មន្ត្រីរដ្ឋាភិបាលតំណាងថៅកែរោងចក្រ និងតំណាងសហជីពកម្មករ បន្តជួបពិភាក្សាគ្នាទៅលើការកំណត់ប្រាក់ឈ្នួលអប្បបរមាប្រចាំឆ្នាំរបស់កម្មកររោងចក្រកាត់ដេរនៅកម្ពុជា។ គណៈកម្មការប្រឹក្សាការងារនឹងប្រជុំសម្រេចចុងក្រោយបញ្ហាប្រាក់ឈ្នួលនេះ នៅថ្ងៃទី៣០ ខែមិថុនា ដើម្បីសម្រេចថា តើត្រូវកំណត់ប្រាក់ឈ្នួលអប្បបរមាជូនកម្មករសម្រាប់ឆ្នាំ២០១៥ ចំនួនប៉ុន្មាន?
គណៈកម្មការប្រឹក្សាការងារដែលមានសមាសភាពមន្ត្រីរដ្ឋាភិបាល ភាគីថៅកែរោងចក្រ និងតំណាងសហជីពកម្មករ ដឹកនាំដោយលោក អ៊ិត សំហេង រដ្ឋមន្ត្រីក្រសួងការងារ នៅព្រឹកថ្ងៃច័ន្ទ ទី១៦ ខែមិថុនា បើកកិច្ចប្រជុំពិភាក្សាដើម្បីកំណត់ប្រាក់ឈ្នួលប្រចាំឆ្នាំនីមួយៗ របស់កម្មកររោងចក្រកាត់ដេរ។
លោក ជួន មុំថុល អនុប្រធានគណៈកម្មការប្រឹក្សាការងារជាតំណាងកម្មករនិយោជិតមានប្រសាសន៍ថា លទ្ធផលនៃកិច្ចប្រជុំនេះ បានអនុម័តជាឯកច្ឆន្ទទៅលើអនុសាសន៍ទាំង៥ របស់សិក្ខាសាលាពិគ្រោះយោបល់ថ្នាក់ជាតិបីភាគី ស្ដីពីការពង្រឹងដំណើរការនៃការកំណត់ប្រាក់ឈ្នួលអប្បបរមាក្នុងប្រទេសកម្ពុជា កាលពីថ្ងៃទី២៤ និងទី២៥ ខែមេសា ឆ្នាំ២០១៤។
លោកបន្តថា កិច្ចប្រជុំត្រីភាគីបានសម្រេចជាឯកច្ឆន្ទទៅលើអនុសាសន៍ ៥ចំណុច ក្រោមជំនួយបច្ចេកទេសរបស់អង្គការអន្តរជាតិខាងការងារ ឬហៅកាត់អាយឡូ (ILO)។
អនុសាសន៍ទាំង ៥ចំណុច ដែលគណៈកម្មការប្រឹក្សាការងារសម្រេចជាឯកច្ឆន្ទ និងចេញសេចក្ដីថ្លែងការណ៍រួមមាន ព្រមទទួលយកវិធីសាស្ត្រនៃការអនុម័តសេចក្ដីសម្រេចរបស់គណៈកម្មការប្រឹក្សាការងារ ដោយយន្តការកុងសង់ស៊ីស។ កំណត់យកដើមត្រីមាសទី៣ នៃឆ្នាំនីមួយៗ ពិភាក្សានិងអនុម័តទៅលើការផ្ដល់ប្រាក់ឈ្នួលអប្បបរមាជូនកម្មករ និងកំណត់យកដើមត្រីមាសទី៤ នៃឆ្នាំនីមួយៗ ដើម្បីចេញប្រកាសស្ដីពីប្រាក់ឈ្នួលអប្បបរមាសម្រាប់ឆ្នាំបន្ទាប់ ដោយចាប់អនុវត្តពីថ្ងៃទី១ ខែមករា នៃឆ្នាំបន្ទាប់ជាដើម។
