ឯកអគ្គរាជទូតជប៉ុន និងប្រមុខការទូតកម្ពុជាបានចុះហត្ថលេខាលើលិខិតប្ដូរសារ និងកំណត់ហេតុនៃការពិភាក្សា ស្ដីពីហិរញ្ញប្បទានឥតសំណងរបស់ជប៉ុន មានទឹកប្រាក់ប្រមាណ ២៨លាន ៨សែនដុល្លារអាមេរិក ដើម្បីសាងសង់អគារវិទ្យាស្ថានគរុកោសល្យថ្មី២កន្លែង កាលពីព្រឹកថ្ងៃ ទី២០ ស្របនឹងឆ្នាំខួប៦៥ឆ្នាំនៃទំនាក់ទំនងការទូតរវាងប្រទេសកម្ពុជា និងប្រទេសជប៉ុន។
ជប៉ុនផ្ដល់ជំនួយឥតសំណង ជិត២៩លានដុល្លារអាមេរិក ដល់ប្រទេសកម្ពុជា លើគម្រោងសាងសង់អគារវិទ្យាស្ថានគរុកោសល្យថ្មីចំនួន២កន្លែង គឺនៅភ្នំពេញ និងនៅខេត្តបាត់ដំបង ដើម្បីរួមចំណែកបណ្ដុះបណ្ដាលធនធានមនុស្សនៅកម្ពុជា។
ពិធីចុះហត្ថលេខាផ្ដល់ជំនួយឥតសំណងនេះ ធ្វើឡើងនៅក្រសួងការបរទេសកម្ពុជា រវាងរដ្ឋមន្ត្រីក្រសួងការបរទេស លោក ប្រាក់ សុខុន និងលោក ហូរីណូអ៊ូជិ ហ៊ីដេហ៊ីសា (Horinouchi Hidehisa) ឯកអគ្គរាជទូតជប៉ុនប្រចាំប្រទេសកម្ពុជា។
ឯកអគ្គរាជទូតជប៉ុន លោក ហូរីណូអ៊ូជិ ហ៊ីដេហ៊ីសា បានថ្លែងឲ្យដឹងថា ដោយយល់ឃើញធនធានមនុស្សជាសសរទ្រូងនៃប្រទេសជាតិ ជប៉ុនកំពុងរួចចំណែកក្នុងការបណ្ដុះបណ្ដាលធនធានមនុស្សក្នុងវិស័យឧស្សាហកម្មនៃប្រទេសកម្ពុជា តាមកម្មវិធីនានា ដូចជាការសាងសង់សាលារៀនជាដើម។
លោកថ្លែងទៀតថា ជប៉ុនកំពុងតែធ្វើកិច្ចសហប្រតិបត្តិការបច្ចេកទេស ព្រមទាំងរៀបចំកម្មវិធីសិក្សា ដើម្បីដំឡើងសាលាគរុកោសល្យដែលមានកម្មវិធីសិក្សារយៈពេល ៤ឆ្នាំ និងពង្រឹងសមត្ថភាពគ្រូបង្រៀននៅកម្ពុជា។ «»
លោក ហូរីណូអ៊ូជិ ហ៊ីដេហ៊ីសា បានថ្លែងជាភាសាខ្មែរ យ៉ាងដូច្នេះថា៖ «សិស្សដែលបានបញ្ចប់ការសិក្សានៅវិទ្យាស្ថាននឹងក្លាយជាគ្រូបង្រៀននៅតាមសាលារៀននានាក្នុងប្រទេសកម្ពុជា។ ខ្ញុំសង្ឃឹមថា សិស្សានុសិស្សកម្ពុជា ដែលបានទទួលការអប់រំតាមរយៈគ្រូបង្រៀននៅវិទ្យាស្ថាននេះ នឹងចូលរួមចំណែកក្នុងការអភិវឌ្ឍប្រទេសកម្ពុជា»។
លោក ប្រាក់ សុខុន បញ្ជាក់ថា ជំនួយបន្ថែមនេះ នឹងរួមចំណែកធំធេងដល់កំណែទម្រង់វិស័យអប់រំនៅកម្ពុជា ដែលប្រទេសកម្ពុជាបានចាត់ទុកការអភិវឌ្ឍធនធានមនុស្ស ជាអាទិភាពចម្បង។
លោកថ្លែងថា ដើម្បីលើកកម្ពស់ធនធានមនុស្សនៅកម្ពុជា ចាំបាច់បំផុតត្រូវលើកកម្ពស់ចំណេះដឹងរបស់គ្រូបង្រៀន ហើយចាប់ពីឆ្នាំ២០២០ ទៅសិស្សដែលបានបញ្ចប់ការសិក្សាថ្នាក់មធ្យមសិក្សាទុតិយភូមិ ត្រូវបន្តការសិក្សា ៤ឆ្នាំទៀត ទើបអាចក្លាយជាគ្រូថ្នាក់បឋមសិក្សាបាន។
លោកថ្លែងថា៖ «ទន្ទឹមនឹងការបណ្ដុះបណ្ដាលថ្មី តាមស្តង់ដារថ្មី យើងក៏ត្រូវបំពាក់បំប៉នដល់គ្រូដែលកំពុងបម្រើការមួយចំនួនធំ ដើម្បីឲ្យមានកម្រិតគុណវុឌ្ឍិ ឲ្យត្រូវតាមស្តង់ដារថ្មីនេះដែរ ដែលជាហេតុតម្រូវឲ្យយើងពង្រីកលទ្ធភាព និងបង្កើនសមត្ថភាពរបស់សាលាគរុកោសល្យឲ្យបានឆាប់បំផុត»។
លោកថ្លែងទៀតថា អគារវិទ្យាស្ថានគរុកោសល្យថ្មីទាំង២កន្លែងនេះ នឹងត្រូវសាងសង់រួចរាល់ ព្រមទាំងបំពាក់បរិក្ខារឧបទេស ក្នុងពេលដ៏ខ្លីខាងមុខ ដែលអាចនឹងពង្រីកលទ្ធភាព បណ្ដុះបណ្ដាលគ្រូបង្រៀនឲ្យស្របតាមតម្រូវការអភិវឌ្ឍរបស់កម្ពុជា។
លោក ប្រាក់ សុខុន បញ្ជាក់ថា វិទ្យាស្ថានគរុកោសល្យនៅរាជធានីភ្នំពេញ នឹងបណ្ដុះបណ្ដាលគ្រូបង្រៀនក្នុងរាជធានី និងគ្រូពីខេត្តនៅខេត្តចំនួន៥ទៀត គឺមណ្ឌលគិរី រតនគិរី ព្រះវិហារ កោះកុង និងស្ទឹងត្រែង។ ចំណែកឯ វិទ្យាស្ថានគរុកោសល្យខេត្តបាត់ដំបង នឹងជួយបណ្ដុះបណ្ដាលគ្រូនៅខេត្តក្បែរៗនោះ ចំនួន៥ដែរ គឺមានខេត្តប៉ៃលិន ពោធិ៍សាត់ បន្ទាយមានជ័យ ឧត្តរមានជ័យ និងខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។