ប្រភពពីប្រជាពលរដ្ឋខេត្តឧត្តរមានជ័យ បានឱ្យដឹងថា បច្ចុប្បន្ន សកម្មភាពឆ្លងដែនចូលទៅកាប់ឈើគ្រញូងខុសច្បាប់ក្នុងទឹកដីថៃ បានកក្រើកឡើងវិញក្នុងអំឡុងពេលដែលប្រទេសកម្ពុជា កំពុងរង់ចាំការបង្កើតរដ្ឋាភិបាលថ្មីក្រោយពីការបោះឆ្នោតនេះ។
មានប្រជាពលរដ្ឋខ្មែរជាច្រើនមកពីខេត្តមួយចំនួន កំពុងសម្រុកនាំគ្នាឆ្លងដែនតាមច្រកមួយចំនួននៃក្រុងសំរោង ច្រកស្រុកអន្លង់វែង និងស្រុកត្រពាំងប្រាសាទ ចូលទៅកាប់ឈើគ្រញូងក្នុងទឹកដីនៃខេត្តសុរិន្ទ និងខេត្តស៊ីសាកេត របស់ថៃ។
អភិបាលខេត្តឧត្តរមានជ័យ គឺលោក ស ថាវី។ លោកបានមានប្រសាសន៍កាលពីថ្ងៃច័ន្ទ ទី២៦ ខែសីហា ថា អាជ្ញាធរកំពុងអនុវត្តបទបញ្ជារបស់រដ្ឋាភិបាល ដើម្បីទប់ស្កាត់សកម្មភាពឆ្លងដែនទៅកាប់ឈើខុសច្បាប់ក្នុងទឹកដីថៃ នោះ។ លោក ស ថាវី បានបញ្ជាក់ថា ក្នុងមួយរយៈពេលកន្លងទៅនេះ លោកបានចុះទៅតាមតំបន់ជាច្រើនជាប់ព្រំដែនកម្ពុជា-ថៃ ដើម្បីអនុវត្តបទបញ្ជារដ្ឋាភិបាល ព្រមទាំងផ្សព្វផ្សាយអំពីគ្រោះថ្នាក់ដោយសារការឆ្លងដែនខុសច្បាប់៖ «កំពុងអនុវត្តគោលការណ៍បទបញ្ជា ០២។ ពីម្សិលមិញ ខ្ញុំបានណែនាំរហូតដល់ ៩៥នាក់ ឱ្យត្រឡប់ទៅផ្ទះវិញ»។
មន្ត្រីទទួលបន្ទុករបាយការណ៍របស់សាលាខេត្តឧត្តរមានជ័យ គឺលោក ជា សូវី បានឱ្យដឹងថា ពេលបច្ចុប្បន្នមានប្រជាពលរដ្ឋខ្មែរមួយចំនួន កំពុងនាំគ្នាឆ្លងដែនទៅកាប់ឈើគ្រញូងខុសច្បាប់ក្នុងទឹកដីថៃ ដើម្បីលក់ឱ្យក្រុមឈ្មួញ។ ប្រជាពលរដ្ឋទាំងនោះមិនមែនតែអ្នកនៅក្នុងខេត្តឧត្តរមានជ័យ ទេ គឺអ្នកខ្លះមកពីខេត្តកំពង់ធំ កំពង់ចាម និងខេត្តពោធិ៍សាត់ ជាដើម។
ទោះយ៉ាងណា មន្ត្រីសាលាខេត្តឧត្តរមានជ័យ បានអះអាងថា ចំនួនប្រជាពលរដ្ឋដែលឆ្លងដែនទៅកាប់ឈើខុសច្បាប់ក្នុងទឹកដីថៃ បច្ចុប្បន្នមានការថយចុះជាងកាលពីរដូវប្រាំង។
ក៏ប៉ុន្តែ របាយការណ៍របស់អាជ្ញាធរខេត្តឧត្តរមានជ័យ គឺផ្ទុយទៅនឹងការអះអាងរបស់ប្រជាពលរដ្ឋ ដែលរស់នៅជាប់តំបន់ព្រំដែនខ្មែរ-ថៃ ដែលថា ចំនួនអ្នកឆ្លងដែនទៅកាប់ឈើខុសច្បាប់មិនមានការថយចុះទេ។
បុរសម្នាក់ជាអ្នកភូមិអូរស្វាយ ឃុំអូរស្វាយ ស្រុកត្រពាំងប្រាសាទ បានមានប្រសាសន៍ថា បច្ចុប្បន្ន មានប្រជាពលរដ្ឋខ្មែរកាន់តែច្រើនឡើងមកពីខេត្តផ្សេងៗ តាំងពីខេត្តសៀមរាប កំពង់ធំ ពោធិ៍សាត់ កំពង់ស្ពឺ និងកំពត ជាដើម កំពុងនាំគ្នាសម្រុកឡើងភ្នំឆ្លងដែនទៅកាប់ឈើខុសច្បាប់ក្នុងទឹកដីថៃ ស្ទើរតែរៀងរាល់ថ្ងៃ៖ «ឡើងគ្រប់ច្រក អាច្រកចំបក់កោង ខ្លាំង ច្រកទឹកជប់ និងច្រកក្បាលអូរស្វាយ។ ឡើងច្រើនណាស់ មួយជើងៗចង់រាប់ពាន់នាក់ តែវាឡើងគ្រប់ច្រក។ មួយច្រកអីចឹងទៅ ២០-៣០នាក់ មួយច្រក ៥០-៦០នាក់ ហើយគ្រាន់តែគ្នាស្ពាយ ១-២ យកមកដូរអង្ករហូបហ្នឹងខុសច្បាប់ តែដល់ពេលដឹកទាំងឡានៗ អាហ្នឹងយ៉ាងម៉េចទៅវិញ?»។
ប្រភពពីប្រជាពលរដ្ឋ បានអះអាងថា មូលហេតុដែលអ្នកភូមិនៅតែអាចឆ្លងដែនចូលទៅកាប់ឈើគ្រញូងខុសច្បាប់ ក្នុងទឹកដីថៃ បាន ដោយសារតែទាហាននៅតាមច្រកព្រំដែនទទួលយកលុយ។ បច្ចុប្បន្ន ការឆ្លងដែនទៅកាប់ឈើក្នុងទឹកដីថៃ គឺត្រូវឆ្លងកាត់ច្រក ៣ដំណាក់ ដោយគេត្រូវបង់លុយទៅឱ្យទាហានចំនួនប្រមាណ ១៣ម៉ឺនរៀល ដើម្បីជាថ្នូរនឹងការបើកឱ្យឆ្លងដែនខុសច្បាប់នោះ។
សមាគមការពារសិទ្ធិមនុស្សអាដហុក (Adhoc) ខេត្តឧត្តរមានជ័យ ធ្លាប់បានផ្តល់តួលេខត្រួសៗថា ចាប់តាំងពីអំឡុងខែមករា ដល់ត្រឹមថ្ងៃទី២១ ខែកក្កដា គឺមានប្រជាពលរដ្ឋខ្មែរចំនួន ១៩នាក់ បានស្លាប់ និង ៦នាក់រងរបួស ដោយសារទាហានថៃ បាញ់រះនៅពេលឆ្លងដែនខុសច្បាប់ទៅកាប់ឈើគ្រញូង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។