រហូតមកដល់ពេលនេះ ខាងសមត្ថកិច្ចនៅពុំអាចរកឃើញតម្រុយថ្មីណាមួយបន្ថែមក្នុងសំណុំរឿងឃាតកម្មលើលោកបណ្ឌិត កែម ឡី ក្រៅពីជនជាប់ចោទឈ្មោះ ជួប សម្លាប់ ដែលកំពុងជាប់ឃុំនៅឡើយទេ។ ប៉ុន្តែភ្លាមៗបន្ទាប់ពីការបាញ់សម្លាប់លោកបណ្ឌិត កែម ឡី មានម៉ូតូមួយគ្រឿងពាក់ស្លាកប៉ូលិស (Police) ព្យាយាមប្រដេញតាមឈ្មោះ ជួប សម្លាប់។ មានការចោទប្រកាន់ថា អ្នកបើកម៉ូតូប៉ូលិសរូបនោះ អាចមានជាប់ពាក់ព័ន្ធនឹងអំពើឃាតកម្មនេះ។ បើទោះជាបែបណា នាយនគរបាលទន្លេបាសាក់ដែលសង្ស័យនៅក្នុងសំណុំរឿងនេះ បដិសេធក្នុងការឆ្លើយបំភ្លឺ។ ចំណែកប្រពន្ធរបស់ជនជាប់ចោទឈ្មោះ ជួប សម្លាប់ យល់ថា ប្ដីរបស់ខ្លួនមិនមែនជាឃាតកទេ។
ក្រុមសាច់ញាតិ និងអ្នកជិតខាងរបស់ឈ្មោះ ជួប សម្លាប់ អះអាងថា ជនជាប់ចោទនេះតែងទូរស័ព្ទទៅលេងប្រពន្ធកូន ខណៈកំពុងស្ថិតក្នុងពន្ធនាគារព្រៃស។ ប្រពន្ធ និងសាច់ញាតិ របស់ជនជាប់បន្តអះអាងថា ឈ្មោះ ជួប សម្លាប់ នេះពុំមែនជាឃាតកពិតទេ។
ប្រពន្ធរបស់ឈ្មោះ អឿត អាង ហៅ ជួប សម្លាប់ គឺលោកស្រី ហឿម ហ៊ត មិនជឿថា ប្ដីរបស់អ្នកស្រីជាអ្នកបាញ់ប្រហារលើលោកបណ្ឌិត កែម ឡី ឡើយ។ លោកស្រីបន្តថា ឈ្មោះ អឿត អាង នេះ គឺជាមនុស្សធ្លាប់បួសរៀន ហើយមាននិស្ស័យស្លូតបូតផង ហេតុនេះអ្នកស្រីយល់ថា ឈ្មោះ អឿត អាង ពុំមែនជាឃាតកនោះទេ។
រស់នៅភូមិអង្គរភៀស ស្រុកអង្គរធំ ខេត្តសៀមរាប ភរិយារបស់ជនជាប់ចោទ អោយដឹងថា លោក អឿត អាង ហៅ ជួប សម្លាប់ មកភ្នំពេញ ពុំមានលុយកាក់ច្រើនក្រៅពីលោកស្រីឲ្យលុយចំនួន ២ម៉ឺនរៀលក្នុងការធ្វើដំណើរឡើយ។ ធ្លាប់រស់នៅជាស្ត្រីមេម៉ាយកូនមួយ មុនរៀបការជាមួយលោក អឿត អាង លោកស្រី ហឿម ហ៊ត បញ្ជាក់ថា ខោអាវដែលប្ដីរបស់លោកស្រីពាក់នៅពេលសមត្ថកិច្ចចាប់ខ្លួននោះ គឺពុំមែនជាខោអាវដែលលោកស្រីធ្លាប់រៀបចំឲ្យមុនចេញមកភ្នំពេញ នោះទេ៖ «»។
មកដល់ត្រឹមថ្ងៃទី១០ ខែតុលា គឺមានរយៈពេល ៣ខែគត់ ដោយគិតចាប់ពីថ្ងៃដែលឃាតកបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា។ សមត្ថកិច្ចក្រុងភ្នំពេញ នៅពុំទាន់អាចកំណត់មុខសញ្ញាអ្នកសមគំនិត និងអ្នកបញ្ជានៅពីក្រោយនៃអំពើឃាតកម្មនេះបាននៅឡើយទេ។
