កម្មកររោងចក្រអូសេអង់ ជាង ១ពាន់នាក់ នៅថ្ងៃ១២ ខែមិថុនា បរាជ័យសាជាថ្មីទៀតចំពោះគម្រោងហែក្បួនទៅដាក់ញត្តិដល់ផ្ទះនាយករដ្ឋមន្ត្រី ដោយសារមន្ត្រីនៃសាលាខណ្ឌពោធិ៍សែនជ័យ ស្ទាក់ផ្លូវនិងបានសុំអោយពួកគេចូលចរចានៅទីនោះ។ ប៉ុន្តែការចរចានោះ នៅតែពុំមានលទ្ធផល ត្បិតតំណាងភាគីរោងចក្រមិនបានចូលរួម។
ក្រុមកម្មកររោងចក្រអូសេអង់ (Ocean) ព្រមានជាថ្មីទៀតថា នឹងដង្ហែក្បួនទៅក្រសួងការងារនៅថ្ងៃ១៣ មិថុនា ប្រសិនបើពួកគេនៅតែមិនទទួលបានដំណោះស្រាយសមស្របទៅតាមការទាមទារ។
ក្រោយការចរចារវាងសហជីពតំណាងកម្មករ តំណាងក្រសួងការងារ និងអាជ្ញាធរខណ្ឌពោធិ៍សែនជ័យ ជាង ១ម៉ោងមក លោក ឆេង ឈាន់ អគ្គលេខាធិការសម្ព័ន្ធសហជីពចលនាកម្មករ ប្រកាសប្រាប់កម្មករពីលទ្ធផលមិនបានការដដែល ដោយសារខាងរោងចក្រកាត់ដេរមិនបានមកចូលរួមចរចា។
ក្រុមកម្មករគំរាមថា នឹងហែក្បួនជាថ្មីទៅក្រសួងការងារ ទាមទារឲ្យក្រសួងនោះជំរុញឲ្យថៅកែដោះស្រាយឲ្យពួកគេឲ្យបានឆាប់ៗ៖ «ការព្យួរការងាររបស់ថៅកែរោងចក្រ ខ្ញុំគិតថា ជារឿងមួយគេចវេះ ដោយសារតែរោងចក្រអូសេអង់ កម្មករគាត់ធ្វើការច្រើនឆ្នាំ មានអ្នកខ្លះគាត់ធ្វើការរហូតដល់ ១៥ឆ្នាំ។ អ៊ីចឹងហើយគាត់ព្យួរការងារនេះ គ្រាន់តែជាការព្យួរ ដើម្បីពន្យារពេល ដើម្បីឲ្យបងប្អូនកម្មករគាត់អស់ក្នុងការតស៊ូ គាត់ថយចេញដោយខ្លួនឯង អ៊ីចឹងនៅសល់តែកម្មករភាគតិច ខ្ញុំគិតថា រោងចក្រនឹងបើកលុយ បញ្ចប់កិច្ចសន្យាបងប្អូនកម្មករ»។
នៅមុនមានការចរចា ក្រុមកម្មកររោងចក្រអូសេអង់ បាននាំគ្នាដង្ហែក្បួនចេញពីខាងមុខរោងចក្រ ដែលឋិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ក្នុងគោលដៅឆ្ពោះទៅផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ។ ប៉ុន្តែពួកគេត្រូវស្ទាក់ដោយអាជ្ញាធរខណ្ឌពោធិ៍សែនជ័យ នឹងបញ្ចុះបញ្ចូលអោយពួកគេចូលចរចានៅក្នុងនោះ។
សំឡេងកម្មករតវ៉ាជាមួយសមត្ថកិច្ច៖ «ពូឯងពន្លែងខ្ញុំបន្តិចទៅ ឲ្យខ្ញុំទៅដល់នោះសិនទៅ ពូឯងធ្វើជាបិទភ្នែកមួយចំហៀង បើកភ្នែកមួយចំហៀងទៅ»។
