ការក្រើនរំលឹកបែបនេះ នៅក្រោយពីរោងចក្រមួយឈ្មោះ វីងស្តារស៊ូ (Wing Star shoe) នៅខេត្តកំពង់ស្ពឺ បានបាក់ពិតានថ្មសង្កត់កម្មករស្លាប់ និងរបួសជាច្រើននាក់ កាលពីពាក់កណ្ដាលខែឧសភា នេះ។
ស្ថាប័នចំនួនពីរ គឺសមាគមរោងចក្រកាត់ដេរនៅកម្ពុជា និងគម្រោងរោងចក្រកាន់តែប្រសើរនៅកម្ពុជា បានផ្តល់អនុសាសន៍ទៅដល់អ្នកគ្រប់គ្រងរោងចក្រទាំងអស់ ឲ្យផ្ដោតលើការយកចិត្តទុកដាក់អំពីគុណភាពសំណង់មុននឹងដំណើរការរោងចក្រនោះ។
អនុសាសន៍របស់ស្ថាប័នទាំងពីរនោះ បន្តថា រាល់សំណង់អគាររោងចក្រទាំងអស់ ចាំបាច់ត្រូវតែចាប់ផ្ដើមឲ្យមានការធានានូវភាពរឹងមាំ ដើម្បីការពារសុវត្ថិភាពដល់កម្មករ និងការពារសេចក្តីសុចរិតរបស់រោងចក្រនីមួយៗ។
អ្នកសម្របសម្រួលនៃសមាគមរោងចក្រកាត់ដេរនៅកម្ពុជា លោក ជាតិ ខេមរា មានប្រសាសន៍បញ្ជាក់នៅថ្ងៃទី២៨ ឧសភា ថា ការផ្ញើសារនេះជាការពញ្ញាក់អារម្មណ៍សមាជិករបស់ខ្លួន ឲ្យងាកទៅត្រួតពិនិត្យមើលសំណង់អគាររោងចក្រ ដែលកំពុងដំណើរការនោះឡើងវិញ ឬមុននឹងជួលឃ្លាំងធ្វើរោងចក្រ ឬធ្វើសំណង់ថ្មីក៏ដោយ ក៏ត្រូវជ្រើសរើសក្រុមហ៊ុនណាដែលមានអាជ្ញាប័ណ្ណត្រឹមត្រូវ មានវិស្វករសំណង់ដែលមានឯកទេសច្បាស់លាស់ អាចធានានូវគុណភាពសំណង់នោះបាន និងមានការទទួលខុសត្រូវចំពោះសុវត្ថិភាពការងាររបស់កម្មករ។
លោក ជាតិ ខេមរា៖ «អ៊ីចឹង យើងរំលឹកទៅសមាជិករបស់យើង ឲ្យពិនិត្យមើលសំណង់ដែលកំពុងជួលនោះ រកភាពសង្ស័យត្រង់ចំណុចណារកអ្នកបច្ចេកទេសមកត្រួតពិនិត្យមើល ដើម្បីឲ្យដឹងច្បាស់ពីសំណង់អស់ហ្នឹង ហើយបើមានចំណុចសង្ស័យ យើងត្រូវធ្វើយ៉ាងណាដើម្បីបញ្ចៀស កុំឲ្យមានបញ្ហានេះកើតឡើង ដើម្បីទំនុកចិត្តរបស់យើង ព្រោះអីយើងមិនចង់ឲ្យមានហេតុការណ៍ណាមួយដែលបណ្ដាលឲ្យមានគ្រោះថ្នាក់ការងារ»។
ប្រធានសហភាពសហជីពការងារកម្ពុជា លោក រ៉ុង ឈុន បានសាទរចំពោះការរំលឹកដាស់តឿនដល់ថៅកែរោងចក្របែបនេះ ប៉ុន្តែលោកជំរុញឲ្យមានការចូលរួមក្នុងការតាមដាននូវការអនុវត្តឲ្យមានប្រសិទ្ធភាព៖ «ជៀសវាងថ្លែងការណ៍ឲ្យបានតែល្អមើល ហើយប្រសិទ្ធភាពនៃការអនុវត្តគ្មាន ក៏វាអត់ប្រយោជន៍ដែរបាទ»។
លោកសង្កេតឃើញថា សព្វថ្ងៃនេះការត្រួតពិនិត្យលើគុណភាពសំណង់ស៊ីវិលនានា ជាពិសេសរោងចក្រភាគច្រើន ធ្វើឡើងពុំបានម៉ត់ចត់ ស៊ីជម្រៅ ស្របទៅតាមបទដ្ឋានបច្ចេកទេស ឬតាមស្តង់ដារអន្តរជាតិនោះទេ។
ទាក់ទិនបញ្ហានេះ វិទ្យុអាស៊ីសេរី ពុំទាន់អាចទាក់ទងមន្ត្រីក្រសួងដែនដី នគរូបនីយកម្ម និងសំណង់ ដើម្បីសុំការបំភ្លឺអំពីនីតិវិធីចំពោះការត្រួតពិនិត្យគុណភាពសំណង់នេះទេ។
ប៉ុន្តែ ថ្មីៗនេះ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក អិត សំហេង មានប្រសាសន៍ថា ហេតុការណ៍បាក់អគាររោងចក្រកន្លងមក កើតឡើងដោយសារបញ្ហាគុណភាពនៃសំណង់អគារ ដែលសង់មិនស្របតាមលក្ខណៈបច្ចេកទេសត្រឹមត្រូវ។
លោកបន្តថា ដោយឆ្លងកាត់បទពិសោធន៍កន្លងមកនោះ រដ្ឋាភិបាលនឹងចុះធ្វើអធិការកិច្ចលើគុណភាពសំណង់រោងចក្រទាំងអស់ ដើម្បីបញ្ចៀសកុំឲ្យមានហេតុការណ៍បាក់អគារបែបនេះកើតឡើងជាថ្មីទៀត៖ «ផ្ដើមពីចំណុចនេះបន្តទៅមុខទៀត គឺថា...! ជាការពិត ច្បាប់គោលនយោបាយ លិខិតបទដ្ឋានអីវាមានរួចហើយ មានន័យថា លិខិតបទដ្ឋាន និងគោលនយោបាយនានាដែលមានស្រាប់ យើងត្រូវពង្រឹងបង្កើនប្រសិទ្ធភាពថែមទៀតក្នុងការត្រួតពិនិត្យ និងការអនុវត្តឲ្យម៉ត់ចត់ថែមទៀត»។
ប៉ុន្តែ លោកមិនបានបញ្ជាក់ទេថា នឹងចុះអនុវត្តពេញលេញនាពេលណានោះទេ។
កាលពីពាក់កណ្ដាលខែឧសភា នេះ រោងចក្រផលិតស្បែកជើង វីងស្តារស៊ូ នៅខេត្តកំពង់ស្ពឺ បានបាក់ស្រុតពិតានថ្ម ឬហៅថាប្លង់សេឡាវតឿនៃអគារនោះ បណ្ដាលឲ្យស្លាប់ និងរបួសកម្មករជាច្រើននាក់ នៅពេលកំពុងបំពេញការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។