ក្រុមគ្រួសារ និងសាក្សីដែលបានដឹងរឿងខ្លះៗមុនពេលឈ្មោះ ជួប សម្លាប់ នេះ ជាប់ពាក់ព័ន្ធនឹងសំណុំរឿងនៃឧក្រិដ្ឋកម្មនេះ គឺជនជាប់ចោទបានលាប្រពន្ធកូនមកភ្នំពេញ ក្រោមហេតុផលថា មកលេងផ្ទះបងធម៌តាំងពីកន្លះខែមុន មុននឹងឃាតកម្មកើតឡើង។ នៅមុនថ្ងៃកើតហេតុមួយថ្ងៃ ពោលពេលយប់លោកស្រី ហឿម ហ៊ត និយាយថា ប្ដីរបស់លោកស្រីបានទូរស័ព្ទសួរសុខទុក្ខរូបគាត់ជាញឹកញាប់ខុសធម្មតា៖ «»។
ជុំវិញសំណុំរឿងនៃឃាតកម្មនេះ ប្រធានសាខានៃអង្គការការពារបរិស្ថាន និងអភិវឌ្ឍន៍ លោក អ៊ុំ អឿង ឲ្យដឹងថា ថ្ងៃដែលឈ្មោះ ជួប សម្លាប់ នេះចាកចេញពីភូមិ គឺបានធ្វើដំណើរតាមរយៈរថយន្តឈ្នួលមួយគ្រឿងរបស់ម្ចាស់ឈ្មោះ ដៀន។ លោកបន្តអះអាងថា ក្នុងពេលធ្វើដំណើរដល់ទីរួមស្រុកពួក នៃខេត្តសៀមរាប ភ្លាម ជនជាប់ចោទក៏មានមនុស្សដែលរង់ចាំរួចជាស្រេច ចាំទទួលរួចបញ្ជូនចូលក្នុងរថយន្តពណ៌សបន្តដំណើរមកភ្នំពេញ មួយរំពេចដែរ។
ជាងនេះទៀត ក្នុងពេលឈ្មោះ ជួប សម្លាប់ នេះស្នាក់នៅទីក្រុងភ្នំពេញ គឺមុនហេតុការណ៍កើតឡើងប្រហែល ៣ថ្ងៃ ជនជាប់ចោទបានទូរស័ព្ទទៅរកលោក ហើយប្រាប់ថា ខ្លួនមានការងារធ្វើនៅភ្នំពេញ ហើយ ប៉ុន្តែធ្វើជាទាហានទេ។ ដោយរវល់តែសន្ទនាជាមួយឈ្មោះ ជួប សម្លាប់ លោក អ៊ុំ អឿង អះអាងថា លោកភ្លេចសួរនាំពីអង្គភាពដែលជនជាប់ចោទចូលបម្រើការក្នុងក្របខ័ណ្ឌជាយោធាណាមួយ៖ «»។
ក្នុងពេល ជួប សម្លាប់ បន្តស្នាក់នៅទីក្រុងភ្នំពេញ
លោក អ៊ុំ អឿង និយាយថា ឈ្មោះ ជួប សម្លាប់ នេះ ធ្លាប់ធ្វើជាយោធាស្រុកអង្គរជុំ ចន្លោះឆ្នាំ១៩៨៧។ ក្រោយមកទៀត ចូលបម្រើការជាកងទ័ពខ្មែរក្រហម អំឡុងឆ្នាំ១៩៩៧ មុននឹងចូលបួសជាសង្ឃនៅព្រៃភ្នំ តំបន់ពើងតានាន់ ក្នុងស្រុកអង្គរជុំ ក្នុងអំឡុងឆ្នាំ២០១៤។ ជនជាប់ចោទនេះ ក៏ធ្លាប់ធ្វើការជាបុគ្គលិកអង្គការការពារបរិស្ថានរយៈពេលខ្លីដែរក្នុងដំណាក់កាលចុងក្រោយនេះ។
ក្នុងពេលស្នាក់នៅទីក្រុងភ្នំពេញ រយៈពេលកន្លះខែមុនឃាតកម្ម ក្រុមគ្រួសារមិនដែលដឹងថា ជនជាប់ចោទឈ្មោះ ជួប សម្លាប់ នេះធ្វើការងារអ្វី ហើយក៏ពុំដែលបានផ្ញើលុយកាក់ផ្ទះដែរ បើទោះជាជនជាប់ចោទនេះធ្លាប់ប្រាប់តាមទូរស័ព្ទថា ការងារជាយោធានេះ ទទួលបានប្រាក់ខែ ៣០០ដុល្លារក្នុងមួយខែក្ដី។ មុនពេលចេញពីផ្ទះជនជាប់ចោទពុំបានប្រាប់ក្រុមគ្រួសារថា ឡើងមកភ្នំពេញ ក្នុងហេតុផលអ្វីឡើយដឹងតែម្យ៉ាងគត់ គឺថាការមកភ្នំពេញ ដើម្បីជួបបងធម៌។