ក្រុមកម្មការិនីឲ្យដឹងថា ពួកគាត់បំបែកគ្នាជាច្រើនក្រុម ដើម្បីកុំឲ្យសមត្ថកិច្ចបង្អាក់ក្បួនហែរបស់គាត់។ ការបំបែកគឺចែកជា ៤ក្រុម ក្នុង ១ក្រុម មានប្រមាណ ៥០០នាក់ ដើរកាត់ផ្លូវលំតាមភូមិទើបឡើងមកដល់មហាវិថីសហព័ន្ធរុស្សី៖ «មក ២ ទៅ ៣ដង មកអត់ដល់ផង ទាល់តែចែកផ្លូវគ្នាជា ៤ក្រុម បានមកដល់ហ្នឹង កុំអីអត់ដល់ទៀត។ មកមុនៗ ដល់តែត្រឹមថ្នល់លើហ្នឹងគេស្ទាក់ឲ្យទៅវិញហើយ។ ម្ដងហ្នឹងអត់ចាញ់បោកទេ នាំគ្នាចែកគ្នាជា ៤ក្រុម បានៗមកដល់ហ្នឹង»។
កម្មការិនី ហាក់ សុខា ឲ្យដឹងថា ពួកគេទន្ទឹងរង់ចាំការដោះស្រាយដោយសន្តិវិធីជិត ២០ថ្ងៃហើយ ចាប់ពីថ្ងៃ២៤ ខែឧសភា មកដល់បច្ចុប្បន្ន។ លទ្ធផលចរចាពីមួយថ្ងៃទៅមួយថ្ងៃនៅតែដដែល មិនអាចបោះជំហានទៅមុខរួចសោះ។ ពួកគេសូមឲ្យក្រសួងការងារ សមាគមកាត់ដេរ អាជ្ញាធរដែនដី ជំរុញឲ្យថៅកែដោះស្រាយសំណងឲ្យបានឆាប់ៗ ព្រោះពួកគេត្រូវការលុយទិញអាហារប្រចាំថ្ងៃ។ បើថៅកែក្ស័យធនក៏ត្រូវប្រកាសឲ្យកម្មករដឹង ហើយទូទាត់ប្រាក់អតីតភាពការងារ។ បើនៅមានការងារបន្តធ្វើ ថៅកែត្រូវផ្ដល់ប្រាក់ខែមកកម្មករគ្រប់ចំនួនតាមច្បាប់ការងារកំណត់។
កម្មការិនី ហាក់ សុខា៖ «១៥ដុល្លារចាយអត់គ្រាន់ទេ ហើយខ្ញុំមិនអាចនៅតតាំងទៀតទេ ២០ថ្ងៃហើយ ខ្ញុំអនុគ្រោះឲ្យយូរណាស់ ហើយតវ៉ាៗ គ្មានអ្នកណាដោះស្រាយឲ្យខ្ញុំទេ។ ហេតុអីបើគាត់ចង់បិទ ម្ដេចគាត់មិនបង់ឲ្យកម្មករគាត់ចាំមកធ្វើកិកកុកៗធ្វើអី»។
ក្រុមកម្មករឲ្យដឹងថា ពួកគេយាមនៅមុខទ្វាររោងចក្រអូសេអង់ ទាំងយប់ទាំងថ្ងៃ ការពារសម្ភារៈនៅសល់តិចតួចក្នុងរោងចក្រ ដើម្បីកុំឲ្យថៅកែលួចដឹកចេញ ព្រោះនៅមានម៉ាស៊ីនដេរខ្លះដែរអាចលក់យកប្រាក់បើកប្រាក់ខែឲ្យកម្មករជាង ១ពាន់នាក់បាន។
នៅក្នុងការចរចាថ្ងៃ១២ ខែមិថុនា លោក វង់ សុវណ្ណ អគ្គលេខាធិការរងគណៈកម្មការដោះស្រាយកូដកម្ម បាតុកម្ម នៃក្រសួងការងារ ប្រាប់ទៅតំណាងសម្ព័ន្ធសហជីពចលនាកម្មករថា ក្រសួងនឹងកោះហៅថៅកែរោងចក្រកាត់ដេរអូសេអង់ សមាគមរោងចក្រកាត់ដេរ សហជីព តំណាងកម្មករ ទៅប្រជុំនៅក្នុងនាយកដ្ឋានដោះស្រាយកូដកម្ម បាតុកម្ម នៃក្រសួងការងារ នៅម៉ោង ៩ព្រឹកថ្ងៃសុក្រ ទី១៣ ខែមិថុនា។
ក្រុមកម្មករបានហៅការចរចានោះថា ជាការពន្យារ បន្ទច់បង្អាក់ក្បួនហែរបស់កម្មករ មិនឲ្យពួកគេបានទៅដល់ផ្ទះនាយករដ្ឋមន្ត្រី។ ក្រុមកម្មករ និងសហជីពបំបែកគ្នានៅម៉ោងជិត ១២ថ្ងៃត្រង់ តម្រង់ទៅរោងចក្រវិញ ដើម្បីត្រឡប់ទៅការពារសម្ភារៈនៅសល់ក្នុងរោងចក្របន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។