កម្មករជាង ១ពាន់នាក់នៅរោងចក្រអូសេអង់ (OCEAN) បានរៀបចំពិធីសែនព្រែនមួយនៅរោងចក្រនៅថ្ងៃទី៩ មិថុនា ដើម្បីបួងសួងឲ្យវត្ថុស័ក្ដិសិទ្ធិថែរក្សានៅរោងចក្រនេះ បន្ទន់ចិត្តថៅកែក្រុមហ៊ុនឲ្យផ្ដល់ប្រាក់ខែឲ្យពួកគេ ១០០ភាគរយ ក្នុងពេលព្យួរការងារ។
កម្មការិនីរោងចក្រអូសេអង់ម្នាក់ គឺអ្នកនាង ទឹម ថា ឲ្យដឹងថា កម្មករបានជួបជុំគ្នាដើម្បីធ្វើបាតុកម្មអហិង្សានៅខាងមុខរោងចក្រ និងបានធ្វើពិធីបន់ស្រន់តាមជំនឿអរូបិយ ដោយសង្ឃឹមថា ខាងក្រុមហ៊ុននិងក្រសួងពាក់ព័ន្ធ អាចបញ្ចប់វិវាទរវាងកម្មករនិងក្រុមហ៊ុនឲ្យបានឆាប់៖ «តំណាងកម្មករនិងកម្មករទាំងអស់គាត់បានចូលរួមគំនិតគ្នា ទិញមាន់ធូបទៀនយកមកអុជដើម្បីសូមឲ្យម្ចាស់ទឹកម្ចាស់ដីឃុំគ្រងកន្លែងហ្នឹង ឲ្យជួយដល់កម្មករ កម្មការិនីទាំងអស់ដែលកំពុងតែរងទុក្ខ»។
រោងចក្រអូសេអង់ បានដេរខោអាវម៉ាកល្បីឈ្មោះ ហ្គេប (GAP) ជាច្រើនឆ្នាំមកហើយ។ រោងចក្រនេះសម្រេចផ្ដល់ប្រាក់ ១៥ដុល្លារ សម្រាប់កម្មករម្នាក់ នៅពេលដែលប្រកាសថា ក្រុមហ៊ុនមិនមានការបញ្ជាទិញ។ កម្មករទទូចឲ្យស្នើសុំឲ្យភាគីរោងចក្រផ្ដល់ប្រាក់ប្រចាំខែឲ្យបាន ១០០ភាគរយនៃប្រាក់ខែគោល។
តំណាងកម្មករបញ្ជាក់ថា កម្មករទាំងអស់នឹងឈរបាតុកម្មនៅមុខរោងចក្របន្តទៀត នៅថ្ងៃអង្គារ ទី១០ មិថុនា ដើម្បីដាក់សម្ពាធឲ្យភាគីក្រុមហ៊ុនទទួលយកសំណើរបស់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។