ការប្រឡងសញ្ញាបត្រទុតិយភូមិចំណេះទូទៅ និងបំពេញវិជ្ជានៅសម័យប្រឡងថ្ងៃទី៥ សីហា ឆ្នាំ២០១៣ នេះ មានបេក្ខជនសរុបប្រឡងចំនួនជិត ១១ម៉ឺននាក់ ដែលចែកចេញជា ២៣៤មណ្ឌលនៅ ២៤ខេត្តក្រុងទូទាំងប្រទេស។
យុវតីម្នាក់ដែលទើបតែចេញពីបន្ទប់ប្រឡងនៅមណ្ឌលប្រឡងក្នុងវិទ្យាល័យបាក់ទូក នៅព្រឹកថ្ងៃច័ន្ទ ទី៥ សីហា កញ្ញា មុទិតា មកពីវិទ្យាល័យស៊ីសុវត្ថិ បានឲ្យដឹងថា ការប្រឡងលើកនេះ មិនមានការស៊ីសំណូកពីក្រុមគ្រូបង្រៀនដែលធ្វើអនុរក្សនៅក្នុងបន្ទប់ប្រឡង និងភាពរញ៉េរញ៉ៃដែលបណ្ដាលមកពីការលួចចម្លងគ្នាដូចការប្រឡងលើកមុនៗនោះទេ។
កញ្ញា មុទិតា៖ «ខ្ញុំមានអារម្មណ៍ថា សម្រាប់ការប្រឡងហ្នឹង គេដាក់មកមានកម្រិតពិបាកគួរសម។ ហើយសម្រាប់ក្នុងថ្នាក់វិញ ខ្ញុំគិតថា មានសណ្ដាប់ធ្នាប់ល្អ អត់មានលក្ខណៈរញ៉េរញ៉ៃអីទេ ត្រង់ថា សិស្សលួចមើលប្រសេចប្រសាចអត់មានទេ។ សម្រាប់អនុរក្សក៏បានដាក់វិន័យតឹងរ៉ឹង ដើម្បីឲ្យសិស្សគោរពខ្ជាប់ខ្ជួន ហើយក៏គ្មានការប្រមូលលុយអីដែរ អត់មានទេ»។
ទោះបីជាជារូបភាពទូទៅខាងក្រៅបន្ទប់ប្រឡង មានភាពស្ងប់ស្ងាត់ជាងការប្រឡងលើកមុនៗក៏ពិតមែន ប៉ុន្តែក្នុងមណ្ឌលប្រឡងមួយចំនួននៅរាជធានីភ្នំពេញ និងតាមបណ្ដាខេត្ត នៅតែមានភាពមិនប្រក្រតីច្រើន ដូចជា មានអំពើពុករលួយមួយចំនួនបានកើតឡើង ពីក្រុមអនុរក្ស ការបែកធ្លាយវិញ្ញាសា និងការប្រកាសលក់វិញ្ញាសាជាចំហមុនការប្រឡងពីនាយកសាលា ដែលមានសម្ព័ន្ធភាពជិតស្និទ្ធជាមួយប្រធានមន្ទីរអប់រំជាដើម។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានឲ្យដឹងថា សមាគមរបស់លោកបានរកឃើញថា ការប្រឡងលើកនេះនៅតែមានការបែកវិញ្ញាសា និងអំពើពុករលួយដដែល ជាពិសេសនៅថ្ងៃដំបូង ហើយលោកបានជំរុញឲ្យក្រសួងអប់រំ គួរចាត់វិធានការបន្ទាន់ ដើម្បីទប់ស្កាត់ការបែកធ្លាយវិញ្ញាសាទាំងស្រុងនូវមុខវិជ្ជាមួយចំនួន កាលពីព្រឹកថ្ងៃច័ន្ទ ទី៥ សីហា។
លោកបានបន្តទៀតថា បញ្ហានៃការបែកវិញ្ញាសានេះ បានកើតឡើងដដែលៗ តាំងពីមុនមក រហូតមកទល់ពេលនេះ ក្រសួងអប់រំនៅតែមិនអាចលុបបំបាត់អំពើពុករលួយក្នុងបណ្ដាញប្រព័ន្ធអប់រំនោះបានទៀត៖ «ការប្រឡងបាក់ឌុប ហ្នឹង ក្រសួងអប់រំ ត្រូវតែមានវិធានការបន្ទាន់ ជុំវិញស្ថានភាពមិនប្រក្រតីនៅតាមមណ្ឌលប្រឡងនីមួយៗ ដែលយើងឃើញព្រឹកមិញ មានវិញ្ញាសាគីមី និងជីវវិទ្យា ត្រូវបានបែកធ្លាយទាំងស្រុងតែម្តង។ បញ្ហានេះ វាមិនមែនជារឿងចាស់ទេ ជារឿងដដែលៗ ហើយបញ្ហាដែលក្រសួងមិនបានយកចិត្តទុកដាក់ ឬក៏អាចនិយាយបានថា ការដែលពុករលួយ ការប្រឡិចវិញ្ញាសាឲ្យបែកចេញ គឺជាប្រព័ន្ធតាំងពីថ្នាក់លើរហូតមកដល់ក្រោម។ ហើយកំហុសមិនមែនគ្រូអនុរក្ស និងបេក្ខជនប្រឡងទេ ការដែលទទួលខុសត្រូវខ្ពស់បំផុត គឺក្រសួងអប់រំ»។
ឆ្លើយតបទៅនឹងការចោទប្រកាន់អំពីការបែកធ្លាយវិញ្ញាសានៅថ្ងៃដំបូងនោះ មន្ត្រីក្រសួងអប់រំ ធ្វើការបដិសេធទាំងស្រុងអំពីបញ្ហានេះ។ ប្រធាននាយកដ្ឋានមធ្យមសិក្សានៃក្រសួងអប់រំ លោក អ៊ឹង ង៉ោហុក បានបញ្ជាក់ថា ក្រសួងអប់រំមានសមត្ថភាពគ្រប់គ្រាន់ក្នុងការគ្រប់គ្រងវិញ្ញាសាមិនឲ្យបែកធ្លាយនោះទេ៖ «អ្វីដែលជាការពិត គឺមិនមានទេ មិនមានការបែកវិញ្ញាសាអ្វីទាំងអស់។ មិនមែនយើងឆ្លើយដោយមិនមានមូលដ្ឋានទេ យើងបានឃើញ ហើយគណៈកម្មការយើងចុះគ្រប់លំដាប់ថ្នាក់ទូទាំងប្រទេស។ យើងមានគណៈកម្មការ មានយន្តការត្រួតពិនិត្យ ផ្តល់ព័ត៌មានបន្តបន្ទាប់គ្នា ដូច្នេះហើយខាងក្រសួងមិនមានព័ត៌មានពីរឿងបែកធ្លាយអីគេនោះទេ ក្រៅតែពីសំឡេងដែលគេអ្នកថា បោកប្រាស់ភូតកុហកបំពងសំឡេងបំពុលបរិយាកាសអីនោះទេ»។
ទោះយ៉ាងណា ប្រភពនៅតែអះអាងថា វិញ្ញាសាមួយចំនួននៅតែមានការបែកធ្លាយមុនការប្រឡងដដែល។ ហើយការសូកប៉ាន់គ្រូអនុរក្សដែលជាថ្នូរក្នុងការលួចមើល ក៏បានក្លាយជាទម្លាប់សម្រាប់សិស្សមួយចំនួនធំនៅកម្ពុជា ហើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។