចមួយទៀតដែរនៅក្នុងភូមិព្រៃខ្មែរ ប៉ុន្តែនៅរដូវប្រាំងផ្គត់ផ្គង់មិនគ្រប់គ្រាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។