ប្រជាពលរដ្ឋនៅស្រុកស្ទឹងត្រង់ ខេត្តកំពង់ចាម ដែលមានរឿងក្ដីក្ដាំនៅខេត្តកំពង់ធំ ចោទប្រកាន់មន្ត្រីតុលាការថា បានជំរិតទារប្រាក់ពួកគាត់ជាច្រើន ជាថ្នូរនឹងការដោះលែងសមាជិកគ្រួសារខ្លួន និងគ្រឿងចក្រ។ ការលើកឡើងនេះ ក្រោយពេលពលរដ្ឋម្នាក់ត្រូវបានអាជ្ញាធរចាប់ខ្លួន ហើយបញ្ជូនទៅឃុំខ្លួននៅស្នងការខេត្តកាលពីថ្ងៃទី២ សីហា ក្រោមហេតុផលថា បានភ្ជួរដីព្រៃរបស់រដ្ឋ។ ពួកគាត់យល់ថា នេះជាអំពើពុករលួយមួយដែលធ្វើឱ្យប៉ះពាល់ដល់ជីវភាពពលរដ្ឋក្រីក្រ ស្របពេលពួកគាត់មិនបានប្រព្រឹត្តដូចការចោទប្រកាន់ផង។ ព្រះរាជអាជ្ញាសាលាដំបូងខេត្តកំពង់ធំ បានច្រានចោលការចោទប្រកាន់នេះ។
ប្រជាពលរដ្ឋនៅស្រុកស្ទឹងត្រង់ ខេត្តកំពង់ចាម ស្នើឱ្យមន្ត្រីអង្គភាពប្រឆាំងអំពើពុករលួយជួយស្រាវជ្រាវករណីមន្ត្រីសាលាដំបូងខេត្តកំពង់ធំ បានជំរិតទារប្រាក់ពីពួកគាត់ដើម្បីជាថ្នូរដោះលែងមនុស្សឱ្យនៅក្រៅឃុំ ព្រមទាំងប្រគល់គ្រឿងចក្រវិញ។ បន្ថែមពីនេះ ពួកគាត់បានប្រគល់ប្រាក់មួយចំនួនឱ្យមន្ត្រីតុលាការ ប៉ុន្តែពួកគេមិនបានធ្វើតាមកិច្ចសន្យាឡើយ ពោលគឺដោះលែងតែមនុស្ស រីឯគ្រឿងចក្រ គឺទុកសម្រាប់ជំរិតប្រាក់ពីពួកគាត់ទៀត។
ពលរដ្ឋនៅឃុំដងក្តារ ស្រុកស្ទឹងត្រង់ មួយរូប អ្នកស្រី ហាន យាន មានប្រសាសន៍ថា កាលពីថ្ងៃទី២ ខែសីហា មន្ត្រីរដ្ឋបាលព្រៃឈើកំពង់ថ្ម បានឃាត់គ្រឿងចក្រកូនអ្នកស្រីរក្សាទុក ក្រោយមកពួកគេបានចាប់ខ្លួនកូនអ្នកស្រីបញ្ជូនទៅស្នងការខេត្តកំពង់ធំ។ ក្រោយពេលបញ្ជូនទៅទីនោះ មានមន្ត្រីតុលាការឈ្មោះ វណ្ណរី ហៅទូរស័ព្ទមកប្រាប់អ្នកស្រីឱ្យផ្ញើប្រាក់ឱ្យគេ ២លានរៀល ឬ ស្មើប្រមាណ ៥០០ដុល្លារសហរដ្ឋអាមេរិក ជាថ្នូរនឹងការដោះលែង ប៉ុន្តែពេលអ្នកស្រីប្រគល់ប្រាក់ គឺមិនឃើញដោះលែងអ្វីទេ។
បន្ទាប់មកនៅថ្ងៃទី៣ សីហា មានមន្ត្រីសាលាដំបូងម្នាក់ទៀតអះអាងថា ជាជំនួយការព្រះរាជអាជ្ញាសាលាដំបូង ប្រាប់ឱ្យអ្នកស្រីផ្ញើប្រាក់ឱ្យគេចំនួន ៦ពាន់ដុល្លារ ជាថ្នូរនឹងការដោះលែងមនុស្ស និងគ្រឿងចក្រមួយគ្រឿង។ ដោយសារបារម្ភពីកូនខ្លាចគេបញ្ជូនទៅដាក់គុក អ្នកស្រីព្រមផ្ញើប្រាក់ឱ្យមន្ត្រីតុលាការរូបនោះចំនួន ៤ពាន់ដុល្លារ ដោយសង្ឃឹមថា បានដោះលែងទាំងមនុស្ស និងគ្រឿងចក្រ ប៉ុន្តែក្រោយពេលគាត់ផ្ញើប្រាក់ឱ្យគេរួច គឺដោះលែងបានតែមនុស្សប៉ុណ្ណោះ។
ប្រភពដដែលបញ្ជាក់ទៀតថា មន្ត្រីតុលាការដដែលបង្គាប់ឱ្យផ្ញើប្រាក់ឱ្យគេ ៤ពាន់ដុល្លារទៀត ទើបអាចដោះស្រាយគ្រឿងចក្រចេញ ប៉ុន្តែអ្នកស្រី មិនមានលទ្ធភាពទៀតទេ ពីព្រោះប្រាក់ដែលយកទៅលោះកូននោះ គឺខ្ចីបុលគេប៉ុណ្ណោះ៖ «ខ្ញុំយល់ឃើញថា ដូចជាអារកខ្ញុំស្រស់ៗ ពេក អ្នកស្រុកអ្នកភូមិក៏បានជួយនិយាយជួយអាណិតអាសូរខ្ញុំហ្នឹង»។
