ក្រសួងការបរទេសសហរដ្ឋអាមេរិក (ស.រ.អា) ចង់ឃើញយុវជនកម្ពុជា ទទួលបានឱកាសទៅបន្តការសិក្សានៅតាមសកលវិទ្យាល័យនានា ក្នុងសហរដ្ឋអាមេរិក មានចំនួនកាន់តែច្រើនឡើងៗ ពីមួយឆ្នាំទៅមួយឆ្នាំសម្រាប់ពេលអនាគត។
ដោយសារតែចង់ឱ្យសិស្ស និងនិស្សិតខ្មែរ អាចទៅបន្តការសិក្សានៅសហរដ្ឋអាមេរិក កាន់តែច្រើននោះ ក្រសួងការបរទេសសហរដ្ឋអាមេរិក បានរៀបចំផ្សព្វផ្សាយកម្មវិធីអប់រំមួយក្នុងគោលបំណងផ្ដល់ព័ត៌មានដល់សិស្ស និស្សិតខ្មែរណាដែលចង់ទៅបន្តការសិក្សាឱ្យបានច្បាស់លាស់ ព្រមទាំងមានដំណឹងអំពីអាហារូបករណ៍ផ្សេងៗផង។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីល្លៀម ហៃដ្ត (William Heidt) បានចំណាយបេសកកម្មរបស់លោកពេញ ១ថ្ងៃ ដើម្បីជួបជាមួយសិស្ស និងនិស្សិតខ្មែរជាច្រើនរយនាក់ នៅឯខេត្តសៀមរាប ដែលជាខេត្តដ៏ល្បីល្បាញខាងទាក់ទាញភ្ញៀវទេសចរបំផុត។
លោក វីល្លៀម ហៃដ្ត មានប្រសាសន៍កាលពីល្ងាចថ្ងៃទី១៣ ខែមិថុនា ថា ខេត្តសៀមរាប គឺជាខេត្តល្អបំផុតដែលធ្វើឱ្យជនជាតិអាមេរិកាំង ជាច្រើនស្គាល់ និងមកកម្សាន្តមុនគេនៅក្នុងប្រទេសកម្ពុជា។
លោក វីល្លៀម ហៃដ្ត បញ្ជាក់ទៀតថា ជាច្រើនឆ្នាំមកហើយ សហរដ្ឋអាមេរិកធ្លាប់បានផ្សព្វផ្សាយកម្មវិធីអប់រំរបស់អាមេរិកាំង ឱ្យសិស្ស និងនិស្សិតខ្មែរជាច្រើននៅទីក្រុងភ្នំពេញ បានទទួលព័ត៌មានគ្រប់គ្រាន់ក្នុងការទទួលបានឱកាស និងអាហារូបករណ៍ចេញទៅបន្តការសិក្សានៅតាមសកលវិទ្យាល័យនានានៃសហរដ្ឋអាមេរិក ហើយពេលនេះ ការផ្សព្វផ្សាយកម្មវិធីអប់រំរបស់សហរដ្ឋអាមេរិក បានមកដល់ខេត្តសៀមរាប ក្នុងបំណងផ្ដល់ព័ត៌មានឱ្យសិស្ស និងនិស្សិតនៅខេត្តនេះ បានយល់កាន់តែច្បាស់អំពីឱកាសចេញទៅបន្តការសិក្សានៅសហរដ្ឋអាមេរិក ដែរ។
លោក វីល្លៀម ហៃដ្ត មានប្រសាសន៍ទៀតថា ជាច្រើនឆ្នាំមកនេះមានសិស្ស និងនិស្សិតខ្មែរជាច្រើននាក់នៅទីក្រុងភ្នំពេញ និងខេត្តសៀមរាប ជាដើម បានទៅបន្តការសិក្សានៅសហរដ្ឋអាមេរិក ក៏ប៉ុន្តែការផ្សព្វផ្សាយនៃកម្មវិធីអប់រំរបស់សហរដ្ឋអាមេរិក គឺនៅមានបញ្ហាប្រឈមដោយសារតែយុវជនខ្មែរជាច្រើនរស់នៅតាមជនបទដាច់ស្រយាល នៅមិនទាន់បានទទួលព័ត៌មានច្បាស់លាស់នៅឡើយ៖ «នេះជាការប្រឈមផ្នែកអភិវឌ្ឍន៍មួយ ដោយមិនត្រឹមតែយុវជនកម្ពុជា រស់នៅទីជនបទប៉ុណ្ណោះទេ គឺនៅប្រទេសជាច្រើនទៀត ក៏មានបញ្ហាដូចគ្នាដែរ។ មូលហេតុដែលខ្ញុំមកផ្សព្វផ្សាយកម្មវិធីអប់រំរបស់សហរដ្ឋអាមេរិក នៅខេត្តសៀមរាប ពីព្រោះខ្ញុំចង់ឱ្យសិស្ស និងនិស្សិតខ្មែរខ្លះ ដែលរស់នៅទីជនបទ បានទទួលព័ត៌មានពីការអប់រំរបស់សហរដ្ឋអាមេរិកដែរ។ យើងមិនចង់ឱ្យតែសិស្ស និងនិស្សិតដែលរស់នៅទីក្រុងភ្នំពេញ បានដឹងតែប៉ុណ្ណោះទេ»។
មន្ត្រីកម្មវិធីអប់រំរបស់ស្ថានទូតអាមេរិកប្រចាំកម្ពុជា ឱ្យដឹងថា បច្ចុប្បន្ននៅទូទាំងសហរដ្ឋអាមេរិក មានមហាវិទ្យាល័យ និងសកលវិទ្យាល័យជាង ៤.៥០០ ហើយចំពោះសិស្សកម្ពុជា ដែលកំពុងតែរៀននៅថ្នាក់ទី១១-១២ នៃវិទ្យាល័យ ក៏គួរស្វែងរកព័ត៌មានស្ដីពីឱកាសទៅបន្តការសិក្សានៅសហរដ្ឋអាមេរិក បាន តាមរយៈបណ្ដាញសង្គមហ្វេសប៊ុក (Facebook)។
ទីប្រឹក្សាផ្នែកអប់រំរបស់ស្ថានទូតអាមេរិក ប្រចាំកម្ពុជា លោកស្រី ម៉ៅ កុលាប មានប្រសាសន៍ថា បច្ចុប្បន្នសិស្ស និងនិស្សិតខ្មែរអាចទៅបន្តការសិក្សានៅសហរដ្ឋអាមេរិក បាន តាមរយៈការបង់លុយទៅឱ្យសាលា ឬក៏ការទទួលបានអាហារូបករណ៍ជាដើម៖ «ប្រសិនបើគាត់ចង់ទៅរៀននៅសហរដ្ឋអាមេរិក ប៉ុន្តែខ្វះថវិកាដើម្បីបន្តការសិក្សា គឺគាត់ត្រូវខំរៀនឱ្យខ្លាំងដើម្បីទទួលបានអាហារូបករណ៍។ ប្រសិនជាឪពុក ម្ដាយរបស់គាត់មានលុយអាចទំនុកបម្រុងច្រើន ហើយសិស្សនោះចេះអង់គ្លេសល្មមៗ ក៏អាចទៅបន្តការសិក្សានៅអាមេរិក បានដែរ»។
មន្ត្រីស្ថានទូតអាមេរិក ឱ្យដឹងថា បច្ចុប្បន្នប្រសិនបើសិស្ស និស្សិតកម្ពុជា ចង់បានអាហារូបករណ៍ដែលផ្ដល់ដោយស្ថានទូតអាមេរិកនោះ គឺមានតិចណាស់ ប៉ុន្តែអាហារូបករណ៍ជាច្រើនគឺផ្ដល់ដោយសកលវិទ្យាល័យនានា និងអង្គការស្ថាប័នផ្សេងទៀត។
ចាប់តាំងពីឆ្នាំ២០១២ មក មាននិស្សិតខ្មែរប្រហែល ៥០០នាក់ ដែលបានទៅសិក្សានៅសហរដ្ឋអាមេរិក។ សហរដ្ឋអាមេរិក ចង់ឃើញចំនួននិស្សិតខ្មែរទៅរៀននៅតាមសកលវិទ្យាល័យនានាក្នុងសហរដ្ឋអាមេរិក បានកើនឡើងពីមួយឆ្នាំទៅមួយឆ្នាំសម្រាប់អនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។