អង្គការសង្គមស៊ីវិលនៅខេត្តបន្ទាយមានជ័យ ព្រួយបារម្ភអំពីការកើនឡើងនៃជនជាតិចិនដីគោករាប់ពាន់នាក់រស់នៅក្រុងប៉ោយប៉ែត ដែលអាចបង្កអសន្តិសុខសង្គមនៅថ្ងៃខាងមុខបាន។ ក្ដីបារម្ភនេះ ដោយសារមានជនជាតិចិនកាន់តែច្រើនមកជួលបន្ទប់ស្នាក់នៅក្រុងប៉ោយប៉ែត ខណៈសមត្ថកិច្ចហាក់មានវិធានការទប់ស្កាត់ធូររលុងនៅឡើយ។ អធិការរងនគរបាលក្រុងប៉ោយប៉ែត ទទួលបន្ទុកអន្តោប្រវេសន៍បញ្ជាក់ថា ជនជាតិទាំងនោះ ពុំទាន់បង្កបញ្ហាណាមួយដល់ប្រជាពលរដ្ឋខ្មែរនៅឡើយ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍នៅថ្ងៃទី៣ ខែសីហា ថា បើទោះជាជនជាតិចិនដីគោក រស់នៅក្រុងប៉ោយប៉ែត មិនទាន់បង្កគ្រោះថ្នាក់ដល់ពលរដ្ឋខ្មែរក្ដី ក៏ប៉ុន្តែពួកគេភាគច្រើនប្រកបរបរខុសច្បាប់ ដូចជាបើកល្បែងតាមប្រព័ន្ធអ៊ីនធឺណិត (Internet) និងករណីចាប់ជំរិតជនជាតិចិន គ្នាឯងជាដើម។
លោកអះអាងថា បញ្ហាទាំងនេះ នឹងរាលដាលដល់ពលរដ្ឋខ្មែរជាពុំខាន ប្រសិនបើសមត្ថកិច្ចពាក់ព័ន្ធមិនចាត់វិធានឲ្យបានតឹងរ៉ឹងនោះ៖ «ព្រួយបារម្ភខ្លាចយកទីតាំងនៅកម្ពុជា ធ្វើជាបទល្មើសភេរវកម្មណាមួយទៅលើប្រទេសគេជិតខាង ឬក៏ប្រទេសនៅលើពិភពលោក ព្រោះប្រទេសកម្ពុជា យើងសាកសួរកម្មករអ្នកដែលធ្លាប់ឃើញផ្ទាល់នៅកន្លែងប៉ោយប៉ែតនោះ ក្នុងមួយនាទីក៏គេរកលុយតាមអ៊ីនធឺណិត បានរាប់ម៉ឺនរាប់ដុល្លារអាមេរិកដែរ»។
កាលពីថ្ងៃទី២ ខែសីហា អគ្គនាយករងនៃអគ្គនាយកដ្ឋានប៉ូលិសអន្តោប្រវេសន៍ចាប់ជនជាតិចិនដីគោក ចំនួន ២១៥នាក់ នៅក្បែរអូរព្រំដែនសង្កាត់ប៉ោយប៉ែត ក្រុងប៉ោយប៉ែត។ ក្នុងនោះស្រី ៣២នាក់ ពាក់ព័ន្ធនឹងការជំរិតទារប្រាក់តាមប្រព័ន្ធអ៊ីនធឺណិត។ ក្រោយមកសមត្ថកិច្ចបានបញ្ជូនពួកគេតាមរថយន្តក្រុងទៅខេត្តសៀមរាប ដើម្បីចាត់វិធានតាមផ្លូវច្បាប់បន្តទៀត។
ទាក់ទងនឹងបញ្ហានេះ អធិការរងនគរបាលក្រុងប៉ោយប៉ែត ទទួលបន្ទុកផ្នែកអន្តោប្រវេសន៍ លោក អេង លីហួ មានប្រសាសន៍ថា ការចាប់ជនជាតិចិនដីគោកដ៏ច្រើននេះ ធ្វើឡើងតាមការចង្អុលបង្ហាញរបស់សមត្ថកិច្ចចិន ពាក់ព័ន្ធការឆបោកតាមប្រព័ន្ធអ៊ីនធឺណិត ក្នុងចំណោមជនជាតិចិនគ្នាឯង៖ «អ្វីដែលខ្ញុំយកបានទើបតែក្នុងអំឡុងពេលនេះឯង ដែលភាពច្រើនគាត់រស់នៅស្របច្បាប់គាត់មានលិខិតឆ្លងដែនចូលមក ប៉ុន្តែយើងអត់ដឹងគាត់រកស៊ីត្រូវច្បាប់ ឬខុសច្បាប់ទេ។ ពួកគាត់ចូលតាមប្រលានយន្តហោះខេត្តសៀមរាប ភ្នំពេញ ក្រុងព្រះសីហនុ និងតាមព្រំដែនថៃ»។
លោកអះអាងទៀតថា ជនជាតិចិនដែលរស់នៅក្រុងប៉ោយប៉ែត ប្រកបរបរដូចជាបើកភោជនីយដ្ឋានជាបុគ្គលិកកាស៊ីណូ បុគ្គលិកតាមហាងលក់ទំនិញ និងធ្វើការងាររោងចក្រជាដើម។
មន្ត្រីសម្របសម្រួលអង្គការលីកាដូ (LICADHO) ខេត្តបន្ទាយមានជ័យ លោក ភុន ឈិន មានប្រសាសន៍ថា សមត្ថកិច្ចត្រូវរឹតបន្តឹងច្បាប់បន្ថែមទៀតទៅលើជនណាដែលរស់នៅក្នុងទឹកដីខ្មែរខុសច្បាប់ និងត្រូវចាត់វិធានការផ្លូវច្បាប់ ដើម្បីការពារសន្តិសុខនៅក្នុងសង្គម៖ «ខ្ញុំក៏សូមអំពាវនាវដល់ពលរដ្ឋដែលរស់នៅតំបន់ប៉ោយប៉ែត ធ្វើយ៉ាងណាសហការជាមួយសមត្ថកិច្ចឲ្យបានល្អ រាយការណ៍អំពីជនបរទេសទាំងឡាយណាដែលរស់នៅខុសច្បាប់ ដើម្បីឲ្យសមត្ថកិច្ចងាយស្រួលចាត់វិធានការបានទាន់ពេល»។
របាយការណ៍អធិការរងក្រុងប៉ោយប៉ែត ឲ្យដឹងថា នៅក្រុងប៉ោយប៉ែត មានជនបរទេសចំនួន ១៨ជាតិសាសន៍ មានដូចជាជនជាតិថៃ ឥណ្ឌូនេស៊ី ម៉ាឡេស៊ី វៀតណាម ឥណ្ឌា ចិន និងប្រទេសមួយចំនួនទៀតក្នុងសហគមន៍អឺរ៉ុប ជាដើម ទោះជាយ៉ាងណាពុំទាន់មានតួលេខបញ្ជាក់ថា មានប៉ុន្មាននាក់នៅឡើយទេ។ ប៉ុន្តែជនជាតិចិន រស់នៅច្រើនជាងគេ មានជាង ១ពាន់នាក់ បន្ទាប់មកជនជាតិថៃ និងវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។