កម្មករសំណង់ ស្នើឲ្យរដ្ឋាភិបាលជួយយកចិត្តទុកដាក់លើបញ្ហាសុខភាព សុវត្ថិភាព និងផ្ដល់កិច្ចគាំពារសង្គមសម្រាប់ពួកគេ។ ការស្នើសុំនេះ បន្ទាប់ពីមើលឃើញថា រដ្ឋាភិបាលកំពុងយកចិត្ត ទុកដាក់លើកម្មករក្នុងវិស័យវាយនភណ្ឌ និងកាត់ដេរសំលៀកបំពាក់។
ឧស្សាហកម្មការងារសំណង់ បានទាក់ទាញអ្នកធ្វើការទាំងប្រុសទាំងស្រី គ្រប់វ័យមកពីគ្រប់ទិសទី បន្ទាប់ពីការងាររោងចក្រ។ កម្មករក្នុងវិស័យនេះ ត្អូញត្អែរថា ពួកគេប្រឈមនឹងលក្ខខណ្ឌការងារដ៏ អាក្រក់ និងសុវត្ថិភាពដ៏ផុយស្រួល ប៉ុន្តែមិនទាន់ឃើញរដ្ឋាភិបាល ឬស្ថាប័នពាក់ព័ន្ធយកចិត្តទុកដាក់ ដូចកម្មករក្នុងវិស័យរោងចក្រឡើយ។
កំពុងរៀបឥដ្ឋនៅក្នុងបុរីមួយក្នុងទីក្រុងភ្នំពេញ សម្បុរខ្មៅសក់រួញលោក ប្រុស រៀបរាប់ថា លោក មកពីខេត្តកំពត ហើយបានធ្វើការងារសំណងជាង ២០ឆ្នាំមកហើយ។ មានវ័យប្រហែលជិត ៤០ឆ្នាំ លោកថា ទោះបីជាលោកខំតស៊ូធ្វើការងារនេះយូរឆ្នាំក្ដី ប៉ុន្តែមិនទាន់មានជីវភាពសមរម្យនៅឡើយ។ លោកចង់ឲ្យរដ្ឋាភិបាល ជួយយកចិត្តទុកដាក់ ចំពោះកម្មករសំណងដូចកម្មកររោងចក្រដែរ៖« ការងារសំណង់លំបាកខ្លាំងណាស់ឥឡូវ កម្រៃបានចូលតិចតូច។ យើងម៉ៅការអ៊ីចឹងជួនកាលបានចំណេញតិចតួច ឬក៏ចូលដើមអ៊ីចឹងទៅ។ ខ្ញុំចង់អោយសម្ដេចជួយដែរ ជួយចុះមកជួបជាមួយកម្មករសំណង់ ដើម្បីជួយរៀបចំការងារសំណង់អោយមានប្រាក់ខែសមរម្យ ដើម្បីកុំឲ្យចំណាកស្រុកទៅប្រទេសគេ » ។
កម្មករសំណង់នៅទូទាំងប្រទេស ត្រូវបានគេប៉ាន់ស្មានថា មានចាប់ពី ១៩ម៉ឺន ទៅ ២០ម៉ឺននាក់ក្នុងនោះ ៣០ភាគរយជាស្ត្រី។
ចំណែកកម្មករសំណង់ម្នាក់ទៀត ឈ្មោះ ធូ កំពុងលីបាវខ្សាច់ និងស៊ីម៉ងត៍ បាននិយាយថា មានបទពិសោធន៍ធ្វើសំណង់នៅតាមផ្ទះល្វែងផង ខុនដូ (Condo) ផង គឺហត់នឿយ និងប្រឈមគ្រោះថ្នាក់ខ្លាំងណាស់ ហើយទទួលបានប្រាក់ឈ្នួលទាប និងគ្មានអ្នកទទួលខុសត្រូវចំពោះសុវត្ថិភាពរបស់កម្មករឡើយ។ ក្នុង១ថ្ងៃ ធ្វើការ៨ម៉ោងដោយទទួលបានប្រាក់ឈ្នួល កន្លែងខ្លះ មិនបាន ៣ម៉ឺនរៀលឡើយ។ ប្រាក់ឈ្នួលនេះ លោកថា