ប្រជាពលរដ្ឋប្រមាណ ១០០នាក់ បានប្រមូលផ្តុំគ្នានៅមុខក្រសួងមហាផ្ទៃ និងរដ្ឋសភា នៅព្រឹកថ្ងៃទី២៧ កុម្ភៈ ដើម្បីឲ្យស្ថាប័នទាំងពីរជួយអន្តរាគមន៍រឿងក្រុមហ៊ុនឯកជនមួយ ដែលពួកគាត់ចោទប្រកាន់ថា បានបោកប្រាស់លុយពីពួកគាត់រាប់ម៉ឺនដុល្លារ។ អ្នកជំនាញស្នើឲ្យស្ថាប័នពាក់ព័ន្ធជួយអន្តរាគមន៍ដោះស្រាយបញ្ហានេះជាបន្ទាន់ ដើម្បីកុំឲ្យពលរដ្ឋធ្លាក់ខ្លួនក្រជាងនេះ។
ក្រុមប្រជាពលរដ្ឋចោទប្រកាន់ក្រុមហ៊ុនឯកជនមួយឈ្មោះ អែមផាយ ប៊ីក ខាភីថល (Empire Big Capital Limited = EBC) ថាបានឆបោកពួកគាត់អស់ថវិការាប់ម៉ឺនដុល្លារ តាមរយៈការសន្យាផ្តល់ភាគលាភ ១០ភាគរយជូនរៀងរាល់ខែ តែជាក់ស្តែង ក្រុមហ៊ុនមិនបានអនុវត្តតាមកិច្ចសន្យានេះឡើយ។
ក្រុមពលរដ្ឋបានសរសេររៀបរាប់នៅក្នុងញត្តិដាក់ជូនរដ្ឋមន្ត្រីក្រសួងមហាផ្ទៃ លោក ស ខេង និងរដ្ឋសភាថា ក្រុមហ៊ុន Empire Big Capital Limited បានធ្វើប្រតិបត្តិការប្រមូលទុនពីប្រជាពលរដ្ឋរាប់ម៉ឺននាក់តាមបណ្ដាខេត្ត-ក្រុងទូទាំងប្រទេស ចាប់តាំងពីឆ្នាំ២០១៣ ដោយសន្យាថានឹងផ្តល់ផលចំណេញជាភាគលាភ ១០ភាគរយក្នុងមួយខែ ហើយរយៈពេល ១៨ខែក្រោយ ក្រុមហ៊ុននឹងសងប្រាក់ដើមទាំងអស់ត្រឡប់មកឲ្យអ្នកវិនិយោគវិញ។ ក្រុមហ៊ុនក៏បានផ្សព្វផ្សាយជាសាធារណៈដោយមានធ្វើជាសិក្ខាសាលា និងចុះតាមបណ្ដាសារព័ត៌មាននានាអំពីគម្រោងរបស់ខ្លួន ដើម្បីឲ្យប្រជាពលរដ្ឋកាន់តែជឿទុកចិត្ត។
ដោយមើលឃើញពីផលចំណេញខ្ពស់ ប្រជាពលរដ្ឋក៏បានទៅខ្ចីប្រាក់ពីធនាគារ និងចងការប្រាក់ឯកជន ដើម្បីយកមកដាក់នៅក្រុមហ៊ុននេះ ក៏ប៉ុន្តែស្រាប់តែក្រុមហ៊ុនបានបិទការធ្វើបណ្ដាញទីផ្សារ និងឈប់ទទួលទុនវិនិយោគនៅពាក់កណ្ដាលឆ្នាំ២០១៥ ហើយក៏លែងផ្តល់ភាគលាភ ១០ភាគរយដល់អ្នកវិនិយោគចាប់ពីខែកក្កដា ឆ្នាំ២០១៥ រហូតមក។
មកទល់នឹងបច្ចុប្បន្ន ក្រុមហ៊ុននៅមិនទាន់បានផ្តល់ប្រាក់ដើមទាំងអស់មកឲ្យអ្នកវិនិយោគវិញនៅឡើយទេ ដោយបានពន្យារពេលពីមួយខែទៅមួយខែ គ្មានការកំណត់ពេលវេលាច្បាស់លាស់ឡើយ បណ្ដាលឲ្យអ្នកវិនិយោគដែលកំពុងរង់ចាំការទូទាត់នេះមានទុក្ខលំបាកយ៉ាងខ្លាំងក្នុងការរកប្រាក់ដើម្បីសងការប្រាក់ទៅធនាគារ និងកម្ចីឯកជននានា។ ហើយក្នុងនោះ មានអ្នកវិនិយោគខ្លះបានបង្ខំចិត្តលក់ទ្រព្យសម្បត្តិរបស់ពួកគាត់ដើម្បីសងគេ និងខ្លះទៀតដែលមិនមានលទ្ធភាពក្នុងការសង ត្រូវបានធនាគាររឹបអូសយកដីធ្លី ផ្ទះសម្បែង និងស្រែចម្ការរបស់ពួកគាត់ទៀតផង។
