ទិន្នផលត្រីសម្រាប់ធ្វើប្រហុក ឬផ្អកនៅខេត្តកំពង់ឆ្នាំង ក្នុងឆ្នាំ២០១៦ កើនជាង ១ពាន់តោន បើប្រៀបធៀបនឹងឆ្នាំ២០១៥ ដែលចាប់បានជាង ២ពាន់តោន។ បើទោះបីជាទិន្នផលត្រីប្រហុកមានការកើនឡើង ត្រីនៅតែថ្លៃ គឺតម្លៃចន្លោះពី ១.២០០រៀលទៅ ៣ពាន់រៀលក្នុង ១គីឡូក្រាម ប៉ុន្តែអាជ្ញាធរថាតម្លៃនេះកសិករខ្មែរដែលធ្វើប្រហុកលក់ ឬទុកហូបប្រចាំឆ្នាំ អាចទទួលយកបាន។
មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បង្ហាញថា ទិន្នផលត្រីសម្រាប់ធ្វើប្រហុក ឬផ្អកប្រចាំឆ្នាំ២០១៦ ដែលប្រមូលបាននៅសង្កាត់រដ្ឋបាលជលផលទាំង៦ នៅទូទាំងខេត្ត មានជាង ៣ពាន់តោន។ ឆ្នាំនេះ រយៈពេលដែលត្រីប្រហុកត្រូវមានតែ ៤ថ្ងៃប៉ុណ្ណោះ គឺចាប់ពីថ្ងៃទី៣ ដល់ថ្ងៃទី៦ ខែមករា ឆ្នាំ២០១៧ ត្រូវនឹងថ្ងៃ៩ កើត ខែបុស្ស ប៉ុន្តែឆ្នាំនេះត្រីប្រភេទលេខ១ សម្រាប់ធ្វើប្រហុកមានច្រើនជាងឆ្នាំទៅ។
ប្រធានមន្ទីរកសិកម្មខេត្តកំពង់ឆ្នាំង លោក ងិន ហ៊ុន បញ្ជាក់ថា កត្តាដែលត្រីប្រហុកឆ្នាំនេះមានការកើនឡើង ដោយសារតែកម្រិតទឹកបឹងទន្លេសាបឡើងខ្ពស់ហូរចូលបឹង ឬព្រែកនានាច្រើនជាងឆ្នាំមុន ដែលធ្វើឲ្យត្រីងាយស្រួលបន្លាស់ទី និងពងកូន។ ស្របពេលគ្នានេះ អាជ្ញាធរមានសមត្ថកិច្ចចុះបង្ក្រាបបទល្មើសនេសាទ ជាពិសេសបង្ក្រាបរបាំងស្បៃមុងបានច្រើនករណី ហើយលោកសង្ឃឹមថា ទិន្នផលត្រីនឹងកើនឡើងនៅឆ្នាំក្រោយៗទៀត៖ « ចំពោះតម្លៃ ខ្ញុំឯកភាពថាវាថ្លៃជាងឆ្នាំទៅ នៅតែថ្លៃ។ យើងមិនមានដោះស្រាយអីទេ ដោយសារតម្រូវការរបស់ប្រជាពលរដ្ឋច្រើន ហើយតម្រូវការរបស់ប្រជានេសាទរបស់យើងហ្នឹងក៏ច្រើនដែរ ( រកត្រីបានច្រើន ) ប៉ុន្តែអត់គ្រប់តម្រូវការរបស់គាត់។ អ៊ីចឹងក្នុងតម្លៃទីផ្សារប៉ុណ្ណឹង ហាក់បីដូចជាមិនមានអីចោទជាបញ្ហាទេបាទ »។
អាជីវករប្រមូលទិញត្រីប្រហុកនៅកំពង់ផែផ្សារក្រោម ខេត្តកំពង់ឆ្នាំង ដើម្បីទុកលក់ឲ្យម៉ូយ លោក កៅ ហំ មានប្រសាសន៍ថា រយៈពេល ៧ថ្ងៃហើយដែលលោក និងប្រពន្ធដេកចាំទិញត្រី ហើយមកដល់ថ្ងៃទី១០ ខែមករា នេះ លោកទិញត្រីកាត់ក្បាល និងជាន់ហើយស្រាប់បានជាង ១០០តោន។
កាលពីឆ្នាំទៅ លោកទិញត្រីបានល្អិតៗ ហើយមានតម្លៃថ្លៃបានប្រហែល ៦០តោន។ លោកបញ្ជាក់ថា ត្រីធ្វើហើយប្រភេទលេខ១ មានតម្លៃចន្លោះពី ៣ពាន់រៀលទៅ ៣.៥០០រៀលក្នុង ១គីឡូក្រាម។ លោកថា ទោះបីជាត្រីថោក ឬថ្លៃយ៉ាងណា លោកត្រូវតែទិញដើម្បីត្រៀមទុកលក់ឲ្យម៉ូយរាល់ឆ្នាំ៖ « សូមឲ្យរដ្ឋាភិបាល និងមន្ត្រីជំនាញខាងជលផល ជួយគ្រប់គ្រងមើលការពារការនេសាទត្រីកុំឲ្យមានរបស់ខុសច្បាប់ ដើម្បីឲ្យត្រីនៅស្រុកខ្មែរកើនបានច្រើន »។
ចំណែកអាជីវករមកពីខេត្តត្បូងឃ្មុំ ដែលទិញត្រីប្រហុកសម្រាប់តម្កល់ទុកលក់នៅលើទីផ្សារ លោក ជួប សេងហុង ថានៅតាមកំពង់ផែជាច្រើនដែលលោកចុះទិញនៅឆ្នាំនេះ ត្រីមានការកើនឡើងទ្វេដង៖ « គេរកបានតាំងពីខែដំបូងម្ល៉េះ ! ខែបិទនេសាទ ក៏គេនៅរកបានដែរ ចង់និយាយថានៅក្នុងខែភ្ជុំ គឺ៩ ទៅខែ១០ គេដងនៅតាមទន្លេមេគង្គ គេដងបានច្រើនៗណាស់ »។
អាជីវករ និងកសិករដែលនិយមចុះកំពង់ផ្ទាល់ ដើម្បីទិញត្រីធ្វើប្រហុកទុកហូបប្រចាំឆ្នាំ ទទួលស្គាល់ថា ត្រីឆ្នាំនេះសម្បូរ និងទ្រើសៗជាងឆ្នាំទៅ ប៉ុន្តែត្អូញថា សូម្បីត្រីប្រភេទលេខ២ មានតម្លៃ ១.២០០រៀលទៅ ២ពាន់រៀលក្នុង ១គីឡូក្រាម ដែលធ្វើឲ្យកសិករខ្លះពុំមានលទ្ធភាពទិញត្រីច្រើនសម្រាប់ធ្វើប្រហុកទុកហូប ឬលក់ដូរនៅខែខ្វះខាតប្រហុកដាំស្ល ចន្លោះពីខែមិថុនា ដល់ខែធ្នូ នៃឆ្នាំនីមួយៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។