មន្ត្រីអត្រានុកូលដ្ឋានបានអះអាងថា ខ្លួនសារភាពចំពោះការទទួលប្រាក់ខ្លះពីប្រជាពលរដ្ឋមែន ប៉ុន្តែអ្នកស្រីថា ខ្លួនពុំបានទទួលប្រាក់ ៥ពាន់រៀលមួយច្បាប់ដូចការចោទប្រកាន់របស់ពលរដ្ឋខាងលើឡើយ។
ប្រជាពលរដ្ឋម្នាក់ឈ្មោះលោក សាន ហុកលីម រស់នៅភូមិព្រែកសណ្ដែក ឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង បានថ្លែងនៅថ្ងៃទី២៦ សីហា ថា រូបលោកត្រូវបានមន្ត្រីអត្រានុកូលដ្ឋានស្រុកស៊ីធរកណ្ដាល ឈ្មោះអ្នកស្រី វង់ ពៅ បានយកប្រាក់ចំនួន ១០.០០០រៀល នៅពេលដែលខ្លួនលោកទៅសុំចម្លងសំបុត្រកំណើតចំនួនពីរច្បាប់។
លោកថា ក្នុងនោះពេលដែលប្រជាពលរដ្ឋណាធ្វើច្រើនជាងពីរច្បាប់ឡើងទៅនោះ ពួកគេនឹងត្រូវបង់ប្រាក់ចំនួន ៤.០០០រៀលក្នុងមួយច្បាប់។ ជាងនេះទៅទៀត លោកថា មន្ត្រីអត្រានុកូលដ្ឋានរូបនេះ ថែមទាំងបានគំរាមប្រជាពលរដ្ឋថា បើនរណាមិនពេញចិត្តទេយកប្រាក់ ហើយប្រគល់សំបុត្រឲ្យខ្លួនវិញក៏បាន។
លោក សាន ហុកលីម៖ «គាត់ថាច្បាប់គេតម្រូវឲ្យយកប៉ុណ្ណឹង គេយកដូចគ្នាកន្លែងណាក៏គេយកអ៊ីចឹងដែរ ហើយមន្ត្រីអត្រានុកូលដ្ឋានគាត់និយាយអ៊ីចឹង ហើយគាត់ត្រូវការចាក់សាំងជិះទៅមកត្រូវចំណាយផ្សេងគាត់ត្រូវយកលុយអ៊ីចឹង ហើយគាត់មិនខ្លាចអ្នកណាទេទៅប្ដឹងឯណាទៅប្ដឹងទៅរឿងបោះអ្នកឯងទេ។ គាត់ប្រាប់ថា បើមិនសុខចិត្តទេទៅយកលុយវិញហើយឲ្យក្រដាសវិញមក គាត់អត់យកទេលុយ ៥ដុល្លារហ្នឹងមួយសន្លឹក ៥.០០០រៀលហ្នឹង គាត់អត់យកទេ វង់ ពៅ ហ្នឹង»។
ឆ្លើយតបទៅនឹងការចោទប្រកាន់នេះ មន្ត្រីអត្រានុកូលដ្ឋានស្រុកស៊ីធរកណ្ដាល អ្នកស្រី វង់ ពៅ មានប្រសាសន៍ទាំងអួលដើមក នៅថ្ងៃទី២៦ សីហា ថា កាលដែលពលរដ្ឋធ្វើការចម្លងសំបុត្រកំណើត កាលណោះ អ្នកស្រីថា ខ្លួនពិតជាបានប្រព្រឹត្តមែន។ ប៉ុន្តែអ្នកស្រីថា អ្នកស្រីមិនបានយកប្រាក់ច្រើនដូចការលើកឡើងខាងលើឡើយ ពោលគឺកាលណោះលិខិតចំនួន ៨ច្បាប់ អ្នកស្រីថា អ្នកស្រីទទួលបានប្រាក់ត្រឹមតែ ២០.០០០ម៉ឺនរៀលប៉ុណ្ណោះ។
អ្នកស្រីបន្តថា ចំនួនប្រាក់ ២ម៉ឺនរៀលនោះ ខ្លួនបានសុំពីពលរដ្ឋដើម្បីយកទៅទិញទឹកថ្នាំទុកប្រើប្រាស់ក្នុងការិយាល័យអត្រានុកូលដ្ឋាន ហើយប្រាក់ទាំងនោះនៅពុំបានយកទៅប្រើប្រាស់នៅឡើយ៖ «ខ្ញុំយកមែនតើ! បើខ្ញុំសំសារភាពចំពោះបងឯអ៊ីចឹងត្រង់។ ខ្ញុំថា ប្រុងទិញទឹកត្រា ដល់ឮថាអ៊ីចឹង ខ្ញុំទឹកត្រាក៏លែងទិញ លុយនៅហ្នឹងទៅ។ ឥឡូវអ៊ីចេះ ខ្ញុំថា ខ្ញុំសារភាពថាខ្ញុំមានកំហុសហើយ ខ្ញុំចាំមួយជីវិត ខ្ញុំចាំមួយជីវិត ខ្ញុំចាំ។ ខ្ញុំហ្នឹងកែកំហុសទាំងឡាយដែលខ្ញុំមានកំហុស»។
អ្នកស្រីបន្តថា កាលណោះសាមីខ្លួនបានព្រមព្រៀងផ្ដល់ប្រាក់ចំនួន ២ម៉ឺនរៀលខាងលើដើម្បីឲ្យដល់ការិយាល័យយកទៅទិញទឹកត្រាប្រើក្នុងអង្គភាព។ អ្នកស្រីថា ប្រសិនបើខ្លួនដឹងថា បញ្ហានេះក្លាយទៅជារឿងបែបនេះនោះ អ្នកស្រីនឹងពុំទទួលឡើយ។
ទោះយ៉ាងនេះក្ដី ប្រជាពលរដ្ឋបានទទូចទាមទារឲ្យអាជ្ញាធរដែលពាក់ព័ន្ធនឹងអំពើពុករលួយគ្រប់ជាន់ថ្នាក់ចុះត្រួតពិនិត្យចំពោះបញ្ហានេះ ដើម្បីការពារកុំឲ្យមន្ត្រីដទៃយកប្រាក់ពីប្រជាពលរដ្ឋក្នុងកម្ពុជា ដូចមន្ត្រីនេះទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។