កម្មកររោងចក្រនៅតំបន់សេដ្ឋកិច្ចពិសេសខេត្តកោះកុងជាង ១០០នាក់ ដួលសន្លប់ជាបន្តបន្ទាប់ នៅព្រឹកថ្ងៃទី២៣ ខែមករា។ ទោះយ៉ាងណា ពួកគេត្រូវបានបញ្ជូនទៅសង្គ្រោះនៅក្នុងមន្ទីរពេទ្យបង្អែកខេត្តកោះកុងទាន់ពេលវេលា។
កម្មករជាង ១០០នាក់ ដែលដួលសន្លប់នោះ មកដល់ល្ងាចថ្ងៃទី២៣ ខែមករា គឺមួយចំនួនបានវិលត្រឡប់ទៅសម្រាកនៅផ្ទះរបស់ខ្លួនវិញហើយ ចំណែកមួយចំនួនទៀត បន្តដេកសម្រាកព្យាបាលនៅក្នុងមន្ទីរពេទ្យបង្អែកខេត្តកោះកុងនៅឡើយ។
សាច់ញាតិកម្មករម្នាក់ រៀបរាប់ថា មូលហេតុដែលកម្មករដួលសន្លប់នោះ គឺដោយសារចំហាយក្លិនប្រេងរបស់ត្រាក់ទ័រ អ៊ិចស្កាវេទ័រ (excavator) ដែលបែកធ្លាយ ខណៈកំពុងបុកគ្រឹះសាងសង់រោងចក្រ៖ «ទៅដល់ទីនោះ ខ្ញុំឃើញមានអ្នកខ្លះក្អួត អ្នកខ្លះសន្លប់ច្រើនដែរ តែឡានដឹកបញ្ជូន មកទាន់ហេតុការណ៍»។
រោងចក្រដែលកម្មករដួលសន្លប់នោះ មានឈ្មោះថា ខេខេអិន (KKN) ស្ថិតក្នុងតំបន់សេដ្ឋកិច្ចពិសេសខេត្តកោះកុង នៅក្នុងឃុំបាក់ខ្លង ស្រុកមណ្ឌលសីមា។
ប្រធានមន្ទីរពេទ្យបង្អែកខេត្តកោះកុង លោក ឡៃ ហៃសុន មានប្រសាសន៍បញ្ជាក់ថា កម្មករដែលដួលសន្លប់នោះ គឺមានចំនួន ១២៧នាក់។ លោកបញ្ជាក់ថា មូលហេតុដែលកម្មករដួលសន្លប់នោះ គឺដោយសារក្លិនប្រេងរថយន្តបុកគ្រឹះ ដែលបែកធ្លាយ ហើយសាយភាយចូលទៅក្នុងរោងចក្រ។ ម្យ៉ាងទៀត ការដែលមានអ្នកដួលសន្លប់ច្រើននោះ គឺដោយសារពួកគាត់ មានអារម្មណ៍ភ័យខ្លាចតគ្នា៖ «ធំក្លិនឈួលប្រេងឧស្ម័នផ្សេង ដែលបានបឺតតាមកង្ហាររោងចក្រ ធ្វើឲ្យពួកគេចាប់ផ្ដើមវិលមុខ ហើយដួល។ ដំបូងដួលពីរបីនាក់ តែក្រោយមកដួលតៗគ្នាអ៊ីចឹងទៅ។ នេះគឺខ្ញុំដឹងព័ត៌មានពីកម្មកររោងចក្រ។ ក្រៅពីនេះ យើងបានគ្រប់គ្រងស្ថានការណ៍ព្យាបាល ទាន់ពេលវេលា ហើយឥឡូវនេះ គឺគាត់បានធូរស្បើយអស់ហើយ»។
អាស៊ីសេរីមិនទាន់អាចសុំការឆ្លើយតបពីតំណាងរោងចក្របានទេ នៅថ្ងៃទី២៣ ខែមករា។ ចំណែកប្រធានមន្ទីរការងារខេត្តកោះកុង លោក យក់ សង្វាត មិនទទួលទូរស័ព្ទ។
រីឯអ្នកសម្របសម្រួលអង្គការលីកាដូ (Licadho) ប្រចាំខេត្តកោះកុង អ៊ិន គង់ជិត ឲ្យដឹងថា ក្នុងពេលកើតហេតុនោះ គឺកម្មករដែលដួលសន្លប់ត្រូវបានគេជួយដឹកបញ្ជូនមកសង្គ្រោះបន្ទាន់ នៅក្នុងមន្ទីរពេទ្យ ខណៈដែលអ្នកមិនដួលសន្លប់វិញ ត្រូវបានក្រុមហ៊ុនរោងចក្រ តម្រូវឲ្យបំពេញការងារធម្មតា។ លោកថា ក្រុមហ៊ុនគួរតែអនុញ្ញាតឲ្យកម្មករផ្អាកការងារមួយរយៈសិន ដើម្បីស្រាវជ្រាវរកហេតុផលឲ្យបានច្បាស់ និងជៀសវាងការដួលសន្លប់ជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។