ក្រុមអ្នកប្រកបរបរចិញ្ចឹមជីវិត និងភ្ញៀវទេសចរចូលទៅកម្សាន្តខេត្តព្រះសីហនុ បង្ហាញក្តីព្រួយបារម្ភចំពោះសកម្មភាពចរាចរគ្រឿងញៀន បនពេស្យាចារ សកម្មភាពចោរលួច និងឆក់ កើតមានអនាធិបតេយ្យនៅមូលដ្ឋានខេត្តទេសចរណ៍មួយនេះ ប៉ុន្តែសមត្ថកិច្ចពាក់ព័ន្ធហាក់មិនមានឆន្ទៈបង្ក្រាប ឬទប់ស្កាត់ឲ្យមានប្រសិទ្ធភាពទេ។
បញ្ហានេះ មន្ត្រីសង្គមស៊ីវិល និងក្រុមអាជីវករមួយចំនួនចោទថា បទល្មើសទាំងនេះអាចធ្វើសកម្មភាពទៅបាន ដោយសារតែភាពធូររលុង ឬខ្វះការយកចិត្តទុកដាក់របស់សមត្ថកិច្ចជំនាញ កងរាជអាវុធហត្ថ និងកម្លាំងនគរបាល ជាដើម។
ភ្ញៀវទេសចរជាតិ អន្តរជាតិ និងក្រុមអាជីវករប្រកបរបរបម្រើសេវាទេសចរណ៍ខេត្តព្រះសីហនុ បានរអ៊ូរទាំថា បទល្មើសចោរលួចម៉ូតូ ឬចោរឆក់កាបូបដៃជាដើម បានកើតមានស្ទើរជារៀងរាល់យប់នាមូលដ្ឋានខេត្តទេសចរណ៍មួយនេះ ពិសេសនៅតាមតំបន់ឆ្នេរអូរត្រេះ និងឆ្នេរអូរឈើទាល ជាដើម។ ប៉ុន្តែ បទល្មើសទាំងនេះកម្រឃើញកម្លាំងសមត្ថកិច្ចជំនាញ ចាប់បានជនល្មើសម្តងណាទេ ហើយបទល្មើសបានបន្តកើតមានគួរឲ្យព្រួយបារម្ភ។
អាជីវករមានមុខរបរដូរលុយមួយចំនួននាខេត្តព្រះសីហនុ ក៏បានឲ្យដឹងដែរថា កាលពីចុងឆ្នាំ២០១៤ មានជនល្មើសបានធ្វើសកម្មភាពប្លន់អាជីវករមានរបរដូរលុយទាំងថ្ងៃ អស់លុយរាប់ម៉ឺនដុល្លារ និងគេចខ្លួនដោយសុវត្ថិភាព។
ប្រជាពលរដ្ឋចោទថា បទល្មើសទាំងនេះអាចបណ្ដាលមកពីភាពអនាធិបតេយ្យនៃបនពេស្យាចារ ជ្រកក្រោមស្លាកកោសជប់ ល្បែងភ្នាល់បាល់ ឬជល់មាន់ ជាដើម កំពុងរីករាលដាលដូចផ្សិត ហើយគ្មានការបង្ក្រាបពីសមត្ថកិច្ច។
ទាក់ទិនបញ្ហានេះ លោក ស៊ាង កុសល ស្នងការនគរបាលខេត្តព្រះសីហនុ បានបដិសេធថា មូលដ្ឋាននេះមិនមានបទល្មើសចោរលួច ឬឆក់កើនច្រើនដូចពលរដ្ឋ ឬក្រុមអាជីវករមួយចំនួននាខេត្តព្រះសីហនុ ចោទទេ ព្រោះកម្លាំងនគរបាល និងកម្លាំងជំនាញស្ថាប័នផ្សេងទៀត បានប្រចាំនៅតាមគោលដៅនានាដោយការទទួលខុសត្រូវខ្ពស់៖ «ដូចមិនមានបទល្មើសកើនទេ។ ការបាត់កាបូបដៃ ឬសម្ភារៈរបស់ភ្ញៀវទេសចរបរទេសកន្លងមក គឺដោយសារតែជួនកាលភ្ញៀវបរទេសទាំងនោះចុះងូតទឹក ហើយទុកសម្ភារៈ ឬកាបូបដៃរបស់ខ្លួននៅលើគោក ហើយជួនកាលក្មេងដើរមកឃើញក៏យកបាត់ទៅ នៅពេលជនបរទេសទាំងនោះងូតទឹកភ្លេចខ្លួន។ បទល្មើសនេះ ក្នុងរយៈពេល ២សប្ដាហ៍ទើបកើតមានម្តងទេ គឺមិនមានកើនច្រើនដូចពលរដ្ឋ ឬក្រុមអាជីវករមួយចំនួនលើកឡើងនោះទេ»។
ចំណែក លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ក៏បានបញ្ជាក់ថា កម្លាំងជំនាញស្ថាប័ននេះ បានពង្រាយនៅតាមគោលដៅនានាទាំងយប់ថ្ងៃ ហើយគ្មានបទល្មើសកើតឡើងធំដុំនោះទេ។ លោកបន្តថា ការបាត់បង់សម្ភារៈមានកាបូបដៃ និងម៉ូតូរបស់ភ្ញៀវទេសចរ ពិសេសភ្ញៀវបរទេស គឺដោយសារតែភ្ញៀវទេសចរទាំងនោះធ្វេសប្រហែសដោយខ្លួនឯង។ លោក ហេង ប៊ុនទី បានស្នើដល់ក្រុមអាជីវករ ឬប្រជាពលរដ្ឋខេត្តព្រះសីហនុ ត្រូវជួយសហការជាមួយកម្លាំងកងរាជអាវុធហត្ថ ឈានដល់បង្ក្រាបបទល្មើសផ្សេងៗឲ្យមានប្រសិទ្ធភាព តាមរយៈផ្តល់ព័ត៌មានឲ្យបានទាន់ពេលមកកម្លាំងជំនាញ៖ «ខ្ញុំបានចាត់ចែងនៅតាមគោលដៅនានាទាំងកម្លាំងបង្កប់ និងកម្លាំងឯកសណ្ឋានទាំងយប់ថ្ងៃ ដោយការទទួលខុសត្រូវខ្ពស់ និងមានសកម្មភាពជាប្រចាំ។ ស្នើឲ្យប្រជាពលរដ្ឋទាំងអស់ចូលរួមសហការជាមួយកម្លាំងសមត្ថកិច្ចរបស់យើង ក្នុងការឈានដល់បង្ក្រាបបទល្មើសនានាឲ្យមានប្រសិទ្ធភាពនាថ្ងៃអនាគត»។
ទោះជាបែបនេះក្តី ក្រុមអាជីវករ និងភ្ញៀវទេសចរភាគច្រើន ចូលមកកម្សាន្តខេត្តព្រះសីហនុ បានរិះគន់ថា កម្លាំងសមត្ថកិច្ចខេត្តនេះមិនទាន់អនុវត្តគោលនយោបាយភូមិឃុំមានសុវត្ថិភាពទាំង ៩ចំណុច ដែលលោកនាយករដ្ឋមន្ត្រី ហ៊ុន សែន បានដាក់ឲ្យអនុវត្ត គឺមិនទាន់មានប្រសិទ្ធភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។