លោក ជួន មុំថុល បញ្ជាក់ថា ការកំណត់ប្រាក់ឈ្នួលកម្មករប្រចាំឆ្នាំនីមួយៗ នឹងសម្រេចនៅក្នុងកិច្ចប្រជុំនៅថ្ងៃទី៣០ ខែមិថុនា ឆ្នាំ២០១៤៖ «ប្រាំចំណុចដែលអនុម័តហ្នឹងជាលទ្ធផលល្អដែលយើងរកឃើញថា សហជីព ៧ រដ្ឋាភិបាល ៧រូប និងនិយោជក ៤រូប។ បានន័យថា អ្នកទាំងអស់ហ្នឹងបានអនុម័តទាំងអស់ដោយសំឡេងកុងសង់ស៊ីស ហើយខ្ញុំព្រឹកមិញក៏ចម្លែក ហើយសប្បាយចិត្ត ព្រោះមិនដែលឃើញកិច្ចប្រជុំកន្លងមកមានអ៊ីចឹងទេ។ បើប្រជុំលើកក្រោយៗទៀតមានអ៊ីចឹងទៀត គឺល្អមែនទែន ជាពិសេសការជជែករឿងប្រាក់ឈ្នួលកម្មករនាថ្ងៃខាងមុខ»។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ឬហៅកាត់ស៊ីខាវឌូ (C-CAWDU) ដែលចូលរួមក្នុងកិច្ចប្រជុំឲ្យដឹងថា កិច្ចប្រជុំនៅព្រឹកថ្ងៃច័ន្ទ ទី១៦ ខែមិថុនា នេះ ផ្នែកពាក់ព័ន្ធបានលើកយកពីនីតិវិធី ឬការងារបច្ចេកទេសក្នុងការកំណត់ប្រាក់ខែគោលកម្មករចាប់ពីឆ្នាំ២០១៥ តទៅ គឺមិនមែនជាកិច្ចប្រជុំពិភាក្សាដំឡើងប្រាក់ខែគោល ១៦០ដុល្លារ ដែលក្រុមកម្មករទាមទារកន្លងមកទេ។
លោក អាត់ ធន់៖ «ការជជែកគ្នាហ្នឹងទាល់តែកុងសង់ស៊ីសគ្នា ឬទាល់តែឯកភាពគ្នារបស់សមាជិកគណៈកម្មការហ្នឹង។ ប៉ុន្តែការជជែកទៅការរកសំឡេងរួមនោះវាពិបាក។ អ៊ីចឹងគេបានជជែកថា រកចំណុចរួមកុងសង់ស៊ីសរួម ប្រជុំលើកទី១ មិនបាន អ៊ីចឹងគេនឹងកោះប្រជុំលើកទី២ ម្ដងទៀត ប៉ុន្តែបើមិនសម្រេចទេ គេនឹងបោះឆ្នោតដោយសម្ងាត់ និងដោយសំឡេងភាគច្រើន។ អាហ្នឹងគឺវាខុសពីមុនៗ គេបោះឆ្នោតដោយលើកដៃអីអ៊ីចឹងទៅ»។
ទាក់ទិនបញ្ហានេះ កាលពីថ្ងៃទី២៤ ខែធ្នូ ឆ្នាំ២០១៣ ក្រុមកម្មករនិងសហជីពមួយចំនួន បានទាមទារដំឡើងប្រាក់ខែទាបបំផុត ១៦០ដុល្លារក្នុង ១ខែ និងឈានដល់ក្រុមកម្មករប្រមូលផ្តុំគ្នាធ្វើបាតុកម្ម ចន្លោះពីថ្ងៃទី២៤ ខែធ្នូ ឆ្នាំ២០១៣ ដល់ថ្ងៃទី៣ ខែមករា ឆ្នាំ២០១៤។
ការតវ៉ានេះ ត្រូវសមត្ថកិច្ចចម្រុះប្រដាប់អាវុធរដ្ឋាភិបាលបង្ក្រាបដោយហិង្សា ដោយបណ្ដាលឲ្យកម្មករស្លាប់ ៥នាក់ និងរងរបួសរាប់សិបនាក់។ ក្នុងនោះសមត្ថកិច្ចបានចាប់ខ្លួនមនុស្សចំនួន ២៣នាក់ យកទៅផ្ដន្ទាទោសនិងដាក់ពន្ធនាគារ។
ទោះយ៉ាងណា ការទាមទាររបស់ក្រុមកម្មករមិនទាន់ទទួលបានលទ្ធផលល្អទេ គឺរដ្ឋាភិបាលបានសម្រេចដំឡើងប្រាក់ខែគោល ជូនកម្មករត្រឹមចំនួន ១០០ដុល្លារ ក្នុង១ខែ ហើយចាប់អនុវត្តពីខែកុម្ភៈ ឆ្នាំ២០១៤ មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។