ប្រធានសាខានៃអង្គការការពារបរិស្ថាន និងអភិវឌ្ឍន៍ លោក អ៊ុំ អឿង ឲ្យដឹងទៀតថា ឈ្មោះ ជួប សម្លាប់ ឧស្សាហ៍ទូរស័ព្ទទៅផ្ទះជាញឹកញាប់ដើម្បីសុំឲ្យប្រពន្ធផ្ញើលុយ។ លោកបន្តថា ជនជាប់ចោទតែងបដិសេធនិយាយស្តីជានិច្ចនៅពេលក្រុមគ្រួសារ សួរនាំពីមូលហេតុនៃការបាញ់សម្លាប់លោកបណ្ឌិត កែម ឡី។ ការបដិសេធនេះឈ្មោះ អឿត អាង តែងនិយាយថា មិនចាំបាច់សួរនាំអ្វីច្រើនឡើយកិច្ចការនេះទុកឲ្យគេជាដោះស្រាយចុះ៖ «»។
នាយកប៉ុស្តិ៍នគរបាលទន្លេបាសាក់ត្រូវគេថាសង្ស័យមានជាប់ពាក់ព័ន្ធក្នុងសំណុំរឿងនេះ
ក្រោយថ្ងៃកើតហេតុបានប៉ុន្មានថ្ងៃ កាលពីខែកក្កដា មានឃ្លិបវីដេអូមួយត្រូវបានគេបង្ហោះចែកចាយជាសាធារណៈ បង្ហាញពីមន្ទិលសង្ស័យទៅលើបុរសម្នាក់ថា អាចជាប់ពាក់ព័ន្ធក្នុងអំពើឃាតកម្មនេះ។ នៅក្នុងឃ្លិបវីដេអូនោះ គេឃើញបុរសម្នាក់ជិះម៉ូតូធំមួយគ្រឿងពណ៌ខៀវ ពាក់ស្លាកប៉ូលិសជាភាសាអង់គ្លេសពាក់អាវស និងមួកសុវត្ថិភាព។
បុរសដែលជិះម៉ូតូប៉ូលិសព្យាយាមតាមពីក្រោយឈ្មោះ ជួប សម្លាប់ នោះ គឺជានាយប៉ុស្តិ៍នគរបាលទន្លេបាសាក់ ឈ្មោះ សុខ សំអ៊ុត ដែលទទួលស្គាល់នៅថ្ងៃទី១៣ ខែកញ្ញា តាមទូរស័ព្ទយ៉ាងខ្លីថា គឺជារូបលោកដែលជិះម៉ូតូខៀវពាក់ផ្លាកប៉ូលិសនោះ ប៉ុន្តែនាយប៉ុស្តិ៍រូបនេះ បានបង្វែរសំណួរឲ្យទៅសួរអធិការខណ្ឌវិញ៖ «»។
ក្រុមគ្រួសាររបស់ជនជាប់ចោទអះអាងថា ឈ្មោះ អឿត អាង នេះពុំមែនជាឃាតកពិតប្រាកដក្នុងអំពើឃាតកម្មនេះទេ។ ពួកគេចាត់ទុកថា នេះគ្រាន់តែជាឃាតកសិប្បនិមិត្តប៉ុណ្ណោះ។ ចំណែកលោកស្រី ប៊ូ ចរនា ភរិយាលោកបណ្ឌិត កែម ឡី ដែលជាជនរងគ្រោះបានអំពាវនាវឲ្យស្ថាប័នពាក់ព័ន្ធ និងនគរបាលយុត្តិធម៌ស្វែងរកឃាតកពិត និងអ្នកបញ្ជានៅពីក្រោយនៃបទឧក្រិដ្ឋនេះដើម្បីយកមកផ្ដន្ទាទោស៖ «»។
ដំណាក់កាលនៃការស៊ើបសួររបស់ចៅក្រមនៃតុលាការក្រុងភ្នំពេញ
កាលពីថ្ងៃទី១៦ ខែកញ្ញា ចៅក្រមស៊ើបសួរនៃតុលាការក្រុងភ្នំពេញ លោក សេង លាង បានបញ្ជាឲ្យនាំខ្លួនជនជាប់ចោទ អឿត អាង ហៅ ជួប សម្លាប់ មកសួរនាំជាលើកទីពីរ។ ការសួរចម្លើយបន្ថែមទៀតនេះ ក្រោយការស៊ើបសួរក្នុងដំណាក់កាលលើកទី១ កាលពីថ្ងៃទី១២ ខែសីហា។ ព័ត៌មានលម្អិតជុំវិញការសួរចម្លើយនេះ មិនត្រូវបានតុលាការទម្លាយឲ្យដឹងពីការស៊ើបអង្កេតនេះនៅឡើយដែរ។ឈ្មោះ ជួប សម្លាប់ ត្រូវបានតុលាការចោទប្រកាន់ពីបទឃាតកម្មគិតទុកជាមុន និងប្រើប្រាស់អាវុធខុសច្បាប់តាមមាត្រា២០០ នៃក្រមព្រហ្មទណ្ឌ។
