ជនជាតិដើមភាគតិច នៅខេត្តស្ទឹងត្រែងមួយចំនួន នាំគ្នាទិញវិទ្យុ ដែលអាចបើកស្ដាប់ពីវិទ្យុអន្តរជាតិ ដូចជា អាស៊ីសេរី (RFA) និងវិទ្យុសំឡេងសហរដ្ឋអាមេរិក (VOA)។ ពួកគាត់អះអាងថា មូលហេតុដែលចង់ស្ដាប់វិទ្យុទាំង២នេះ ដោយសារតែ ផ្សាយព័ត៌មានពិត និងផ្ដល់ចំណេះដឹងដល់ពួកគាត់ ឲ្យចេះថ្លឹងថ្លែងពីស្ថានការណ៍សង្គម ដែលកើតឡើងនៅក្នុងប្រទេស។
ប្រជាពលរដ្ឋនៅខេត្តស្ទឹងត្រែងលើកឡើងថា ប្រសិនបើពួកគាត់ពុំបានស្ដាប់ព័ត៌មានពីវិទ្យុឯករាជ្យទេ ពួកគាត់នឹងមិនទទួលបានព័ត៌មានគ្រប់ជ្រុងជ្រោយឡើយ។
ជនជាតិដើមភាគតិចម្នាក់រស់នៅស្រុកថាឡាបរិវ៉ាត់ ខេត្តស្ទឹងត្រែង ឲ្យដឹងថា តំបន់ពួកគាត់រស់នៅពុំមានវិទ្យុអេហ្វអឹម (FM) ក្នុងស្រុកណាផ្សាយបន្តព័ត៌មាន ពីវិទ្យុឯករាជ្យដូចជាវិទ្យុអាស៊ីសេរី និង វីអូអេ នោះទេ។ លោកបន្ថែមទៀតថា ពលរដ្ឋ ទើបតែដឹងថា ពួកគេអាចបើកស្ដាប់វិទ្យុទាំងនេះបាន ដោយទិញវិទ្យុដែលមានកម្លាំងធំ ដែលមានតម្លៃប្រមាណ ចាប់ពី ៦ម៉ឺនរៀលឡើង។ លោកអះអាងថា សព្វថ្ងៃលោកស្ដាប់វិទ្យុអាស៊ីសេរី តាមរលោកធាតុអាកាសខ្លី (Shortwave) និងវិទ្យុវីអូអេតាមរយៈវិទ្យុអាអឹម (AM) ដែលទិញតម្លៃ ៦ម៉ឺនរៀលនេះ ជារៀងរាល់ថ្ងៃ។
ស្រដៀងគ្នានេះដែរ ពលរដ្ឋនៅខេត្តស្ទឹងត្រែងម្នាក់ទៀត ថ្លែងថា ចាប់ពីរដ្ឋាភិបាលបិទមិនឲ្យវិទ្យុក្នុងស្រុកផ្សាយបន្តព័ត៌មានពីវិទ្យុឯករាជ្យមក ពួកគាត់នៅស្រុកថាឡាបរិវ៉ាត់ នាំគ្នាទិញវិទ្យុដែលមានបង់ច្រើនអាចបើកវិទ្យុអាស៊ីសេរី និងវីអូអេបាន។ ពលរដ្ឋរូបនេះសង្កត់ធ្ងន់ថា មូលហេតុដែលស្ដាប់វិទ្យុអន្តរជាតិទាំង២នេះ ដោយយល់ឃើញថា វិទ្យុទាំងនេះ ផ្សាយព័ត៌មានពិតដោយមិនលាក់លៀមនិងគ្រប់ស្ថានការណ៍ដែលកើតឡើងនៅក្នុងសង្គមបច្ចុប្បន្ន។
ទាក់ទងនឹងបញ្ហានេះ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ លើកឡើងថា មូលហេតុដែលប្រជាពលរដ្ឋចូលចិត្តស្ដាប់វិទ្យុឯករាជ្យ ដោយសារវិទ្យុឯករាជ្យ ផ្ដល់ចំណេះដឹងច្រើនគ្រប់ជ្រុងគ្រប់ជ្រុងជ្រោយដែលវិទ្យុ និងទូរទស្សន៍ក្នុងស្រុក ហើយភាគច្រើនជាស្ថានីយគាំទ្ររដ្ឋាភិបាល មិនហ៊ានចាក់ផ្សាយ។ លោកមានប្រសាសន៍ទៀតថា រដ្ឋាភិបាលគួរតែបើកឲ្យមានវិទ្យុឯករាជ្យ បានផ្សាយបន្តព័ត៌មានដល់វិទ្យុក្នុងស្រុក ឲ្យបានគ្រប់ខេត្តនៅទូទាំងប្រទេស។កាលពីខែសីហាកន្លងទៅ ក្រសួងព័ត៌មានបានបិទការផ្សាយវិទ្យុអេហ្វអឹម ក្នុងស្រុកជាង ១០ស្ថាប័ន ស្មើនឹងប្រមាណជាង ៣០ប្រេកង់ ដែលផ្សាយបន្តព័ត៌មានពីវិទ្យុអាស៊ីសេរី វីអូអេ និងវិទ្យុសំឡេងដើម្បីប្រជាធិបតេយ្យ (វីអូឌី) ។ លោក សន ជ័យ លើកឡើងថា វិទ្យុទាំងនេះ មានសារៈសំខាន់ មួយផ្នែកដើម្បីជួយដល់រដ្ឋាភិបាល ដូចជាការផ្សាយព័ត៌មានអំពើពុករលួយ និងការកាប់បំផ្លាញព្រៃឈើជាដើម ដែលព័ត៌មានក្នុងស្រុកភាគច្រើនមិនហ៊ានចាក់ផ្សាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។