រាជរដ្ឋាភិបាលនៅថ្ងៃទី៤ មេសា បានប្រតិកម្មលើអត្ថបទដែលចុះផ្សាយរបស់សារព័ត៌មាន ដែលសរសេរថា រាជរដ្ឋាភិបាលបានលក់សិទ្ធិប្រើប្រាស់ទង់ជាតិកម្ពុជា ទៅឲ្យកប៉ាល់ពាណិជ្ជកម្មបរទេស។ រដ្ឋាភិបាលបានអញ្ជើញអ្នកសារព័ត៌មានឲ្យមកស្ដាប់ការឆ្លើយតបនេះ ដើម្បីឲ្យយល់ពីការពិត និងណែនាំចំពោះការរាយការណ៍ព័ត៌មានណាមួយ ដែលប្រាសចាកវិជ្ជាជីវៈ និងវាយប្រហាររដ្ឋាភិបាល។
ទីស្ដីការគណៈរដ្ឋមន្ត្រីបានបកស្រាយអត្ថបទសារព័ត៌មានមួយចំនួន រួមទាំងវិទ្យុអាស៊ីសេរី ផង បានលក់សិទ្ធិនៃការចុះបញ្ជីកប៉ាល់ពាណិជ្ជកម្មបរទេសប្រើប្រាស់ទង់ជាតិកម្ពុជា នៅលំហសមុទ្រអន្តរជាតិដែលគណៈរដ្ឋមន្ត្រីគិតថា ជាអត្ថបទចោទប្រកាន់ ជាអត្ថបទប្រឌិតសុទ្ធសាធ និងការវាយប្រហាររដ្ឋាភិបាល។
អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃទី៤ មេសា ថា តួនាទីរបស់អ្នកសារព័ត៌មាន គឺផ្ដល់ព័ត៌មាន មិនមែនផ្ដល់អារម្មណ៍របស់អ្នកព័ត៌មានទៅកាន់មហាជននោះទេ។ អ្នកសារព័ត៌មាន មិនត្រូវរាយការណ៍ព័ត៌មានពីអ្វីដែលគ្រាន់តែឮ ឬអ្នកដទៃនិយាយនោះទេ។
លោក ផៃ ស៊ីផាន បានអះអាងថា ការអញ្ជើញស្ថាប័នសារព័ត៌មានឲ្យមកស្ដាប់ការបកស្រាយនោះ មិនមែនជាការព្រមាន ឬបំភិតបំភ័យធ្វើឲ្យបាត់បង់សិទ្ធិសេរីភាពក្នុងការបញ្ចេញមតិនោះទេ។ គោលបំណងនោះ គឺចង់ឲ្យការរាយការណ៍នោះ ជៀសវាងការប្រើប្រាស់ពាក្យឲ្យសាធារណៈយល់ច្រឡំ ជាដើម៖ «សេចក្ដីបកស្រាយដែលចោទថា រាជរដ្ឋាភិបាលបានលក់សិទ្ធិនៃការចុះបញ្ជីកប៉ាល់ពាណិជ្ជកម្ម ដែលនេះជាការសោកស្ដាយមួយ ដែលអ្នកសារព័ត៌មានបានប្រើប្រាស់ បំពានទៅលើអ្វីដែលជាវិជ្ជាជីវៈ ហើយនិងក្រមសីលធម៌ដែលយើងថា យើងប្រឌិតពាក្យហ្នឹង ឬអាចធ្វើឲ្យគេយល់ច្រឡំ ឬបំណងរបស់យើងប្រឈមនឹងជម្លោះជាមួយរាជរដ្ឋាភិបាល»។
លោក ផៃ ស៊ីផាន បានលើកហេតុផលថា ប្រទេសកម្ពុជា ខ្វះខាតធនធានមនុស្សដែលមានជំនាញលើកិច្ចការចុះបញ្ជីកប៉ាល់បរទេស ទើបស្វែងរកដៃគូអនុវត្តន៍កិច្ចការចុះបញ្ជីកប៉ាល់បរទេស ដោតទង់ជាតិកម្ពុជា។
ប្រធានក្រុមកិច្ចការត្រួតពិនិត្យការអនុវត្តសេចក្ដីព្រមព្រៀងរបស់ក្រុមហ៊ុននាវាចរណ៍ លោក សេង លំនៅ មានប្រសាសន៍ថា រដ្ឋាភិបាលកម្ពុជា បានអនុញ្ញាតឲ្យក្រុមហ៊ុនទទួលកិច្ចការលើការចុះបញ្ជីពាណិជ្ជកម្មបរទេសនានា ឲ្យប្រើប្រាស់ទង់ជាតិកម្ពុជា លើលំហសមុទ្រអន្តរជាតិនោះ គឺឈ្មោះ ភ្នាក់ងារប្រតិបត្តិការពិសេស (Special Operation Agencies)។ ភ្នាក់ងារនេះ បានដំណើរការចាប់តាំងពីឆ្នាំ១៩៩៣ រហូតដល់ឆ្នាំ២០០១ ដែលមានកប៉ាល់បរទេសដែលបានចុះបញ្ជីចំនួន ២.៥០០កប៉ាល់ ប៉ុន្តែនៅក្នុងឆ្នាំ២០០២ បានថយចុះមកត្រឹម ៩២៧ប៉ុណ្ណោះ។
