មន្ត្រីពន្ធនាគារនៃមណ្ឌលអប់រំកែប្រែទី២ នៃពន្ធនាគារព្រៃស ចាត់ទុកថា នេះជាការរួមចំណែកសម្រាប់កម្មវិធីមនុស្សធម៌មួយដ៏សំខាន់ និងចាំបាច់សម្រាប់ទណ្ឌិត។
ជារៀងរាល់ឆ្នាំ នៅថ្ងៃទី១ មិថុនា អង្គការការពារសិទ្ធិមនុស្សលីកាដូ និងអង្គការដែលជាដៃគូពាក់ព័ន្ធផ្សេងទៀត តែងយកអំណោយ និងសម្ភារៈប្រើប្រាស់នានា ចែកចាយដល់ទណ្ឌិតជាកុមារ និងស្ត្រីមានផ្ទៃពោះនៅតាមពន្ធនាគារក្នុងប្រទេសកម្ពុជា។
លោក អំ សំអាត អ្នកគ្រប់គ្រងបច្ចេកទេសស៊ើបអង្កេតរបស់អង្គការលីកាដូ មានប្រសាសន៍នៅថ្ងៃទី៣១ ឧសភា ថា អ្វីដែលអង្គការរបស់លោកជ្រើសរើសយកថ្ងៃទី១ មិថុនា ដើម្បីជួបជុំជាមួយកុមារ និងស្ត្រីមានផ្ទៃពោះក្នុងពន្ធនាគារ ធ្វើឡើងក្នុងន័យដើម្បីឆ្លើយតបទៅនឹងសេចក្ដីប្រកាសជាសកលស្ដីពីសិទ្ធិកុមាររបស់អង្គការសហប្រជាជាតិ។ លោកបន្តថា តាមពិតបេសកកម្មស្ដីពីមនុស្សធម៌នេះ គេអាចធ្វើបានគ្រប់ពេល និងគ្រប់ទីកន្លែង។ ប៉ុន្តែ ថាអ្វីដែលអង្គការលីកាដូ ជ្រើសរើសពន្ធនាគារជាតំបន់គោលដៅឲ្យចំនឹងថ្ងៃទី១ មិថុនា នេះ គឺជាផ្នែកមួយដើម្បីផ្ដល់ឱកាសដល់កុមារ និងស្ត្រីដែលត្រូវបាត់បង់សិទ្ធិ ព្រោះតែការឃុំខ្លួនក្នុងពន្ធនាគារ។
លោក អំ សំអាត៖ «កុមារដែលតាមម្ដាយនៅក្នុងពន្ធនាគារ ក៏ដូចជាកុមារនៅក្នុងផ្ទៃម្ដាយនោះ ត្រូវការចាំបាច់នៅសម្ភារៈក្នុងការប្រើប្រាស់ ឬក៏ម្ហូប ឬក៏អាហារបំប៉នបន្ថែមទៀត។ ប៉ុន្តែ ដោយសារតែការផ្ដល់នៅអាហារបំប៉ន ឬក៏សម្ភារៈផ្សេងៗនេះ មិនមែនចាំថ្ងៃ ១មិថុនាទេ។ វាទៅតាមតម្រូវការចាំបាច់ផងដែរ ប៉ុន្តែថ្ងៃនេះ គឺជាថ្ងៃដែលយើងចាត់ទុកថាជាថ្ងៃពិសេសសម្រាប់ពួកគេ»។
អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ អ្នកស្រី សុខ សម្បត្តិ មានប្រសាសន៍ថា អ្វីដែលអង្គការលីកាដូ អនុវត្តគម្រោងរបស់ខ្លួនលើបេសកកម្មនេះ ចាត់ទុកថាជាការរួមចំណែកកម្មវិធីមនុស្សធម៌ដ៏សំខាន់ដល់ទណ្ឌិតនៅតាមពន្ធនាគារ។ អ្នកស្រីបន្តថា អង្គការលីកាដូ មិនត្រឹមតែរួចចំណែក ស្មារតី ផ្នែកសម្ភារៈ ប៉ុណ្ណោះទេ ប៉ុន្តែថា អង្គការមួយនេះ និងអង្គការដៃគូពាក់ព័ន្ធផ្សេងទៀត ក៏ជាផ្នែកមួយកំពុងជួយកសាងសមត្ថភាពផ្នែកចំណេះដឹងថែមទៀត ដែលមិនអាចខ្វះបានជាមួយរដ្ឋាភិបាល៖ «ខ្ញុំក៏មានមោទនភាពដែរ ដោយសារថាកម្មវិធីនេះបង្កនូវលក្ខណៈសប្បាយរីករាយឲ្យជនជាប់ឃុំទាំងអស់។ ហើយក៏ឆ្លុះបញ្ចាំងពីការយកចិត្តទុកដាក់របស់ក្រសួងមហាផ្ទៃ ក៏ដូចជាថ្នាក់ដឹកនាំ ហើយនិងអគ្គនាយកដ្ឋានពន្ធនាគារ គឺឲ្យតែមានសំណូមពរពីបណ្ដាអង្គការផ្សេងៗ យើងតែងតែស្វាគមន៍»។
របាយការណ៍របស់អង្គការលីកាដូ ចុះថ្ងៃទី៣១ ឧសភា ឲ្យដឹងថា អ្នកទោសជាអនីតិជនសរុបប្រមាណជិត ៥០០នាក់ ដែលកំពុងជាប់ឃុំនៅក្នុងពន្ធនាគារទាំង ១៤ពន្ធនាគារ នៅទូទាំងប្រទេសកម្ពុជា។ ក៏ប៉ុន្តែ របាយការណ៍សង្កត់ធ្ងន់ថា ចំនួននេះបានធ្លាក់ចុះ បើប្រៀបធៀបដូចគ្នាទៅនឹងឆ្នាំ២០១២។ មូលហេតុនៃការថយចុះនេះ ព្រោះមួយផ្នែកធំ ដោយសារអគ្គនាយកដ្ឋានពន្ធនាគារថ្មីៗនេះបានផ្លាស់ប្ដូររបៀបកំណត់អ្នកទោសជាអនីតិជន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។