ក្រសួងសាធារណការ និងដឹកជញ្ជូន ចាត់វិធានការលើក្រុមហ៊ុនសាងសង់ផ្លូវជាតិលេខ៦ ខុសបច្ចេកទេស និងគ្មានគុណភាព ហើយបង្គាប់ឲ្យក្រុមហ៊ុនទទួលបន្ទុកធ្វើផ្លូវនេះត្រូវជួសជុលឡើងវិញ។ សមាជិកសភាបក្សប្រឆាំងសាទរចំណាត់ការនេះ ប៉ុន្តែទាមទារឲ្យបង្កើនតម្លាភាព និងបំបាត់អំពើពុករលួយក្នុងការសាងសង់ផ្លូវ។
ថ្លែងក្នុងកម្មវិធីបើកការដ្ឋានជួសជុលផ្លូវក្នុងក្រុងព្រះសីហនុ នៅព្រឹកថ្ងៃទី៣១ ខែតុលា រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងពីបញ្ហាផ្លូវជាតិលេខ៦ ដែលកំពុងរងការខូចខាត។
លោកមានប្រសាសន៍ថា ខាងក្រសួងសាធារណការ កំពុងរៀបចំនីតិវិធីដើម្បីតាមដានគុណភាពផ្លូវពីគ្រប់ការដ្ឋានទាំងអស់។ បើរកឃើញថា មានបញ្ហាការដ្ឋាននោះនឹងទទួលខុសត្រូវតាមចំណាត់ការរបស់ក្រសួង៖ «យើងបានចុះទៅពិនិត្យមែន ផ្លូវជាតិលេខ៦ ទៅសៀមរាប។ មើលឃើញថា មានការខ្វះខាតលក្ខណៈបច្ចេកទេស។ យើងអត់ទទួលទេ ហើយយើងហៅក្រុមសាងសង់នោះមកពិភាក្សាគ្នា។ គាត់សន្យាថា អ៊ុត ៣ហ៊ុនបន្ថែមទៀតលើផ្លូវហ្នឹង ដែលចំណាយយ៉ាងតិច ១០លានលុយ (ដុល្លារ) គាត់មិនមែនលុយយើងទេ ព្រោះគាត់ជាអ្នកធ្វើខុសបច្ចេកទេស»។
ការលើកឡើងរបស់លោក ស៊ុន ចាន់ថុល នេះ ធ្វើឡើងក្រោយពីលោកបានបង្គាប់ឲ្យមន្ត្រីមន្ទីរសាធារណការពង្រឹងសកម្មភាពការងាររបស់ខ្លួនក្នុងការអង្កេត និងធានាគុណភាពផ្លូវ ព្រោះលោកមិនចង់ឲ្យក្រសួងបន្តទទួលការរិះគន់ដដែលៗពីប្រជាពលរដ្ឋនោះឡើយ៖ «ខ្ញុំលែងចង់ឮហើយ សម្ដេចលែងចង់ឮហើយ ពាក្យទិតៀនថា ក្រសួងសាធារណការ ធ្វើផ្លូវជាប់រហូត។ ធ្វើក្រោយខូចមុខធ្វើមុខខូចក្រោយ។ មួយទៀតថា ក្រសួងសាធារណការ ចាក់ស្ដើងស៊ីក្រាស់។ ល្មមឈប់ហើយ។ ដល់ពេលវេលាយើងធ្វើកិច្ចការផ្លូវថ្នល់យើងតាមលក្ខណបច្ចេកទេសជាប់ឲ្យបានយូរ»។
ទាក់ទិននឹងរឿងនេះ អនុប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក សុន ឆ័យ ថា ចំណាត់ការរបស់លោករដ្ឋមន្ត្រី គឺជារឿងមួយគួរឲ្យគាំទ្រ។ លោកបញ្ជាក់ថា យន្តការតាមដានគុណភាពជារឿងសំខាន់ ប៉ុន្តែអ្វីដែលសំខាន់ជាងនេះទៅទៀត គឺការបង្កើនគណនេយ្យភាព និងការបំបាត់អំពើពុករលួយ៖ «ខេត្តមួយចំនួននៅពុករលួយ។ រដ្ឋមានលុយបដិភាគឲ្យជួសជុលផ្លូវ តែគាត់យកតែក្រុមហ៊ុនគ្រួសារគាត់ហ្នឹង។ នៅភ្នំពេញ នេះមានក្រុមហ៊ុនដូចជាវត្តភ្នំ ដែលជារបស់អភិបាលរាជធានីភ្នំពេញ នេះតែម្ដង ហើយយើងមិនដឹងថា គាត់ចំណាយលុយដូចម្ដេចទេ តែក្រុមហ៊ុនគ្នាគាត់ហ្នឹង»។
លោក សុន ឆ័យ បន្តទៀតថា វាមានសារសំខាន់ណាស់ក្នុងការយកកម្ចីបរទេសមកអភិវឌ្ឍ ដូចជាកម្ចីពីប្រទេសចិន មកប្រើប្រាស់ឲ្យបានត្រឹមត្រូវក្នុងការសាងសង់ហេដ្ឋារចនាសម្ព័ន្ធ។ ការធ្វេសប្រហែសក្នុងការចាត់ចែងថវិកាទាំងនេះ នឹងផ្ដល់បញ្ហាជាច្រើនដល់កម្ពុជា នាថ្ងៃមុខជាជាងការអភិវឌ្ឍ៖ «បើយើងខ្ចីគេមកសង់ផ្លូវហើយថ្លៃប្រហែលសហរដ្ឋអាមេរិកផង តែផ្លូវគេធានាបាន ៥០ឆ្នាំហើយផ្លូវយើងធានាបាន ១ឆ្នាំ ឬ ២ឆ្នាំ បែបហ្នឹងអត់ជួយដល់សេដ្ឋកិច្ចទេ។ រដ្ឋាភិបាលតែងយកហេតុផលថា ខ្ចីលុយមកសង់ហេដ្ឋារចនាសម្ព័ន្ធដើម្បីជួយសេដ្ឋកិច្ច ដឹកជញ្ជូនផលិតផលកសិកម្ម ប៉ុន្តែការដឹងនោះមិនស្មើនឹង ១០ភាគរយនៃតម្លៃផ្លូវដែលខូចទៅវិញផង»។
ផ្លូវជាតិលេខ៦ ត្រូវបានសាងសង់ពង្រីកក្រោមកម្ចីឥណទានពីរដ្ឋាភិបាលចិន ឃ្លាតពីស្ពានជ្រោយចង្វារ ៤គីឡូម៉ែត្រ រហូតទៅដល់ផ្លូវកែងស្គន់ តភ្ជាប់ទៅផ្លូវជាតិលេខ៦១ ដែលចំណាយទឹកប្រាក់អស់ជាង ៧០លានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។