ទោះជាយ៉ាងណាក៏ដោយ លោកបញ្ជាក់ថា ក្រុមហ៊ុនសាជីវកម្មនាវាកម្ពុជា (Cambodian Ship Cooperation) ដែលមានទីស្នាក់ការនៅប្រទេសសិង្ហបុរី បានដួលរំលំទៅវិញ ដោយសារតែជួបបញ្ហាមួយចំនួនទាក់ទងការដឹកទំនិញខុសច្បាប់ និងការលួចប្លន់ ជាដើម កាលពីឆ្នាំ២០០២៖ «ដោយសារតែមានបញ្ហាច្រើនប៉ះពាល់ដល់រដ្ឋ មានការដឹកជញ្ជូនអាភៀន គ្រឿងញៀន សមាជិកនាវាដែលមានដោតទង់ជាតិរបស់កម្ពុជា ទៅប្លន់នាវារបស់ប្រទេសផ្សេង មានដឹកមីសស៊ីល»។
របាយការណ៍របស់គណៈកម្មការអន្តរក្រសួងលើកិច្ចការចុះបញ្ជីនាវាបរទេស បានបង្ហាញថា ចាប់តាំងពីឆ្នាំ២០០២ រហូតដល់បច្ចុប្បន្ន រាជរដ្ឋាភិបាលបានរៀបចំអាជ្ញាធរមួយដែលចូលរួមពីអន្តរក្រសួង និងទីស្ដីការគណៈរដ្ឋមន្ត្រី ដើម្បីគ្រប់គ្រងលើការអនុញ្ញាតការចុះបញ្ជីកប៉ាល់បរទេស ប្រើប្រាស់ទង់ជាតិកម្ពុជា ដោយជ្រើសរើសដៃគូរបស់រាជរដ្ឋាភិបាល អនុវត្តកិច្ចការទាំងនេះឡើងវិញ។ ប៉ុន្តែ ក្រុមហ៊ុនដៃគូនោះ ត្រូវមានលក្ខខណ្ឌមួយចំនួន ដូចជា គុណសម្បត្តិ ឬសមត្ថភាព ឯកទេស វិជ្ជាជីវៈ ក្រមសីលធម៌ និងស្ថិរភាពហិរញ្ញវត្ថុ។
រាជរដ្ឋាភិបាលបានបង្កើតអាជ្ញាធរមួយដែលហៅថា ការចុះបញ្ជីនាវាបរទេសរបស់ប្រទេសកម្ពុជា ដែលហៅកាត់ថា អាយរ៉ុក (ISROC) ដែលចាប់ផ្ដើមប្រតិបត្តិការនៅឆ្នាំ២០០៣ ដែលមានចំនួនកប៉ាល់បរទេសបានចុះបញ្ជី ៩២៧កប៉ាល់ ដែលមានសិទ្ធិប្រើប្រាស់ទង់ជាតិកម្ពុជា។ លោកបញ្ជាក់ថា គិតត្រឹមឆ្នាំ២០១៣ មានចំនួនកប៉ាល់បរទេសដែលបានចុះបញ្ជីបានកើនឡើងរហូតដល់ ១៥៦០។ ប៉ុន្តែបច្ចុប្បន្ន មានកប៉ាល់ប្រមាណ ៥៥០គ្រឿងប៉ុណ្ណោះ ដែលមានសិទ្ធិប្រើប្រាស់ទង់ជាតិកម្ពុជា នៅលើលំហអន្តរជាតិ។ នៅក្នុងឆ្នាំ២០១៤ កប៉ាល់បានថយចុះមកត្រឹមចំនួន ៥៤៩កប៉ាល់ប៉ុណ្ណោះ។
បច្ចុប្បន្ន រាជរដ្ឋាភិបាលកម្ពុជា បានជ្រើសរើសក្រុមហ៊ុនដៃគូចុះបញ្ជីកប៉ាល់បរទេស គឺឈ្មោះថា កូស្មូស (Cosmos) ដែលជាក្រុមហ៊ុនរបស់ប្រទេសកូរ៉េខាងត្បូង។ ក្រុមហ៊ុននេះរកចំណូលបាន ៦លានដុល្លារអាមេរិកនៅចន្លោះឆ្នាំ២០០៣ ដល់ឆ្នាំ២០១៣។ ទីស្ដីការគណៈរដ្ឋមន្ត្រីបានគូសបញ្ជាក់ថា ក្រុមហ៊ុននេះជាក្រុមហ៊ុនដៃគូរបស់រាជរដ្ឋាភិបាលកម្ពុជា លើកិច្ចការចុះបញ្ជីកប៉ាល់បរទេស មិនមែនជាក្រុមហ៊ុនដែលរាជរដ្ឋាភិបាលកម្ពុជា បានលក់សិទ្ធិឲ្យដូចដែលសារព័ត៌មានបានសរសេរនោះទេ។
ប៉ុន្តែ នាយកវិទ្យាស្ថានកម្ពុជា សម្រាប់ការសិក្សាសារព័ត៌មាន (វ.ក.ស.ស) លោក មឿន ឈានណារិទ្ធ មានប្រសាសន៍ថា នៅក្នុងប្រទេសដែលមានលទ្ធិប្រជាធិបតេយ្យមិនពេញលេញ រដ្ឋាភិបាលតែងលូកដៃចូលកិច្ចការលើស្ថាប័នសារព័ត៌មានណាដែលឯករាជ្យ ដើម្បីកាត់បន្ថយការរាយការណ៍ព័ត៌មានដែលមានភាពចម្រូងចម្រាសរបស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។