ក្រុមប្រជាពលរដ្ឋស្នើដល់ប្រមុខរដ្ឋាភិបាលកម្ពុជា និងស្ថាប័នពាក់ព័ន្ធទាំងអស់ ជួយអន្តរាគមន៍ធ្វើយ៉ាងណាឲ្យភាគីក្រុមហ៊ុនសងប្រាក់ដើមរបស់ពួកគាត់មកវិញ ដ្បិតប្រាក់ទាំងនោះគឺជាកម្ចីដែលពួកគាត់ខ្ចីពីធនាគារឯកជន និងគ្រឹះស្ថានមីក្រូហិរញ្ញវត្ថុ ហើយត្រូវបង់ការប្រាក់ជារៀងរាល់ខែ ដែលធ្វើឲ្យជីវភាពរបស់ពួកគាត់កាន់តែធ្លាក់ចុះក្ដី។ ពួកគាត់បញ្ជាក់ថា ប្រាក់ដែលពួកគាត់ខ្ចីពីធនាគារ និងគ្រឹះស្ថានមីក្រូហិរញ្ញវត្ថុចាប់ពីរាប់ពាន់ដុល្លារដល់រាប់ម៉ឺនដុល្លារ៖ « ប្រជាពលរដ្ឋហ្នឹងមានលុយតិចតួច ខំដាក់ទៅក្រែងវាបានភាគចំណេញគ្រាន់ចិញ្ចឹមកូនចៅ ឲ្យរៀន និងធ្វើស្រែធ្វើអីខ្លះអ៊ីចឹងទៅ តែពេលប្រមូលបានក៏បាត់ស្ងាត់ឈឹងតែម្តង អាភាគលាភភាគអីហ្នឹង។ សំណូមពរ និងសូមអង្វរឲ្យលោកនាយករដ្ឋមន្ត្រី ហ៊ុន សែន គាត់ជួយអន្តរាគមន៍រឿងនេះ ពីព្រោះវាល្បីទូទាំងប្រទេសហើយ វាអត់មានអ្នកណាបានលុយទេ។ អ៊ីចឹងមានតែសម្ដេច ហ៊ុន សែន ទេ ដែលគាត់មានប្រតិបត្តិការអាចប្រមូលលុយដើមទុននេះមកឲ្យប្រជាពលរដ្ឋវិញ។ អ្នកដែលអត់បានដឹងមានច្រើន ហើយយើងនឹងចងកម្លាំងដើម្បីជំរុញដល់ភាគីខាងសភា ពិសេសខាងក្រសួងយុត្តិធម៌ ហ្នឹង យើងនឹងជំរុញធ្វើម៉េចឲ្យតុលាការដោះស្រាយ។ យើងនៅតែធ្វើ អ៊ីចឹងសាច់រឿងមួយហ្នឹង យើងអត់បោះបង់ចោល ព្រោះយើងជាអ្នករងគ្រោះ។ យើងត្រូវតែទាមទារឲ្យបាន ធ្វើម៉េចទាមទារឲ្យក្រុមហ៊ុនហ្នឹងសងដើមទុនរបស់យើងមកវិញ » ។
សមាជិកសភាគណបក្សប្រជាជនកម្ពុជា លោក ឈាង វុន ថ្លែងទៅកាន់ក្រុមពលរដ្ឋនៅក្រៅបរិវេណរដ្ឋសភា ថា លោកនឹងតាមដាន និងជំរុញឲ្យមានដំណោះស្រាយជុំវិញរឿងនេះ តែលោកមិនប្រាកដទេថា រឿងនេះនឹងអាចដោះស្រាយបាននៅពេលណានោះទេ ព្រោះវាជាសមត្ថកិច្ចរបស់តុលាការ។
ទាក់ទងរឿងនេះ អតីតប្រធានអង្គការមូលនិធិអភិវឌ្ឍន៍អាស៊ីអាគ្នេយ៍ (AIF) លោក ហួត សុវណ្ណ ដែលធ្លាប់បានធ្វើជាតំណាងប្រជាពលរដ្ឋអ្នកវិនិយោគនៅកម្ពុជា ដែលបានវិនិយោគជាមួយក្រុមហ៊ុន Empire Big Capital Limited (EBC) បញ្ជាក់ប្រាប់អាស៊ីសេរីតាមបណ្ដាញសង្គម WhatsApp ថា លោកទទួលស្គាល់ថា ពលរដ្ឋដែលតវ៉ាពិតជាអ្នកវិនិយោគជាមួយក្រុមហ៊ុន Empire Big Capital Limited (EBC) ពិតប្រាកដមែន តែពួកគេជាអ្នកទាក់ទងផ្ទាល់ជាមួយក្រុមហ៊ុន ក្រោយពេលអង្គការរបស់លោកបានបញ្ចប់ការងារពាក់ព័ន្ធជាមួយក្រុមហ៊ុននោះកាលពីពាក់កណ្ដាលឆ្នាំ២០១៥ កន្លងទៅ។