មិនអាចទ្រទ្រង់សម្រាប់ការចំណាយលើការហូបចុក ថ្លៃទឹកភ្លើង និងថ្លៃឈ្នួលផ្ទះជួលបានទេ ៖ « គួរតែរដ្ឋាភិបាលគិតដែរដល់កម្មករសំណង់ ព្រោះអីកម្មករសំណង់គ្នាធ្វើទៅ បានចំណូលតិចហើយ គ្រោះថ្នាក់ច្រើនទៀត។សូមជួយដំឡើងតម្លៃការងារឲ្យបានគួរសមផង ប្រហែលចាប់ពី ១០ដុល្លារទៅគឺល្អ » ។
នៅមុនការបោះឆ្នោតមកដល់លោកនាយករដ្ឋមន្ត្រី ហ៊ុន សែន បានបើកយុទ្ធនាការចុះជួបកម្មករតាមរោងចក្រជាបន្តបន្ទាប់ ចាប់តាំងពីខែសីហាមក។ លោកនាយករដ្ឋមន្ត្រី ហ៊ុន សែន តែងប្រកាសថា ចាប់ពីខែមករា ឆ្នាំ២០១៨ ទៅ ថៅកែក្រុមហ៊ុនត្រូវទទួលខុសត្រូវបង់ថ្លៃសេវាគាំពារសុខភាពកម្មករ ១០០ភាគរយ រីឯចាប់ពីឆ្នាំ២០១៩ កម្មករកម្មការិនីនឹងទទួលបានប្រាក់ចូលនិវត្តន៍ដូចមន្ត្រីរាជការដែរ។ លោកក៏បានសន្យាទៀតថា នឹងដំឡើងប្រាក់ឈ្នួលកម្មកររោងចក្រឲ្យបានដល់ ១៦៨ដុល្លារក្នុងមួយខែនៅឆ្នាំ២០១៨។ ក្រៅពីនេះ កម្មការិនីអាចជិះរថយន្តក្រុងសាធារណៈពីរឆ្នាំដោយឥតគិតថ្លៃ ចាប់ពីខែសីហា ឆ្នាំ២០១៧ ដល់ខែសីហា ឆ្នាំ២០១៩ ដោយគ្រាន់តែបង្ហាញប័ណ្ណការងារ និងអំពាវនាវឲ្យបញ្ចុះតម្លៃទឹកភ្លើងនៅតាមផ្ទះជួលកម្មករ។
ថ្វីត្បិតតែការសន្យារបស់លោក ហ៊ុន សែន បានផលខ្លះ និងមិនទាន់បានផលខ្លះក្ដី ប៉ុន្តែលោកហាក់យកចិត្តទុកដាក់តែលើកម្មកររោងចក្រប៉ុណ្ណោះ ចំណែកកម្មករក្នុងវិស័យផ្សេងៗទៀតមិនត្រូវបានអើពើឡើយ។
កំពុងលាយស៊ីម៉ងត៍បែកញើសជោគអាវ លោកស្រី កែវ ណាគ្រី បានធ្វើការងារសំណង់ជាមួយប្ដីជាង ៣ ឆ្នាំហើយ។ មានវ័យជាង ៤០ឆ្នាំ លោកស្រី រៀបរាប់ថា មកដល់ពេលនេះ មិនទាន់ឃើញលោកនាយករដ្ឋមន្ត្រី ចុះជួបកម្មករសំណង់ ដូចកម្មកររោងចក្រឡើយ។ ស្ត្រីកម្មករសំណង់រូបនេះ ចង់ឲ្យរដ្ឋាភិបាល យកចិត្តទុកដាក់លើកម្មករគ្រប់វិស័យទាំងអស់៖ « ខ្ញុំធ្វើខាងជ្រីក៏បាន បូកក៏បាន លាយក៏បាន តាមមេខ្ញុំត្រូវការហើយមួយថ្ងៃ ខ្ញុំទទួលបាន ២ម៉ឺន៥ពាន់រៀល។ ការងារសំណង់មិនស្រណុកទេ។ មិនដែលបានឃើញសម្ដេចចុះមកទេ សូមសម្តេចចុះមកមើលកម្មករសំណងផង ព្រោះពួកខ្ញុំហត់ណាស់។ បើមិនហត់មិនបានលុយដែរ » ។
