មន្ត្រីខេត្តរតនគិរី នៅថ្ងៃអង្គារ ទី១៦ ខែកក្កដា អំពាវនាវសុំឲ្យក្រសួងអប់រំស៊ើបអង្កេតជាបន្ទាន់ទៅលើមន្ត្រីមន្ទីរអប់រំខេត្តរតនគិរី ដែលបណ្ដែតបណ្ដោយឲ្យគ្រូ និងបុគ្គលិកមន្ទីរអប់រំចំនួន ៧នាក់ បោះបង់ចោលតួនាទីការងាររដ្ឋ ទៅចូលបម្រើការជាមន្ត្រីគណៈកម្មការខេត្តរៀបចំការបោះឆ្នោតសម្រាប់រយៈពេលជាងពីរខែ ដោយគ្មានច្បាប់អនុញ្ញាត។
បុគ្គលិក និងគ្រូទាំង ៧នាក់ រួមមាន លោក សួន ដារា នាយករងវិទ្យាល័យសម្ដេចឪ សម្ដេចម៉ែ ក្រុងបានលុង និង លោក សេង សៅរិទ្ធ ជាគ្រូនៅវិទ្យាល័យសម្ដេចឪ សម្ដេចម៉ែ។ លោក ងួន សុភា នាយកសាលាបឋមសិក្សាត្រពាំងច្រេស ស្រុកកូនមុំ។ លោម សម ឌី នាយកសាលាបឋមសិក្សាសម្ដេចក្រុមព្រះ ក្រុងបានលុង និងលោកស្រី ង៉ែត រដ្ឋា ជាគ្រូសាលាបឋមសិក្សាសម្ដេចក្រុមព្រះ។ លោក ស៊ឹម សំណាង គ្រូវិទ្យាល័យ ហ៊ុន សែន ភូមិថ្មី ក្រុងបានលុង និងលោក ព្រំ យីតា ប្រធានការិយាល័យអប់រំស្រុកអណ្ដូងមាស។
មន្ត្រីខេត្តរតនគិរី មួយរូបសុំមិនឲ្យបញ្ចេញឈ្មោះ មានប្រសាសន៍បញ្ជាក់ថា បច្ចុប្បន្ននេះ សាលារៀនគ្រប់កម្រិត មិនទាន់ដល់ពេលវិស្សមកាលនៅឡើយ។ ហេតុនេះ អវត្តមានគ្រូ និងបុគ្គលិកសិក្សា ធ្វើឲ្យប៉ះពាល់ដល់កម្មវិធីសិក្សារបស់សិស្ស។ មន្ត្រីដដែលបន្តថា បុគ្គលិកសិក្សា និងគ្រូទាំង ៧នាក់ បានចូលបម្រើការងារជាមន្ត្រីរៀបចំការបោះឆ្នោត និងមិនបានសុំព្យួរការងារ ឬសុំច្បាប់ឈប់ ជាពិសេសពីមន្ទីរអប់រំ។ ហើយនេះ គឺជាប្រការខុសទៅនឹងគោលការណ៍វិន័យរបស់ក្រសួងអប់រំ៖ «អត់មកបង្រៀនទេ គាត់ធ្វើតាំងពីដើមខែឧសភា មកម្ល៉េះ។ អ្នកចេញទៅហ្នឹងហើយ របៀបថាកិបកេងលុយពុករលួយស៊ីលុយរបស់រដ្ឋាភិបាល បក្ខពួកនិយម»។
វិទ្យុអាស៊ីសេរី នៅថ្ងៃអង្គារ ទី១៦ ខែកក្កដា មិនអាចទាក់ទងបុគ្គលិកសិក្សាទាំង ៧រូប សុំការបំភ្លឺពីករណីនេះបានទេ។
