ក្រសួងពាណិជ្ជកម្ម គ្រោងរៀបចំពិធីហែក្បួនផ្សព្វផ្សាយផលិតផលខ្មែរចំនួន ២០មុខ នៅខេត្តទេសចរណ៍ចំនួន៣ នៅកម្ពុជា ដើម្បីជំរុញឲ្យពលរដ្ឋប្រើប្រាស់ផលិតផលក្នុងស្រុក។
រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល មានប្រសាសន៍ថា ខេត្តទាំង៣នោះមានខេត្តកំពង់ចាម សៀមរាប និងខេត្តព្រះសីហនុ ដែលក្រសួងនឹងបន្តរៀបចំតាំងបង្ហាញផ្សព្វផ្សាយនៅរាជធានីភ្នំពេញទៀត ដើម្បីផ្សព្វផ្សាយនិងលើកកម្ពស់ផលិតផលខ្មែរ នៅឆ្នាំ២០១៦នេះ។
លោកថា ធ្វើដូច្នេះដើម្បីជំរុញការនាំចេញផលិតផលទៅក្នុងទីផ្សារក្នុងស្រុកឲ្យប្រើប្រាស់និងលើកកម្ពស់ផលិតផលរបស់ខ្លួនជាមុនសិន៖ «ដូច្នេះឆ្នាំនេះក្រសួងពាណិជ្ជកម្មនឹងរៀបចំកម្មវិធីមួយទៀត គឺដើម្បីជំរុញឲ្យប្រជាពលរដ្ឋខ្មែរទិញផលិតផលខ្មែរយើង។ យើងណែនាំដែរ ធ្វើឲ្យមានគុណភាពឲ្យឆ្ងាញ់ហើយតម្លៃសមរម្យ។ ឧទាហរណ៍បើយើងមានមីយើង រឿងអីទៅទិញមីម៉ាម៉ាគេហូប ដោយសារម៉ាម៉ាគេវាឆ្ងាញ់ មីយើងមិនសូវឆ្ងាញ់មិនដឹងទេណា? អ៊ីចឹងយើងរៀបចំ ២០មុខ ដើម្បីដើរផ្សព្វផ្សាយ ហែក្បួនទាំងអស់ខ្មែរមានរបស់របរលក់ដែរ សូមមេត្តាជួយទិញផលិតផលខ្មែរ»។
ផលិតផលខ្មែរទាំង ២០មុខនោះមានដូចជា អង្កររំដួល ផលិតផលសូត្រ ម្រេច និងអំបិល ជាដើម។ ប៉ុន្តែលោក ស៊ុន ចាន់ថុល មិនបានបញ្ជាក់ទេថា នឹងរៀបចំពិធីហែក្បួនផ្សព្វផ្សាយនេះនៅពេលណានៅឡើយ។
ការថ្លែងនេះ នៅក្នុងសិក្ខាសាលាជាស៊េរី ស្ដីពីវេទិកាពិភាក្សាអំពីវិស័យពាណិជ្ជកម្មនិងអប់រំនៅកម្ពុជា បច្ចុប្បន្ន រៀបចំដោយក្រសួងពាណិជ្ជកម្ម នៅឯវិទ្យាស្ថានបច្ចេកវិទ្យាកម្ពុជា នៅថ្ងៃទី១៩ ខែមីនា ដែលមានយុវជនពីសាកលវិទ្យាល័យនានា ប្រមាណ ២ពាន់នាក់ចូលរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។