ចៅក្រមស៊ើបសួរនៃសាលាដំបូងរាជធានីភ្នំពេញ លោក សេង លាង បានសួរចម្លើយបន្ថែមទៅលើជនត្រូវចោទឈ្មោះ ជួប សម្លាប់ ទាក់ទងភស្តុតាង និងឯកសារមួយចំនួននៃសំណុំរឿងបាញ់សម្លាប់លោកបណ្ឌិត កែម ឡី នៅរសៀលថ្ងៃទី១៦ ខែកញ្ញា នេះ។ ចំណែកសង្គមស៊ីវិលដែលតាមដានដំណើររឿងនេះយល់ថា សមត្ថកិច្ច និងតុលាការលាក់លៀមលទ្ធផលខ្លះនៃរឿងនេះ ដែលធ្វើឲ្យសាធារណជនសង្ស័យលើការអនុវត្តការងារនៃស្ថាប័នទាំងនេះ។
ស្ថិតក្នុងសំលៀកបំពាក់ពណ៌ស្លាទំ ដៃទាំងពីរជាប់ខ្នោះ ជនត្រូវចោទឈ្មោះ ជួប សម្លាប់ ត្រូវអនុរក្សពន្ធនាគារបញ្ជូនត្រឡប់ទៅពន្ធនាគារវិញបន្ទាប់ពីចៅក្រមបានសួរយកចម្លើយក្នុងរយៈពេលជាង ៤ម៉ោង។
ដោយឡែកអ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងតាមរយៈបណ្ដាញទំនាក់ទំនងសង្គមតេឡេក្រាម (Telegram) ក្រោយការសាកសួរថា ការសួរចម្លើយបន្ថែមរបស់ចៅក្រមកាន់សំណុំរឿងនេះ គឺលោក សេង លាង ជុំវិញភស្តុតាង និងឯកសារមួយចំនួនក្នុងសំណុំរឿងបាញ់សម្លាប់លោក កែម ឡី។ នេះជាការសាកសួរលើកទី២ហើយនៃដំណើរការក្តីដែលឈានដល់ចៅក្រមស៊ើបសួរជនត្រូវចោទនេះ នៅតែប្រើសិទ្ធិមិនពឹងពាក់មេធាវីដដែល។
ជនត្រូវចោទ ជួប សម្លាប់ ដែលគេស្គាល់ឈ្មោះពិតថា អឿត អាង បានសារភាពថា ខ្លួនបាញ់សម្លាប់លោក កែម ឡី ដែលជាអ្នកវិភាគនយោបាយដ៏ល្បី ព្រោះរឿងជំពាក់លុយ ៣.០០០ដុល្លារ កាលពីខែកក្កដា នៅក្នុងហាងកាហ្វេ ជាប់ស្ថានីយប្រេងឥន្ធនៈកាល់តិច (Caltex) ស្ដុបបូកគោ រាជធានីភ្នំពេញ។
ទោះសំណុំរឿងបានដល់ដៃចៅក្រមស៊ើបសួរក្តី ប៉ុន្តែមន្ត្រីជាន់ខ្ពស់នៃអង្គការសិទ្ធិលីកាដូ (LICADHO) លោក អំ សំអាត ដែលតាមដំណើររឿងនេះ នៅតែបង្ហាញការមិនពេញចិត្តចំពោះការអនុវត្តការងាររបស់ស្ថាប័នប៉ូលិស និងតុលាការក្រុងភ្នំពេញ។ លោកថា ការបង្ហាញខ្សែវីដេអូ បាញ់សម្លាប់ លោក កែម ឡី នៅក្នុងស្តារម៉ាត កាល់តិច ការមិនបង្ហាញតម្រុយថ្មីក្រៅតែពីការចាប់ខ្លួនលោក ជួប សម្លាប់ ទាំងនេះហើយ ជាហេតុធ្វើឲ្យក្រុមគ្រួសារលោក កែម ឡី និងសាធារណជន បង្ហាញភាពអស់សង្ឃឹមក្នុងការរកយុត្តិធម៌ជូនសពលោក កែម ឡី៖ «ទោះស្ថិតក្នុងដំណាក់កាលស៊ើបអង្កេតក៏ដោយ ប៉ុន្តែគួរបង្ហាញលទ្ធផលខ្លះដើម្បីឲ្យប្រជាពលរដ្ឋ និងក្រុមគ្រួសារលោកបណ្ឌិត កែម ឡី មានជំនឿជឿជាក់ កុំបង្ហាញភាពអស់សង្ឃឹម និងអស់ជំនឿសម្រាប់ការស្វែងរកយុត្តិធម៌ចំពោះលោកបណ្ឌិត កែម ឡី»។
មន្ត្រីសង្គមស៊ីវិលរូបនេះព្រួយបារម្ភថា ករណីបាញ់សម្លាប់ លោក កែម ឡី មិនអាចផ្ដល់យុត្តិធម៌ឈានទៅចាប់ឃាតកពិត ឬអ្នកពាក់ព័ន្ធមកផ្ដន្ទាទោសបាននោះទេ ដែលដូចគ្នាទៅនឹងករណីបាញ់សម្លាប់លោក ជា វិជ្ជា លោក ឈុត វុទ្ធី ព្រះតេជព្រះគុណ សំ ប៊ុនធឿន និងសកម្មជនសិទ្ធិមនុស្សផ្សេងទៀត។
ខណៈសាធារណៈមតិមួយចំនួនមិនសូវមានជំនឿលើប្រព័ន្ធយុត្តិធម៌នៅកម្ពុជា បែបនេះ មេធាវីជនជាតិអង់គ្លេស លោក រីឆាត រ៉ូជើរ (Richard Rogers) នៃក្រុមហ៊ុនមេធាវី គ្លបល ឌីលីជិនស៍ (Global Diligence) ដែលតំណាងពលរដ្ឋរងគ្រោះក្រោមរបបលោកនាយករដ្ឋមន្ត្រី ហ៊ុន សែន នឹងដាក់ករណីឃាតកម្មលើលោកបណ្ឌិត កែម ឡី និងឯកសារថ្មីៗបន្ថែមទៀតស្ដីពីការរំលោភសិទ្ធិមនុស្សធ្ងន់ធ្ងរទៅក្នុងពាក្យបណ្ដឹងរបស់លោកនៅតុលាការព្រហ្មទណ្ឌអន្តរជាតិ (ICC)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។