អ្នកស្រឡាញ់ចូលចិត្តបណ្ឌិត កែម ឡី នៅរាជធានីភ្នំពេញ នាំគ្នារៀបចំធ្វើពិធីរំឭកខួបគម្រប់ ១ឆ្នាំនៃមរណភាពរបស់លោក នៅថ្ងៃទី១០ កក្កដា។ ការរៀបចំពិធីរំឭកខួបនេះ គឺដើម្បីឧទ្ទិសកុសលជូនដល់វិញ្ញាណក្ខន្ធលោក ដែលបានស្លាប់ដោយសារការបាញ់ប្រហារនៅហាងសាំងកាល់តិច ស្ដុបបូកគោ កាលពីថ្ងៃទី១០ ខែកក្កដា ឆ្នាំ២០១៦។ នៅក្នុងខួបគម្រប់ ១ឆ្នាំនេះ មិនមានភាពគគ្រឹកគគ្រេងដូចឆ្នាំមុនទេ។
ពិធីរំឭកខួបគម្រប់ ១ឆ្នាំនៃមរណភាពរបស់អ្នកវិភាគបញ្ហាសង្គម គឺបណ្ឌិត កែម ឡី ដែលត្រូវឃាតកបាញ់សម្លាប់នៅថ្ងៃទី១០ ខែកក្កដា ឆ្នាំ២០១៦ ត្រូវបានក្រុមយុវជន អង្គការសង្គមស៊ីវិល និងព្រះសង្ឃ ប្រារព្ធធ្វើជាទ្រង់ទ្រាយតូចៗពីរកន្លែងនៅភ្នំពេញ គឺនៅហាងសាំងកាល់តិច (Caltex) បូកគោ និងនៅវត្តចាស់។
ក្រុមយុវជនមួយក្រុម តំណាងសហជីព និងអង្គការសង្គមស៊ីវិលជាង ៣០នាក់ និងព្រះសង្ឃ ២អង្គ នាំគ្នាតាំងរូបថតបណ្ឌិត កែម ឡី និងដាក់កម្រងផ្កានៅហាងសាំងកាល់តិច (Caltex) ស្ដុបបូកគោ ធ្វើពិធីបង្សុកូលមួយរយៈពេលខ្លីក្រោមការឃ្លាំមើលពីអាជ្ញាធរ។
អគ្គលេខាធិការនៃសម្ព័ន្ធសហគមន៍កសិករកម្ពុជា លោក ថេង សាវឿន ថ្លែងទាក់ទងនឹងឃាតកម្មបណ្ឌិត កែម ឡី នៅឯពិធីនេះថា អ្នកធ្វើការផ្នែកសង្គមនៅកម្ពុជា តែងតែប្រឈមការជាប់ពន្ធនាការ ការបាញ់ប្រហារបែបនេះ ដែលធ្វើឲ្យយុវជនភ័យខ្លាច ប៉ុន្តែលោកនៅតែទទូចឲ្យយុវជនហ៊ាននិយាយពីបញ្ហាសង្គមដដែល៖ « ទន្ទឹមនឹងការភ័យខ្លាចនេះ ខ្ញុំលើកទឹកចិត្តឲ្យពលរដ្ឋកម្ពុជា និងយុវជន ហ៊ាននិយាយការពិត ជាជាងនិយាយការពារដូចអ្វីដែលលោកបណ្ឌិត កែម ឡី បន្សល់ នូវបណ្ដាំ ។ អ្វីដែលគាត់និយាយ គឺសម្រាប់ការពិត ដើម្បីធ្វើម៉េចឲ្យប្រជាពលរដ្ឋបានយល់ដឹង។ នៅពេលប្រជាពលរដ្ឋបានយល់ដឹង ប្រព័ន្ធនៃការគោរពច្បាប់ សិទ្ធិមនុស្ស និងលទ្ធិប្រជាធិបតេយ្យនៅកម្ពុជា នឹងមានភាពល្អប្រសើរ » ។
នៅស្របពេលដែលពលរដ្ឋខ្មែររំឭកខួបលើកទី១ នៃការស្លាប់របស់បណ្ឌិត កែម ឡី ស្ថានទូតអាមេរិក នៅប្រទេសកម្ពុជា ក៏បញ្ចេញសារចូលរួមរំឭកអំពីការងារ និងជីវិតរបស់លោកដែរ។ សារស្ថានទូតអាមេរិក បន្តថា យើងសូមសម្ដែងសមានទុក្ខសាជាថ្មីចំពោះគ្រួសាររបស់លោក កែម ឡី ដែលកំពុងរង់ចាំ ហើយសង្ឃឹមថាអ្នកប្រព្រឹត្តិ នឹងត្រូវបានចាប់ឲ្យមកទទួលខុសត្រូវពេញលេញចំពោះអំពើលីលា និងដ៏កំសាកនេះ។
សកម្មជនសង្ឃផ្នែកសិទ្ធិមនុស្ស គឺព្រះភិក្ខុ លួន សុវ៉ាត មានថេរដីការំឭកថា អ្វីដែលបណ្ឌិត កែម ឡី និយាយពីបញ្ហាសង្គម លោកតែងមានភស្តុតាង និងព័ត៌មានច្បាស់លាស់៖ « គាត់ ព្រៃឈើមានការរុករានទន្ទ្រានការកាប់បំផ្លាញ ។ អ៊ីចឹងអ្វីដែលគាត់វិភាគ យើងមើលឃើញ យើងទាំងអស់គ្នាស្ដាប់គាត់និយាយ ហើយយើងមើលទៅព្រៃ គឺបាត់ព្រៃមែន គឺគាត់មិនបាននិយាយភូតកុហក ញុះញង់បោកប្រាស់អីទេ ។ អ៊ីចឹងគោលការណ៍ សំខាន់ដែល គាត់មាន ទាំង កាយវាចា ចិត្ត គឺសច្ចធម៌ជាធំ គុណធម៌ជាធំ សីលធម៌ជាធំ និងយុត្តិធម៌ជាធំ តាមបែបប្រជាធិបតេយ្យ » ។