ចំណែកកូនអ្នកស្រីដែលត្រូវបានអាជ្ញាធរចាប់ខ្លួន គឺលោក ថន ចាន់ធី។ លោកបញ្ជាក់ថា លោកទៅភ្ជួរដីនៅឃុំបឹងល្វា ក្នុងស្រុកសន្ទុក គឺមានពលរដ្ឋផ្សេងជួលលោកទៅភ្ជួរដីក្នុងចម្ការកៅស៊ូរបស់គេប៉ុណ្ណោះ គឺមិនបានភ្ជួរដីព្រៃអភិរក្សរបស់រដ្ឋឡើយ។ បន្ថែមពីនេះ អាជ្ញាធរមូលដ្ឋានថែមទាំងបញ្ជាក់ថា ពលរដ្ឋរូបនេះមិនបានទៅភ្ជួរលើដីបម្រុងទុករបស់រដ្ឋទេ។
លោកហៅការចាប់ខ្លួន និងការជំរិតយកប្រាក់ពីគ្រួសារគាត់ថា ជារឿងអយុត្តិធម៌៖ «បាទ! វាអត់សមទេបង! ខ្ញុំធ្លាប់ដើរភ្ជួរដីគេហ្នឹង បើលើកទីមួយអ៊ីចឹងគេព្រមាន ផាកពិន័យ។ ដល់នេះចាប់គ្នា ជំរិតដាក់គុកដាក់ច្រវាក់»។
ឆ្លើយតបបញ្ហានេះ ព្រះរាជអាជ្ញាអមសាលាដំបូងខេត្តកំពង់ធំ លោក អ៊ិត សុធា មានប្រសាសន៍ថា តុលាការសម្រេចដោះលែងពលរដ្ឋរូបនោះឱ្យនៅក្រៅឃុំបណ្ដោះអាសន្ន ចំណែកគ្រឿងចក្រត្រូវរក្សាទុកសម្រាប់ស៊ើបអង្កេតបន្ថែមទៀតដើម្បីឱ្យប្រាកដថា លោក ថន ចន្ធី ជាម្ចាស់គ្រឿងចក្រពិតប្រាកដ ដែលត្រូវបានគេជួលឱ្យទៅភ្ជួរដីតំបន់នោះ ឬយ៉ាងណា?
លោកថា មូលហេតុសម្រេចឱ្យពលរដ្ឋរូបនោះនៅក្រៅឃុំបណ្ដោះអាសន្នបាន ព្រោះការស៊ើបអង្កេតដំបូងរកឃើញថា លោក ចន្ធី ត្រូវបានគេជួលឱ្យភ្ជួរដីតំបន់នោះ ដោយមិនពាក់ព័ន្ធរឿងយកលុយកាក់ពីក្រុមគ្រួសាររបស់គាត់ឡើយ៖ «អត់ទេ កូនចៅខ្ញុំមានណា ក្រឡាបញ្ជីខ្ញុំមានតែម្នាក់ មិនដែលបានទៅជំរិតយកលុយគេអីណា គឺអត់សោះបង។ ខ្ញុំធ្វើទៅតាមច្បាប់ទេ។ អាណាសម័យនេះទៅដើរគាបសង្កត់គេយកលុយម៉េចបង»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ករណីនេះជាប្រភេទអំពើពុករលួយធ្ងន់ធ្ងរមួយដែលបណ្ដាលឱ្យប៉ះពាល់ដល់ប្រព័ន្ធយុត្តិធម៌នៅក្នុងសង្គម។លោកបន្តថា ក្រុមគ្រួសារជនរងគ្រោះ អាចដាក់ពាក្យប្ដឹងទៅអង្គភាពប្រឆាំងអំពើពុករលួយ ដើម្បីស៊ើបអង្កេតក្រុមមនុស្សដែលបានប្រើវិធីជំរិតទារប្រាក់ពីពួកគាត់៖ «ការជំរិតទារលុយជាថ្នូរនឹងការដោះលែងហ្នឹង ជាប្រភេទនៃអំពើពុករលួយមួយធ្ងន់ធ្ងរ។ ទោះបីជាមានការឆ្លើយបដិសេធពីព្រះរាជអាជ្ញាក៏ដោយ ប៉ុន្តែយើងជឿថា សមត្ថកិច្ចរបស់អង្គភាពប្រឆាំងអំពើពុករលួយគេអាចមានជំនាញរបស់គេក្នុងការស៊ើបអង្កេតករណីនេះ»។
មន្ត្រីសង្គមស៊ីវិលរូបនេះមើលឃើញថា ប្រសិនបើអំពើពុករលួយ មិនត្រូវបានបញ្ចប់ទេ ភាពអយុត្តិធម៌នឹងកាន់តែកើតមានច្រើននៅក្នុងសង្គម ដែលបណ្ដាលឱ្យប៉ះពាល់ដល់ជីវភាពរស់នៅរបស់ពលរដ្ឋ ពិសេសពលរដ្ឋក្រីក្រតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។