ចំណែកតំណាងក្រុមហ៊ុន និងអ្នកចាត់ចែងទូទៅរបស់ស្ថានីយប្រេងសាំងកាល់តិច ស្ថិតនៅចំណុចដែលឃាតកបាញ់សម្លាប់លោកបណ្ឌិត កែម ឡី មិនសហការក្នុងការផ្ដល់ព័ត៌មានលម្អិតជុំវិញរូបវីដេអូ ដែលមាននៅនឹងកាមេរ៉ាសុវត្ថិភាពឡើយ។ ចំណែកបុគ្គលិកដែលធ្លាប់បម្រើការឲ្យក្រុមហ៊ុនប្រេងសាំង មុនឃាតកបាញ់សម្លាប់លោកបណ្ឌិត កែម ឡី ព្យាយាមបដិសេធដោយអះអាងថា មិនដឹងរឿងអ្វីទាំងអស់។
លោកបណ្ឌិត កែម ឡី ត្រូវឃាតកបាញ់សម្លាប់កាលពីថ្ងៃទី១០ ខែកក្កដា នៅក្នុងហាងស្តារម៉ាត ស្តុបបូកគោកាល់តិច។ គិតពីថ្ងៃបាញ់ប្រហារមកដល់ពេលនេះ ខាងសមត្ថកិច្ចបញ្ជាក់ថា ពុំមានតម្រុយណាមួយថ្មីនៅឡើយទេ ជាប់ទាក់ទងអំពើឃាតកម្មនេះ។
ចាប់តាំងពីសំណុំរឿងដែលនគរបាលបានបញ្ជូន រួមទាំងភស្តុតាងដែលដកហូតពីហាងស្តារម៉ាត់ ខាងតុលាការនូវមិនបានបង្ហាញពីលទ្ធផលនៃការស៊ើបអង្កេតនៅឡើយទេ។
ជាងនេះទៀត ការស៊ើបអង្កេតរបស់ចៅក្រម មិនបានកំណត់មុខសញ្ញាបន្ថែមទៀតចំពោះ អ្នកពាក់ព័ន្ធ ជាពិសេសអ្នកបញ្ជានៅពីក្រោយនៃអំពើឃាតកម្មនេះ។ ផ្ទុយទៅវិញ ចៅក្រមស៊ើបសួរនៃតុលាការទីក្រុងភ្នំពេញ លោក សេង លាង បានចេញដីកាកាលពីថ្ងៃទី២៦ ខែកញ្ញា ដោយកោះហៅប្រពន្ធលោកបណ្ឌិត កែម ឡី ឲ្យចូលឆ្លើយក្នុងនាមជាដើមបណ្ដឹងក្នុងអំឡុងពេលអ្នកស្រីទើបឆ្លងទន្លេបានកូនប្រុសមួយទៀតដាក់ឈ្មោះថា កែម ឡីវីរបុត្រ។
លោកបណ្ឌិត កែម ឡី ត្រូវឃាតកបាញ់សម្លាប់កាលពីថ្ងៃទី១០ ខែកក្កដា នៅក្នុងហាងស្តារម៉ាត ស្តុបបូកគោ កាល់តិច គឺរយៈពេលពីរថ្ងៃបន្ទាប់ពីលោកបានវិភាគស៊ីជម្រៅក្នុងវេទិកាអ្នកស្ដាប់វិទ្យុអាស៊ីសេរី លើរបាយការណ៍ស្រាវជ្រាវរបស់អង្គការ គ្លបល វីនេស (Global Witness) ដែលរិះគន់ជុំវិញការកាន់កាប់ជំនួញ និងសេដ្ឋកិច្ចនៅកម្ពុជា របស់ក្រុមគ្រួសារលោកនាយករដ្ឋមន្ត្រី ហ៊ុន សែន។ អង្គការឃ្លាំមើលពិភពលោក គ្លបល វីនេស ដាក់ការសង្ស័យក្នុងសំណុំរឿងនេះថា វាពុំមែនជាមនុស្សសាមញ្ញឡើយ ដែលស្ថិតនៅពីក្រោយករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។