ប្រជាពលរដ្ឋរស់នៅរាជធានីភ្នំពេញ ស្នើជាថ្មីឲ្យសមត្ថកិច្ចពង្រឹងការគ្រប់គ្រងអាវុធ ឲ្យបានតឹងរ៉ឹង។ ការស្នើនេះ ដោយសារពលរដ្ឋខ្លះ បានបារម្ភពីសុវត្ថិភាព នៅក្រោយពេលមិនដល់មួយសប្ដាហ៍ផង ករណីបាញ់សម្លាប់មនុស្សយ៉ាងសាហាវ បានកើតឡើង ២ករណី នៅក្នុងក្រុងភ្នំពេញ។
យុវតីម្នាក់ រស់នៅក្រុងភ្នំពេញ មើលឃើញថា សកម្មភាពមន្ត្រីនគរបាលដែលបានយកកាំភ្លើងបាញ់ប្រហារទៅលើពលរដ្ឋ ដែលកំពុងពិសាអាហារនៅហាងមួយ ក្នុងសង្កាត់ស្ទឹងមានជ័យ និងករណីមន្ត្រីគយ ជាអតីតស្វាមីតារាចម្រៀង ឈ្មោះ សាន ស្រីឡៃ បានយកកាំភ្លើងបាញ់ជនរងគ្រោះ និងបាញ់សម្លាប់ខ្លួនឯងជាក្រោយនោះ បានធ្វើឲ្យនាងបារម្ភជាខ្លាំង។ នាងស្នើឲ្យមានការពង្រឹងការគ្រប់គ្រងអាវុធ និងធ្វើការអប់រំផ្លូវចិត្តរបស់មន្ត្រីរាជការដែលមានសិទ្ធិកាន់អាវុធ កុំឲ្យមានចរិតឆេវឆាវ។
កាលពីព្រលប់ថ្ងៃទី១៤ ខែតុលា បុរសម្នាក់បានស្លាប់ភ្លាមៗ ក្រោយពេលមន្ត្រីនគរបាលព្រហ្មទណ្ឌកម្រិតស្រាលម្នាក់ ឈ្មោះ សាន បូរី បានប្រើប្រាស់កាំភ្លើងម៉ាករ៉ូឡូ បាញ់ចំនួន៣គ្រាប់។ ករណីបាញ់នោះ ស្ថិតនៅក្នុងកន្លែងហូបអាហារមួយកន្លែង ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ការសន្និដ្ឋានជំហានដំបូង សមត្ថកិច្ចបានប្រាប់សារព័ត៌មាន ក្នុងស្រុកថា បណ្ដាលមកពីជម្លោះ ដោយសារច្រៀងខារ៉ាអូខេ ហើយជនល្មើសខឹងជនរងគ្រោះនិយាយច្រើន ក៏បាញ់តែម្ដង។
ចំណែកករណីបាញ់សំលាប់មួយករណីទៀត គឺមន្ត្រីគយ ឈ្មោះ ខៀវ ម៉ៅ ហៅ ជ័យ រិន មានបងប្អូនបួននាក់ ដែលសុទ្ធតែធ្វើគយដូចគ្នាទាំងអស់ បានបាញ់សម្លាប់តារាចម្រៀងម្នាក់ ឈ្មោះ សាន ស្រីឡៃ នៅល្ងាចថ្ងៃទី១៦ ខែតុលា នៅសង្កាត់បឹងកេងកងទី១ ខណ្ឌចំការមន រាជធានីភ្នំពេញ។
ក្រោយបានបាញ់សម្លាប់តារាចម្រៀងរួច ខ្មាន់កាំភ្លើងជាមន្ត្រីគយ បានបាញ់សម្លាប់ខ្លួនឯងដែរ។
បុរសម្នាក់រស់នៅក្រុងភ្នំពេញដូចគ្នា ក៏ព្រួយបារម្ភអំពីករណីមន្ត្រីមានសមត្ថកិច្ចប្រើប្រាស់កាំភ្លើង យ៉ាងអានាធិបតេយ្យដែរ។ ពលរដ្ឋម្នាក់នេះ មើលឃើញថា ករណីការប្រើប្រាស់កាំភ្លើងដោយមានភាពអានាធិបតេយ្យនេះ មិនមែនតែមន្ត្រីមានសមត្ថកិច្ចទេ សូម្បីពលរដ្ឋខ្លះ ក៏គាត់ធ្លាប់ឃើញមានការសំញែងកាំភ្លើងដែរ។
ស្ត្រីម្នាក់ទៀត ដែលតែងចេញពីធ្វើការនៅពេលយប់ យល់ថា ករណីកើតមានការបាញ់សម្លាប់ជាញឹកញាប់បែបនេះ បានធ្វើឲ្យរូបនាង ព្រួយបារម្ភពីសុវត្ថិភាព ខណៈដែលទីក្រុងភ្នំពេញ តែងល្បីថាសំបូរចោរ ធ្វើសកម្មភាពឆក់ និងប្លន់ នៅពេលយប់។
ពាក់ព័ន្ធករណីផ្ទុះកក្រើកការបាញ់សម្លាប់មនុស្សនៅក្នុងរយៈពេលចុងក្រោយនេះ ពលរដ្ឋក៏បានរំលឹកអំពីករណីខ្មាន់កាំភ្លើងបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ ផងដែរ។ ពួកគេស្នើឲ្យសមត្ថកិច្ចបញ្ចេញវីដេអូ នៅក្នុងស្ដារម៉ាត នៃស្ថានីយចាក់សាំងកាល់តិច (Caltex) ដែលថតបានពេញលេញ ចំពោះករណីខ្មាន់កាំភ្លើងបាញ់សម្លាប់ បណ្ឌិត កែម ឡី ដូចដែលសមត្ថកិច្ចបានបញ្ចេញវីដេអូ ករណីខ្មាន់កាំភ្លើងបាញ់សម្លាប់តារាចម្រៀង ឈ្មោះ សាន ស្រីឡៃ និង ករណីខ្មាន់កាំភ្លើងបាញ់សម្លាប់មនុស្សដទៃទៀត កាលពីពេលកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។