កម្មករសំណង់ រៀបរាប់ប្រហាក់ប្រហែលគ្នាថា សុវត្ថិភាពការងារ បញ្ហាសុខភាព ប្រាក់ឈ្នួលទាប និងគ្មានការផ្ដល់កិច្ចគាំពារសង្គមផ្សេងៗ គឺជាបញ្ហាចម្បង ដែលក្រុមកម្មករសំណង់ចង់ឲ្យរដ្ឋាភិបាល ឬស្ថាប័នពាក់ព័ន្ធជួយគិតគួរដោះស្រាយ។
អគ្គលេខាធិការសហព័ន្ធសហជីពកម្មករសំណង់ និងព្រៃឈើ លោក យ៉ាន់ ធី លើកឡើងថា ខាង សហព័ន្ធរបស់លោកបានដាក់លិខិតទៅខុទ្ទកាល័យលោកនាយរដ្ឋមន្ត្រី ហ៊ុន សែន ដែរ កាលពីខែសីហា។ លិខិតនោះ ស្នើសុំឲ្យលោក ហ៊ុន សែន ចុះជួបពិនិត្យមើលស្ថានភាពរបស់កម្មករសំណង់ជាក់ស្ដែង បន្ទាប់ពីឃើញលោក ហ៊ុន សែន បើកយុទ្ធនាការចុះជួបជាមួយកម្មកររោងចក្រ។ តែរហូតមក ដល់ពេលនេះ ពុំមានការឆ្លើយតប និងគ្មានការចុះជួបកម្មករសំណង់ឡើយ ដែលនាំឲ្យកម្មករសំណង់មានការអាក់អន់ចិត្ត ព្រោះពួកគេត្រូវរដ្ឋាភិបាលទុកចោល៖ «ប្រសិនបើរដ្ឋាភិបាល យកចិត្តទុកដាក់លើសុខទុក្ខនិងលក្ខខណ្ឌការងាររបស់កម្មករ គឺមិនមែនចុះជួបតែជាមួយកម្មករកាត់ដេរទេ គឺត្រូវចុះជួបជាមួយកម្មករទាំងអស់ ជាពិសេសចុះជួបជាមួយកម្មករពួកខ្ញុំថា តើជីវភាព លក្ខខណ្ឌការងារយ៉ាងម៉េច? ការរស់នៅវេទនា អត់មានប្រាក់ឈ្នួលគោល ។អ៊ីចឹងបើរដ្ឋាភិបាលយកចិត្តទុកដាក់ សូមជួយចុះទៅពិនិត្យមើលដោយផ្ទាល់ ដោយមិនចាំបាច់រៀបចំមុនដូចរាល់ថ្ងៃនេះ »។
លោក យ៉ាន់ ធី បន្តថា អ្វីដែលរដ្ឋាភិបាល កំពុងធ្វើបច្ចុប្បន្នជាមួយកម្មកររោងចក្រនេះ មិនមែនជា ការគិតគូរដល់សុខទុក្ខកម្មករពិតប្រាកដនោះទេ ពោលគឺមានចេតនាធ្វើដើម្បីគេងចំណេញនយោបាយ ឬទាក់ទាញសន្លឹកឆ្នោតពីកម្មកររោងចក្រ ដោយសារកម្មកររោងចក្រមានសំឡេងច្រើន ហើយ ធ្លាប់ត្រូវបានរដ្ឋាភិបាលរំលោភបំពានកន្លងមក។ លោកថា ប្រសិនបើលោកនាយករដ្ឋមន្ត្រី ហ៊ុន សែន យកចិត្តទុកដាក់លើកម្មករពិតប្រាកដនោះ គឺមិនមែនទើបតែធ្វើពេលនេះនោះទេ គឺត្រូវធ្វើយូរណាស់មកហើយៗក៏មិនត្រូវយកចិត្តទុកដាក់តែជាមួយកម្មកររោងចក្រដែរ គឺគាត់ត្រូវយកចិត្តទុកដាក់ផ្ដល់អត្ថប្រយោជន៍ដល់កម្មករគ្រប់វិស័យទាំងអស់៕