រដ្ឋាភិបាលកម្ពុជា នឹងពង្រឹងការផលិតពូជស្រូវក្រអូបសុទ្ធ ដើម្បីសម្រេចទិសដៅការនាំអង្ករចេញទៅទីផ្សារអន្តរជាតិ។ ទិសដៅនេះ ស្ថិតនៅក្នុងកម្មវិធីជំរុញផលិតកម្មស្បៀង ដែលតម្លៃទឹកប្រាក់ ២០លានដុល្លារសហរដ្ឋអាមេរិក រយៈពេលបីឆ្នាំ។
ក្នុងកិច្ចពិភាក្សាពិគ្រោះយោបល់ស្ដីពីការតាក់តែងកម្មវិធីជំរុញផលិតកម្មស្បៀង នៅថ្ងៃទី១២ ខែកុម្ភៈ ក្នុងរាជធានីភ្នំពេញនេះ នាយកប្រតិបត្តិនៃមជ្ឈមណ្ឌលសិក្សាគោលនយោបាយ លោក ច័ន្ទ សុផល ថ្លែងថា ទិសដៅសំខាន់នៃគម្រោងរយៈពេលបីឆ្នាំនេះ គឺបង្កើនការផលិតពូជស្រូវក្រអូប ហើយការផលិតពូជស្រូវសុទ្ធល្អគ្រប់ជំនាន់ នឹងជួយឲ្យកសិករមានគ្រាប់ពូជត្រឹមត្រូវសម្រាប់ដាំដុះ ស្របតាមតម្រូវការទីផ្សារ៖ «នេះមិនមែនតែជាគោលនយោបាយថ្មីទេ តែជាកម្មវិធីថ្មី។ ជាកម្មវិធីដែលរដ្ឋដាក់ហិរញ្ញប្បទាន ២០លានដុល្លារ សម្រាប់បីឆ្នាំខាងមុខទៀត ជំរុញឲ្យមានការផលិតពូជស្រូវច្រើនជាងមុន ការប្រើជាងមុន»។
កម្មវិធីដែលទទួលបានប្រាក់ឧបត្ថម្ភពីរដ្ឋាភិបាលពីឆ្នាំ២០១៦ ដល់ឆ្នាំ២០១៨ ប្ដេជ្ញាផលិតពូជស្រូវក្រអូបចំនួន ១៥.០០០តោនក្នុងមួយឆ្នាំ។ អង្ករផ្ការំដួលរបស់កម្ពុជា ជាប់ពានរង្វាន់អង្ករមានរសជាតិឆ្ងាញ់ល្អផ្តាច់គេលើសកលលោក រយៈពេលចំនួន ៣ឆ្នាំជាប់ៗគ្នា។
ទោះយ៉ាងណាក៏ដោយ លោក សុខ ហាច ប្រធានក្រុមហ៊ុនហ្គោលដិន រ៉ាយ (Golden Rice) ដែលជាក្រុមហ៊ុននាំចេញអង្ករក្រអូបរបស់កម្ពុជា ទៅបរទេសបញ្ជាក់ថា អង្ករក្រអូបរបស់កម្ពុជា ពិសេសអង្ករផ្ការំដួលជំនាន់ក្រោយ មិនមានគុណភាពសុទ្ធដូចមុននោះទេ ដោយគ្រាប់ពូជស្រូវបច្ចុប្បន្ន វាក្លាយឥតសុទ្ធទៀតហើយ។ លោកលើកឡើងថា ការផលិតគ្រាប់ពូជស្រូវសុទ្ធមានសារសំខាន់ដើម្បីធានាការនាំចេញអង្ករកម្ពុជា ទៅលក់នៅលើទីផ្សារអន្តរជាតិ។
នៅឆ្នាំ២០១៥ រដ្ឋាភិបាលកំណត់ផែនការនាំអង្ករចេញទៅក្រៅប្រទេស យ៉ាងតិចចំនួន ១លានតោន ក៏ប៉ុន្តែមិនអាចសម្រេចបានដូចការគ្រោងទុក។
បណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្ដមក្រុមប្រឹក្សាសេដ្ឋកិច្ចជាតិ គូសបញ្ជាក់ថា កសិករកម្ពុជា ខ្វះទំនុកចិត្តលើគ្រាប់ពូជស្រូវ ជាហេតុធ្វើឲ្យកសិករបន្តប្រើប្រាស់គ្រាប់ពូជបុរាណដែលមិនទាន់បានសិក្សាពិនិត្យត្រឹមត្រូវ។ លោកថា ការផលិតគ្រាប់ពូជស្រូវដែលមានគុណភាពស្តង់ដារ ដោយមានការទទួលស្គាល់ និងត្រួតពិនិត្យម៉ត់ចត់ពីស្ថាប័នជំនាញ នឹងជួយបង្កើនផលិតកម្មស្រូវ៖ «យើងថាឲ្យកសិករទៅធ្វើអីៗ តែគាត់ថា គាត់លក់អត់ដាច់។ លក់នៅណា រកទីផ្សារឲ្យខ្ញុំ។ នេះជាបញ្ហា ធ្វើបានហើយ លក់មិនដាច់។ យើងគិតបញ្ច្រាស យើងគិតពីទីផ្សារ ដឹងកន្លែងលក់ណាហើយ គិតពីម៉ាស៊ីនកិនស្រូវណា ត្រូវការ (ស្រូវ) ប៉ុន្មាន ស្រូវប្រភេទអី។ បន្ទាប់មកយើងធ្វើការជាមួយសហគមន៍កសិករណាដែលធ្វើការបាន»។
បើតាមលោក សុខ ហាច បច្ចុប្បន្នក្រុមអ្នកនាំអង្ករចេញទៅបរទេស ដែលមានរោងម៉ាស៊ីនកិនស្រូវស្តង់ដារកំពុងខ្វះស្រូវសម្រាប់កិនបញ្ចេញលក់។ លោកឲ្យដឹងថា រោងម៉ាស៊ីនកិនស្រូវនៅកម្ពុជា មានសមត្ថភាពកិនស្រូវបាន ៥.០០០តោនក្នុងមួយថ្ងៃ ក៏ប៉ុន្តែនៅកម្ពុជា មានស្រូវឲ្យកិនតែ ៥០០តោនក្នុងមួយថ្ងៃប៉ុណ្ណោះ។
កិច្ចពិភាក្សាបានស្នើឲ្យរដ្ឋាភិបាល ផ្តល់ជំនួយហិរញ្ញប្បទានខ្លះ (subsidy) ដល់វិស័យឯកជន និងកសិករដើម្បីសម្រេចបាននូវនាំចេញអង្ករដែលមានគុណភាពតាមតម្រូវការទីផ្សារ។ ក៏ប៉ុន្តែលោក ប៉ែន ភារុណ សេដ្ឋវិទូនៃក្រសួងសេដ្ឋកិច្ច និងហិរញ្ញវត្ថុ លើកឡើងថា គម្រោងនេះ គួរផ្ដោតទៅលើការជួយកសិករជាមុនសិន ហើយគួរផ្ដល់ជំនួយថវិកាដល់សហគមន៍កសិករដែលមានឆន្ទៈ និងសក្ដានុពលដើម្បីសម្រេចគោលដៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។