គ្រូបង្រៀនចំនួន ២៤នាក់ នៅវិទ្យាល័យគូលែន ស្រុកគូលែន ចម្ងាយជាង ៤០គីឡូម៉ែត្រភាគខាងត្បូងពីទីរួមខេត្តព្រះវិហារ នៅតែបន្តទាមទារឲ្យមន្ទីរអប់រំ យុវជន និងកីឡា ទទួលខុសត្រូវលើការបើកប្រាក់បង្រៀនបន្ថែមម៉ោងមកឲ្យពួកគេ។
ការទាមទារដែលធ្វើឡើងតាំងតែពីថ្ងៃទី១១ ខែមិថុនា រហូតមកដល់ពេលនេះ មិនមានផ្នែកពាក់ព័ន្ធណាមួយចេញមុខដោះស្រាយឲ្យបានត្រឹមត្រូវនៅឡើយទេ។
មន្ទីរអប់រំ យុវជន និងកីឡា ខេត្តព្រះវិហារ បានសម្រេចដកនាយកវិទ្យាល័យគូលែន ចេញពីតួនាទីហើយ នៅក្នុងពេលដែលសាលានេះកំពុងតែមានបញ្ហាទាមទារបើកប្រាក់បង្រៀនបន្ថែមម៉ោង។ ការដកតួនាទីនាយកសាលានេះ ធ្វើឡើងបន្ទាប់ពីរយៈពេលជាង ១០ថ្ងៃមកនេះ ក្រុមគ្រូបង្រៀនចំនួន ២៤នាក់ បានធ្វើកូដកម្មផង និងស្វែងរកអន្តរាគមន៍ពីមន្ត្រីក្រសួងអប់រំមួយចំនួនផង ដើម្បីទាមទារឲ្យមានការបើកប្រាក់បង្រៀនបន្ថែមម៉ោង ដែលពួកគេខំប្ដូរញើសឈាមបង្រៀនសិស្សជិត ១ឆ្នាំ។
គ្រូបង្រៀនម្នាក់ក្នុងចំណោមអ្នកតវ៉ា ២៣នាក់ផ្សេងទៀត គឺលោក រស់ វាសនា។ លោកមានប្រសាសន៍កាលពីរសៀលថ្ងៃច័ន្ទ ទី២២ ខែមិថុនា ថា កាលពីព្រឹកថ្ងៃដដែលនេះ លោក ប៊ុន ចាន់ផល្លា បានប្រកាសប្រាប់គ្រូបង្រៀនទាំងអស់ ចំពោះការលាលែងពីនាយកវិទ្យាល័យគូលែន។ គ្រូបង្រៀនដដែលបញ្ជាក់ថា ថ្វីត្បិតតែនាយកវិទ្យាល័យគូលែន សុខចិត្តលាលែងពីតំណែងក៏ដោយ ក៏ក្រុមរបស់លោកមិនបញ្ឈប់ការទាមទាររឿងបើកប្រាក់បង្រៀនបន្ថែមម៉ោងទេ ពីព្រោះនាយកសាលារូបនេះបានរៀបចំកាលវិភាគដាក់ឲ្យលោកគ្រូអ្នកគ្រូ បង្រៀនសិស្សបន្ថែមម៉ោងរយៈពេលជិត ៣ត្រីមាសទៅហើយ៖ «សំណូមពរឲ្យក្រសួងអប់រំ យុវជន និងកីឡា ឯកឧត្តមបណ្ឌិត ហង់ ជួនណារ៉ុន ជួយដោះស្រាយរឿងលុយបង្រៀនបន្ថែមម៉ោង ពីព្រោះលុយម៉ោងមានរយៈពេលជិត ១ឆ្នាំហើយ»។
ចាប់តាំងពីថ្ងៃទី១១ ខែមិថុនា ក្រុមគ្រូបង្រៀនចំនួន ២៤នាក់ ក្នុងចំណោមគ្រូបង្រៀនទាំងអស់ ៣០នាក់នៅវិទ្យាល័យគូលែន បានធ្វើកូដកម្មមិនចូលបង្រៀនសិស្សជាច្រើនថ្ងៃ ដោយសារតែទាមទារបើកប្រាក់បង្រៀនបន្ថែមម៉ោងនេះ។
ទោះយ៉ាងណា វិទ្យុអាស៊ីសេរី មិនអាចទាក់ទង លោក ប៊ុន ចាន់ផល្លា ជានាយកវិទ្យាល័យគូលែន និងលោក ហន ឆន ប្រធានមន្ទីរអប់រំ យុវជន និងកីឡា ខេត្តព្រះវិហារ ដើម្បីសុំការបំភ្លឺជុំវិញការទាមទាររបស់ក្រុមគ្រូបង្រៀននេះបានថាយ៉ាងណានៅឡើយ នៅថ្ងៃច័ន្ទ ទី២២ ខែមិថុនា។
ចំណែកប្រធានសាខាសមាគមគ្រូបង្រៀនកម្ពុជាឯករាជ្យ ខេត្តព្រះវិហារ លោក ធួន ពុធ មានប្រសាសន៍ថា ការរៀបចំកាលវិភាគឲ្យគ្រូបង្រៀនបន្ថែមម៉ោងនេះ គឺជាកំហុសរបស់មន្ទីរអប់រំ យុវជន និងកីឡា ខេត្តព្រះវិហារ ពីព្រោះមន្ទីរអប់រំ មិនបានឆ្លើយប្រាប់មកវិញថា សាលានោះមិនមាននិយាមបន្ថែមម៉ោងឲ្យទាន់ពេលវេលា៖ «តាមផ្លូវច្បាប់ បើកាលណាគ្រូនៅតែទាមទារ គឺមន្ទីរអប់រំ ជាអ្នកត្រូវទទួលខុសត្រូវទាំងអស់ ព្រោះចំណាត់ការរឿងហ្នឹងមិនមែននាយកសាលាគាត់ធ្វើខ្លួនឯងទេ»។
លោក ធួន ពុធ បង្ហាញជំហរថា ប្រសិនបើគ្រូបង្រៀននៃវិទ្យាល័យគូលែន នៅតែបន្តការទាមទារបើកប្រាក់បង្រៀនបន្ថែមម៉ោង គឺលោកនឹងជួយតវ៉ារឿងនេះដែរ ពីព្រោះវាគឺជាញើសឈាមរបស់គ្រូបង្រៀន មិនគួរឲ្យមន្ទីរអប់រំ យុវជន និងកីឡា ខេត្តព្រះវិហារ និងក្រសួង ត្រូវបំភ្លេចចោលដោយងាយៗឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។