បុគ្គលិកបម្រើការងារក្រុមហ៊ុនទូរស័ព្ទឯកជន ឈ្មោះ អឹមហ្វូន (MFone) ដែលក្ស័យធនតាំងពីឆ្នាំមុនមិនទាន់បើកប្រាក់អតីតភាពការងារចុងក្រោយ ៣០% ដល់បុគ្គលិកនៅសល់នៅឡើយ។ បញ្ហានេះនាំឲ្យបុគ្គលិកទាំងនោះលើកគ្នាតវ៉ាជាថ្មីទៀត បន្ទាប់ការសន្យារបស់តំណាងក្រុមហ៊ុនបានពន្យារចាប់តាំងពីមុនចូលឆ្នាំខ្មែរមកដល់បច្ចុប្បន្ន។
អតីតបុគ្គលិកក្រុមហ៊ុនទូរស័ព្ទ អឹមហ្វូន (ប្រព័ន្ធ០១១) តវ៉ានៅមុខក្រុមហ៊ុន នៅថ្ងៃទី៣ ខែមិថុនា ឆ្នាំ២០១៤ សុំឲ្យក្រុមហ៊ុនចេញលិខិតកំណត់ថ្ងៃបើកប្រាក់អតីតភាពការងារនៅសល់ចុងក្រោយ
៣០% ឲ្យបានច្បាស់លាស់ កុំឲ្យសន្យាម្ដងខែនេះម្ដងខែនោះ។
លោក នួន សំអាត អតីតបុគ្គលិកក្រុមហ៊ុនទូរស័ព្ទអឹមហ្វូន ថ្លែងថា ក្រោយពីក្រុមបុគ្គលិកតវ៉ា ហើយបានជួបតំណាងក្រុមហ៊ុនចរចាគ្នារយៈពេលជាង ១ម៉ោង ទើបក្រុមហ៊ុនកំណត់ថា នៅថ្ងៃទី១៦ ខែមិថុនា ក្រុមហ៊ុននឹងសងប្រាក់អតីតភាពការងារ ៣០% ដល់អតីតបុគ្គលិកក្រុមហ៊ុន៖ «សន្យាជាមួយយើងថ្ងៃ១៦ ហើយយើងអត់អាចនេះជាមួយគាត់ទៀត ព្រោះអីគាត់សន្យាហ្នឹង ព្រោះអីថា សែក ហ្នឹងវានឹងចេញដែរហើយ ដល់អ៊ីចឹងយើងអត់អាចជីកឫសគល់គាត់បានទៀតទេ។ គាត់បង្គាប់បញ្ហាឲ្យកូនចៅគាត់ប្រាប់ទៅបុគ្គលិកសម្រាប់ធ្វើការងារហ្នឹងហើយ»។
អ្នកស្រី ផល្លីន អតីតបុគ្គលិកក្រុមហ៊ុនទូរស័ព្ទអឹមហ្វូនដែរ ថ្លែងថា គាត់សុំឲ្យក្រុមហ៊ុនសងប្រាក់អតីតភាពការងារ ៣០% ដែលក្រុមហ៊ុនសន្យាបើកឲ្យតាំងពីមុនចូលឆ្នាំខ្មែរ ប៉ុន្តែក្រុមហ៊ុនពន្យារមកដល់ដើមខែមិថុនា មិនព្រមបើកឲ្យទៀត។ ទើបពួកគាត់នាំគ្នាមកសុំឲ្យក្រុមហ៊ុនចេញលិខិតធានាថា នៅថ្ងៃ១៦ ខែមិថុនា ពិតជាបើកប្រាក់ ៣០% ឲ្យ ដោយមិនកុហក និងពន្យារថ្ងៃបើកទៀតទេ។
អ្នកស្រីថា គាត់ធ្វើការនៅក្នុងក្រុមហ៊ុនទូរស័ព្ទអឹមហ្វូន ពីឆ្នាំ២០០៥ មក ក្រុមហ៊ុនបានសង់ប្រាក់អតីតភាពការងារជូនគាត់ ៧០% ហើយ ប៉ុន្តែនៅជំពាក់ ៣០% ទៀត គឺស្មើនឹងជាង១ពាន់ដុល្លារ៖ «ពួកខ្ញុំមកនេះ គឺទាមទាររឿងលុយសំណងដែលនៅសល់ បានពេលណាគឺឲ្យច្បាស់ជាមួយពួកខ្ញុំ ព្រោះគាត់ប្រាប់ថា ឲ្យខ្ញុំដូចជាច្រើនសាណាស់ហើយ ដល់ពេលអ៊ីចឹងខ្ញុំមកសួរគាត់ឲ្យច្បាស់ថា ឥឡូវលុយដែលនៅសល់នេះ គាត់ត្រូវឲ្យខ្ញុំប្រាកដថ្ងៃណាៗ»។
លោក ងួន គឹមសេង ឲ្យដឹងថា អតីតបុគ្គលិកក្រុមហ៊ុនទាំងអស់មានចំនួនជាង ១ពាន់នាក់ (១.០៩២)។ ប៉ុន្តែតំណាងក្រុមហ៊ុនលើកនៅក្នុងអង្គប្រជុំនៅថ្ងៃទី៣ ខែមិថុនា ថា ក្រុមហ៊ុនបានសងប្រាក់អតីតភាពការងារដល់បុគ្គលិកមួយចំនួនគ្រប់ហើយ នៅសល់តែបុគ្គលិកជាង ៥០០នាក់ទៀតដែលក្រុមហ៊ុននៅជំពាក់ ៣០%។ លោកថា ក្រុមហ៊ុនទូរស័ព្ទអឹមហ្វូន សន្យាសងប្រាក់នោះនៅថ្ងៃ១៦ ខែមិថុនា៖ «៥០០នាក់ឡើងយើងអត់ដឹងទេ ព្រោះបុគ្គលិកយើងទាំងអស់ជាង ១ពាន់នាក់ ប៉ុន្តែយើងរាប់ទាំងអ្នកយាមអង់តែន បុគ្គលិក Messenger អីហ្នឹង ដែលប្រាក់ខែគាត់ចាប់ពីកម្រិតណាចុះមក គឺគេបើកឲ្យមុន ហើយដល់ពេលពួកខ្ញុំដែលមានប្រាក់ខែចាប់ពី officer ទៅយើងត្រូវចាំបើកជាសែក»។
ក្រុមហ៊ុនទូរស័ព្ទអឹមហ្វូន ឬប្រព័ន្ធ ០១១ បានក្ស័យធនតាំងពីអំឡុងចុងឆ្នាំ២០១២ ហើយបានផ្ទេរឲ្យក្រុមហ៊ុន ម៉ូប៊ីថែល (Mobitel) គឺប្រព័ន្ធ ០១២ វិញ នៅដើមឆ្នាំ២០១៣។ ការតវ៉ាសុំបើកប្រាក់អតីតភាពការងាររបស់បុគ្គលិកក្រុមហ៊ុនទូរស័ព្ទអឹមហ្វូន បានធ្វើបន្តបន្ទាប់រហូតមានការជួយសម្រួលពីក្រសួងការងារនិងបណ្ដុះបណ្ដាលវិជ្ជាជីវៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។