មន្ត្រីសង្គមស៊ីវិលអះអាងថា ល្បែងកន្ទុយលេខក្នុងក្រុងស្ទឹងត្រែង កំពុងរីករាលដាលដូចផ្សិតយ៉ាងអនាធិបតេយ្យ ពុំឃើញមានសមត្ថកិច្ចបង្ក្រាប ឬអនុវត្តតាមច្បាប់ឡើយ។ ការអះអាងនេះ បន្ទាប់ពីមន្ត្រីសង្គមស៊ីវិលរកឃើញថា កងរាជអាវុធហត្ថខេត្តស្ទឹងត្រែង និងស្នងការនគរបាលខេត្ត ហាក់ដូចជាធ្វើព្រងើយកន្តើយ ក្នុងការទប់ស្កាត់ល្បែងនេះ ដែលបង្កផលប៉ះពាល់ដល់ភូមិឃុំមានសុវត្ថិភាព ជាដើម។
មន្ត្រីសង្គមស៊ីវិលរកឃើញថា ទីតាំងល្បែងកន្ទុយលេខពីរកន្លែងធំៗក្នុងក្រុងស្ទឹងត្រែង គឺទី១ មានឈ្មោះថា ងី ហៅ ងី កំប៉ោង និងទីតាំងមួយកន្លែងផ្សេងទៀតមានឈ្មោះថា កាន់ វិមាំងសា ហៅ តាមាំង និងមានបណ្ដាញឆ្នោតតូចៗជាច្រើនកន្លែងទៀតនៅតាមស្រុកក្នុងខេត្តនេះ។ បន្ថែមពីលើនេះ សមត្ថកិច្ចជំនាញហាក់ដូចជាស្ទាក់ស្ទើរក្នុងការបង្ក្រាប ព្រោះតែមេឆ្នោតបើកទ្រង់ទ្រាយធំក្នុងខេត្តនេះ គឺជាអ្នកមានលុយ និងមានអំណាច។
មន្ត្រីសម្របសម្រួលសមាគមអាដហុក (adhoc) ខេត្តស្ទឹងត្រែង លោក ហូ សំអុល និយាយថា មន្ត្រីពាក់ព័ន្ធក្នុងខេត្តនេះ ហាក់ដូចជាធ្វើមិនដឹងមិនឮពីសកម្មភាពល្បែងកន្ទុយលេខ ដែលកំពុងបង្កផលប៉ះពាល់ធ្ងន់ធ្ងរដល់ភូមិឃុំមានសុវត្ថិភាព សន្តិសុខសង្គម អស្ថិរភាពសង្គម និងអំពើហិង្សា ជាដើម។ បន្ថែមពីលើនេះ លោកពុំមានជំនឿថា សមត្ថកិច្ចជំនាញក្នុងខេត្តនេះ ដូចជាស្នងការនគរបាលខេត្ត និងកងរាជអាវុធហត្ថ មើលមិនឃើញបទល្មើសនេះនោះទេ៖ «ធំហ្នឹងនៅកាច់ជ្រុងផ្សារខេត្តស្ទឹងត្រែង ជាកន្លែងមួយដែលសមត្ថកិច្ចមិនគួរមើលរំលងទេ គ្មានអ្នកណាថាមិនឃើញ អាជ្ញាធរដូចជាស្នងការ ឬកងរាជអាវុធហត្ថខេត្ត មេត្តាគួរចាត់វិធានការតាមផ្លូវច្បាប់»។
លោក ហូ សំអុល សង្កត់ធ្ងន់ថា ល្បែងកន្ទុយលេខនេះមានប្រភពមកពីប្រទេសវៀតណាម និងប្រទេសឡាវ ដែលលោកមានមន្ទិលថា មូលដ្ឋានប្រភពនៃការលេងល្បែងនេះ មិនដឹងថាចេញតាមពិធីណាឲ្យច្បាស់នៅឡើយទេ? លោកដាក់ការសង្ស័យថា ល្បែងកន្ទុយលេខ គឺជាអាជីវកម្មឆបោកខុសច្បាប់។
មេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី មិនធ្វើអធិប្បាយអំពីការចោទប្រកាន់នេះទេ ដោយលោកប្រាប់ថា ទូរស័ព្ទលោកពុំមានសេវា៖ «ខ្ញុំអត់មានសេវាទេដាច់ៗ»។
ចំណែកស្នងការនគរបាលខេត្តស្ទឹងត្រែង លោក ម៉ៅ តារា ឲ្យដឹងយ៉ាងខ្លីថា មន្ត្រីជំនាញធ្លាប់ចាត់វិធានការលើករណីនេះហើយ ដោយអប់រំណែនាំ និងធ្វើកិច្ចសន្យា បើនៅតែមិនរាងចាល សមត្ថកិច្ចនឹងអនុវត្តតាមច្បាប់៖ «ដំបូងយើងបានធ្វើការណែនាំឲ្យគាត់ចុះកិច្ចសន្យាឲ្យឈប់ប្រព្រឹត្ត ចឹងបើគាត់នៅតែប្រព្រឹត្ត យើងនឹងចាត់វិធានការតាមច្បាប់»។
មន្ត្រីសង្គមស៊ីវិលរកឃើញថា ល្បែងកន្ទុយលេខបានប្រមូលថវិកាពលរដ្ឋក្នុងខេត្តស្ទឹងត្រែង ក្នុងមួយថ្ងៃៗរាប់សែនដុល្លារ ដែលមានប្រភពមកពីប្រទេសវៀតណាម និងប្រទេសឡាវ។
ច្បាប់ស្ដីពីការបង្ក្រាបល្បែងស៊ីសងឆ្នាំ១៩៩៦ មាត្រា៥ ចែងថា ចំពោះអ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង ត្រូវផ្ដន្ទាទោសពិន័យជាប្រាក់ពី ៥លានរៀល ដល់ ២០លានរៀល និងដាក់គុកពី ១ឆ្នាំដល់ ៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។