ដោយឡែកនៅឯវត្តពោធិយារាម ហៅវត្តចាស់ វិញ ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ រួមនឹងព្រះសង្ឃ ១១អង្គផ្សេងទៀត ក៏បានរៀបចំពិធីសូត្រធម៌បង្សុកូលដល់បណ្ឌិត កែម ឡី ដែរ។ ព្រះអង្គមានថេរដីកាថា ការធ្វើពិធីតូចនេះ គឺគ្រាន់តែជាការធ្វើមិនឲ្យដាច់ពីកន្លែងធ្វើបុណ្យពេលលោក កែម ឡី ស្លាប់ខួប ៧ថ្ងៃ និង ១០០ថ្ងៃ ហើយក៏ចង់ឲ្យអ្នកចូលរួមមូលគ្នាច្រើននៅឯពិធីបុណ្យឯខេត្តតាកែវ ដែរ៖ « ដូច្នេះបើយើងធ្វើទីនេះ បើសិនជា អាត្មាប្រកូកប្រកាសរកញាតិញោម វាបែកកម្លាំងទៅចូលរួមជួយនៅឯខេត្តតាកែវ ហើយ ក៏សាធារណជន មើលមកថា ហេតុម៉េចបានជាយើងមិនសាមគ្គីគ្នា ?» ។
ព្រះអង្គមានថេរដីកាបញ្ជាក់ថា ព្រះអង្គគ្រោងធ្វើពិធីបុណ្យធំនៅឆ្នាំ២០១៨ គម្រប់ខួប ២ឆ្នាំ។
ក្រៅពីព្រះសង្ឃ ១២អង្គ មានពុទ្ធបរិស័ទ ៥រូប ចូលរួមពិធីនេះដែរ។ ពលរដ្ឋនៅភ្នំពេញម្នាក់ក្នុងចំណោម ៥នាក់ដែលចូលរួមពិធីបង្សុកូលនៅវត្តចាស់ នៅព្រឹកថ្ងៃទី១០ កក្កដា លោកស្រី សុខ លាង ថ្លែងថា លោកស្រីស្រណោះណាស់ដែលថ្ងៃខួបរបស់បណ្ឌិត កែម ឡី ឆ្នាំដំបូងនេះមានសភាពស្ងាត់។ លោកស្រីចង់ឲ្យមានពិធីបុណ្យធំដូចកាលពីឆ្នាំ២០១៦៖ « ខ្ញុំក៏ស្នើសុំអាជ្ញាធរសាលា រាជធានី សុំ បើកចិត្តឲ្យទូលាយ ដើម្បីឲ្យប្រជាពលរដ្ឋបានធ្វើបុណ្យរំឭកខួបលោកបណ្ឌិត កែម ឡី ព្រោះ អីលោក បណ្ឌិតហ្នឹងគាត់អត់មានសត្រូវជាមួយរដ្ឋាភិបាល ឬក៏បងប្អូនទាំងអស់ទេ ។ គាត់គ្រាន់ តែនិយាយ ការពិតនៃអ្វីដែលគាត់បានឃើញនៅក្នុងសង្គម។ អ៊ីចឹងគាត់ហ៊ាននិយាយការពិត អ្វីៗទាំង អស់ គឺមិនមែនឆ្លុះបញ្ចាំងថាគាត់ហ្នឹងប្រឆាំងរដ្ឋាភិបាល ឬមិនពេញចិត្តរដ្ឋាភិបាលទេ គឺ គាត់ចង់ ឲ្យសង្គមក្នុងប្រទេសខ្មែរយើង មានការដឹកនាំល្អ ហើយរីកចម្រើនតែប៉ុណ្ណោះ » ។
អាជ្ញាធររាជធានីភ្នំពេញកាលពីថ្ងៃទី៩ កក្កដា បានរារាំងក្រុមសហជីព និងយុវជនមិនអនុញ្ញាតឲ្យពួកគេយករូបថតលោកបណ្ឌិត កែម ឡី និងដាក់កម្រងផ្កា ដើម្បីដាក់តាំងគោរពវិញ្ញាណក្ខន្ធលោកបណ្ឌិតនៅឯស្តារម៉ាតកាល់តិច ស្ដុបបូកគោ ជាទីដែលឃាតកបាញ់សម្លាប់លោកបណ្ឌិត កាលពីថ្ងៃទី១០ ខែកក្កដា ឆ្នាំ២០១៦ នោះឡើយ។ ទោះបីជាបែបនេះក្ដី ការប្រារព្ធពិធីបង្សុកូលដល់បណ្ឌិត កែម ឡី នៅព្រឹកថ្ងៃទី១០ កក្កដា នៅកន្លែងដដែលនេះ បានប្រព្រឹត្តទៅរហូតដល់ចប់ ដោយមិនមានការរារាំងពីអាជ្ញាធរដែនដីទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។