យ៉ាងនេះក្ដី នាយកវិទ្យាល័យ ហ៊ុន សែន ភូមិថ្មី លោក ឈុន យន់ ទទួលស្គាល់ថា លោកគ្រូ ស៊ឹម សំណាង បានដាក់ច្បាប់មានជំងឺរយៈពេល ១៥ថ្ងៃ។ ករណីនេះ លោកបានធ្វើចំណារបញ្ជូនលិខិតសុំច្បាប់នោះទៅមន្ទីរអប់រំ ដើម្បីសម្រេច។ លោកបន្តថា ករណីលោកគ្រូ ស៊ឹម សំណាង ចូលបម្រើជាមន្ត្រីរៀបចំការបោះឆ្នោតនេះ លោកមិនបានដឹងនោះឡើយ៖ «ច្បាប់ហ្នឹង គាត់ដាក់មកខ្ញុំស៊ីញេ បញ្ជូនតាមស្រុកទៅមន្ទីរ ប៉ុន្តែមន្ទីរអនុញ្ញាតម៉េច ខ្ញុំមិនដឹងដែរ។ ច្បាប់ហ្នឹង គាត់សុំខ្ញុំកន្លះខែ គាត់ដាក់ថាគាត់ឈឺ»។
វិទ្យុអាស៊ីសេរី នៅថ្ងៃអង្គារ ទី១៦ ខែកក្កដា ក៏មិនអាចទាក់ទងសុំការបញ្ជាក់ពីប្រធាន និងអនុប្រធានមន្ទីរអប់រំខេត្តរតនគិរី គឺអ្នកស្រី ចាន់ ខាំឃឿ និងលោក ប៉ា សុត្ថា ពីករណីនេះបានដូចគ្នា ដោយសារតែទូរស័ព្ទលោកទាំងពីរមិនមានអ្នកទទួលការហៅចូល។
ចំណែកប្រធានគណៈកម្មការខេត្តរៀបចំការបោះឆ្នោត លោក ប៉ែន ឈុនឌី ទទួលស្គាល់ថា មានបុគ្គលិកសិក្សា និងគ្រូបង្រៀន បានចុះកិច្ចសន្យាបម្រើការងារបោះឆ្នោតរយៈពេលជាង ២ខែ និងត្រូវបញ្ចប់កិច្ចសន្យាចុងខែកក្កដា ឆ្នាំ២០១៣។
ទាក់ទិនករណីនេះ ប្រធានសមាគមគ្រូបង្រៀនឯករាជ្យ លោក រ៉ុង ឈុន កត់សម្គាល់ថា បុគ្គលិកសិក្សា និងគ្រូបង្រៀនដែលឈប់សម្រាកការងារដោយគ្មានការអនុញ្ញាត គឺជាប្រការខុសច្បាប់។ លោកបន្តថា គ្រូបង្រៀន និងបុគ្គលិកសិក្សាអាចចូលរួមបម្រើការងារជាមន្ត្រីរៀបចំការបោះឆ្នោតបាន តាមរយៈសុំច្បាប់ ពិសេសមិនប៉ះពាល់ដល់ពេលវេលាបំពេញការងារ៖ «ក្រសួងត្រូវត្រួតពិនិត្យមើលឡើងវិញ ចំពោះអ្នកដែលទៅបម្រើការងាររៀបចំការបោះឆ្នោត ហើយមិនមានការអនុញ្ញាត។ ជារឿងមួយខុសច្បាប់ហើយ បើសិនសាលានៅដំណើរការមិនទាន់វ៉ាកង ហើយយើងទៅធ្វើការងារផ្សេង ហើយបោះបង់ការងារសាលាចោល»។
ទោះជាយ៉ាងនេះក៏ដោយ មន្ត្រីខេត្តសុំមិនឲ្យបញ្ចេញឈ្មោះដដែល មានប្រសាសន៍បញ្ជាក់ថា ករណីគ្រូ និងបុគ្គលិកសិក្សា ៧នាក់ ដែលឈប់គ្មានការអនុញ្ញាត អាចពាក់ព័ន្ធអំពើពុករលួយ ធ្វើឲ្យខាតបង់ថវិកាជាតិ ជាពិសេស ប្រាក់ខែគ្រូដែលមិនបានធ្វើការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។