លោកបញ្ជាក់ថា អ្នកវិនិយោគទាំងអស់នៅទូទាំងប្រទេសដែលយល់ព្រមបញ្ចប់សកម្មភាពតាមការណែនាំ គឺស្ថិតក្រោមការទទួលខុសត្រូវរបស់អង្គការ AIF និងទទួលបានការទូទាត់ពីអង្គការ AIF ទៅតាមជំហានៗរហូតដល់ចប់នាពេលខាងមុខនេះ។ លោកបន្តថា សម្រាប់អ្នកវិនិយោគដែលមិនបានបញ្ចប់សកម្មភាពទេ ហើយបានជ្រើសរើសធ្វើការជាមួយក្រុមហ៊ុនដោយផ្ទាល់ ពួកគេទទួលបានការជួយជ្រោមជ្រែងផ្លូវច្បាប់ពីក្រុមការងារមេធាវីតំណាងអង្គការ AIF និងគ្រប់ស្ថាប័នពាក់ព័ន្ធទាំងអស់របស់រដ្ឋាភិបាល ដើម្បីតតាំងជាមួយក្រុមហ៊ុន Empire Big Capital Limited (EBC)។
អាស៊ីសេរី មិនអាចទាក់ទងតំណាងក្រុមហ៊ុន Empire Big Capital Limited (EBC) ដែលមានមូលដ្ឋាននៅកោះហុងកុង និងប្រទេសម៉ាឡេស៊ី បានទេនៅថ្ងៃទី២៧ ខែកុម្ភៈ ដើម្បីឆ្លើយតបជុំវិញរឿងនេះ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ លោក ង៉ែត ជូ ថ្លែងថា ជាទូទៅមិនមានមុខរបរ ឬអាជីវកម្មទាំងឡាយណាដែលអាចផ្តល់ប្រាក់ចំណេញជាការប្រាក់ដល់ម្ចាស់លុយរហូតដល់ ១០ភាគរយក្នុងមួយខែនោះទេ។ លោកយល់ថា អាជីវកម្មប្រភេទនេះ ភាគច្រើនជាអាជីវកម្មខុសច្បាប់ ដែលអាជ្ញាធរគួរតែចាត់វិធានការឲ្យបានម៉ឺងម៉ាត់ និងទាន់ពេលវេលា ដើម្បីកុំឲ្យពលរដ្ឋចាញ់បោកក្រុមហ៊ុនទាំងនោះ៖ « បើ ១០ភាគរយក្នុងមួយខែ មានន័យថា ១២ខែ គឺវា ១២០ភាគរយ។ ខ្ញុំក៏មិនយល់ដែរ ថាគាត់នឹងយកលុយទៅវិនិយោគលើអ្វីបានផលចំណេញ ដើម្បីឲ្យម្ចាស់លុយ ១០ភាគរយជារៀងរាល់ខែ។ អ៊ីចឹងបើយើងលើកសំណួរនេះមកដាក់ក្នុងចិត្ត ជាទូទៅគឺមិនគួរឲ្យជឿទេ ប៉ុន្តែប្រជាពលរដ្ឋភាគច្រើនគាត់អត់មានការយល់ដឹង ហើយបូកផ្សំនឹងគាត់លោភលន់ផង អ៊ីចឹងធ្វើឲ្យគាត់ងាយនឹងចាញ់បោកគេ » ។
លោក ង៉ែត ជូ ណែនាំដល់ពលរដ្ឋកុំវិនិយោគជាមួយក្រុមហ៊ុន ឬអាជីវកម្មណាដែលអះអាងថា នឹងផ្តល់អត្រាការប្រាក់ ១០ភាគរយក្នុងមួយខែ ពីព្រោះវាអាចជាការបោកប្រាស់សុទ្ធសាធ។ លោកថា ក្រុមហ៊ុនដែលអាចជឿទុកចិត្តបាន ត្រូវមានទីតាំងជាក់លាក់ និងមានអាជ្ញាប័ណ្ណត្រឹមត្រូវពីធនាគារជាតិ ហើយផលប្រយោជន៍ដែលគេអាចផ្តល់ឲ្យបាន គឺជុំវិញ ១០ភាគរយប៉ុណ្ណោះក្នុងមួយឆ្នាំ ដូចការផ្តល់ឲ្យរបស់ធនាគារឯកជន និងគ្រឹះស្ថានមីក្រូហិរញ្ញវត្ថុ មិនមែន ១០ភាគរយក្នុងមួយខែនោះទេ។
អ្នកជំនាញខាងសេដ្ឋកិច្ចរូបនេះ ក៏ស្នើឲ្យអាជ្ញាធរទប់ស្កាត់រឿងនេះកុំឲ្យកើតមានជាបន្តទៀត ហើយបើករណីនេះបានកើតឡើងហើយ អាជ្ញាធរត្រូវចាត់ការតាមផ្លូវច្បាប់ ដើម្បីកុំឲ្យពលរដ្ឋចាញ់បោកក្រុមហ៊ុនឯកជន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។