ផ្សារប្រហុកនៅស្រុកឯកភ្នំ ខេត្តបាត់ដំបង កំពុងទាក់ទាញភ្ញៀវទេសចរអន្តរជាតិជាច្រើននាក់ទៅលេងកម្សាន្តជារៀងរាល់ថ្ងៃ។ ប្រជាពលរដ្ឋចង់ឲ្យអាជ្ញាធរ អភិវឌ្ឍផ្សារមួយនេះឲ្យបានស្អាតជាងពេលបច្ចុប្បន្ន និងឲ្យមានសោភ័ណភាព អនាម័យល្អ ដើម្បីទាក់ទាញភ្ញៀវទេសចរមកលេងកាន់ច្រើន។
ផ្សារប្រហុកដ៏ធំជាងគេក្នុងខេត្តបាត់ដំបង បង្ហាញអំពីជីវិតរស់នៅប្រចាំថ្ងៃរបស់ប្រជាពលរដ្ឋនៅទីជនបទ ក្នុងការលក់ដូរជាលក្ខណៈគ្រួសារ ដែលជាទីចាប់អារម្មណ៍របស់អ្នកទេសចរអន្តរជាតិ។
អ្នករត់ម៉ូតូកង់បីនាំភ្ញៀវទេសចរទៅលេងផ្សារប្រហុក នៅស្រុកឯកភ្នំ លោក សាន អូឡា ផ្ដល់សម្ភាសឲ្យអាស៊ីសេរី ខណៈនាំភ្ញៀវទស្សនាផ្សារប្រហុក នៅព្រឹកថ្ងៃទី១៤ កុម្ភៈ ថា អ្នកទេសចរចាប់អារម្មណ៍ទៅលើជីវិតការរស់នៅរបស់ពលរដ្ឋនៅក្នុងផ្សារនេះ។
បុរសវ័យ ៣០ឆ្នាំប្លាយរូបនេះបន្ថែមថា បើទោះជាផ្សារមួយនេះមានក្លិនស្អុយប្រហុកក្ដី ក៏ប៉ុន្តែអ្នកទេសចរនៅតែចាប់អារម្មណ៍ខ្លាំង ដោយសារជាទីកន្លែងប្លែកភ្នែករបស់ពួកគេ៖ « គាត់ ចាប់អារម្មណ៍ ដោយសារគាត់ឃើញរបៀបពលរដ្ឋរស់នៅ ហើយ នៅពេល យើងបានពន្យល់គាត់ ទៅធ្វើ ឲ្យ អ្នកទេសចរកាន់តែ ចាប់អារម្មណ៍ ខ្លាំង។ ពួកគាត់ ធ្លាប់ ឃើញតែ គេលក់ប្រហុកនៅទីផ្សារ នៅពេលមកឃើញផ្ទាល់អ៊ីចឹង ធ្វើឲ្យភ្ញាក់ផ្អើល ដោយមិន នឹកស្មានថា គេធ្វើប្រហុក អ៊ីចឹង សោះ »។
នៅជុំវិញផ្សារមួយនេះមានក្លិនប្រហុកស្អុយខ្លាំង ដោយសារជាផ្សារលក់ត្រីប្រហុកគ្រប់ប្រភេទ រួមមានប្រហុកសាច់ និងប្រហុកឆ្អឹង ដែលធ្វើត្រីរស់ និងត្រីកំភ្លាញ ជាដើម។
អ្នករត់ម៉ូតូឌុបនៅផ្សារប្រហុក លោក ខ្លាក់ លី ផ្ដល់សម្ភាសឲ្យអាស៊ីសេរី ខណៈឈរចាំដឹកម៉ូយនៅមាត់ស្ទឹងសង្កែ គល់ស្ពានផ្សារប្រហុកថា បើទោះជាផ្សារមួយនេះជាទីកន្លែងទាក់ទាញភ្ញៀវទេសចរមកលេងកម្សាន្តច្រើនក៏ដោយ ក៏ប៉ុន្តែខ្វះអ្នករៀបចំទុកដាក់សំរាម និងសម្អាតអនាម័យមិនបានត្រឹមត្រូវ។ លោកស្នើឲ្យអាជ្ញាធររៀបចំផ្សារនេះឲ្យបានស្អាត ដើម្បីទាក់ទាញអ្នកទេសចរមកលេងឲ្យបានកាន់តែច្រើន៖ « បញ្ហាបំផុតរឿងសំរាម តែម្ដង នៅពេល មានសំរាមច្រើន ធ្វើឲ្យបរិស្ថានមិនស្អាត។ ខ្ញុំមានអារម្មណ៍ខ្មាសគេណាស់ នៅពេលឃើញអ្នកទេសចរមើលមកថាយើងស្មោកគ្រោក រស់នៅមិនចេះសម្អាត »។
ទាក់ទងនឹងបញ្ហានេះ អភិបាលស្រុកឯកភ្នំ លោក ឡុង សុភឺន មានប្រសាសន៍ថា អាជ្ញាធរស្រុកបានរៀបចំគម្រោងរួចជាស្រេចហើយ ក្នុងការកែលំអផ្សារប្រហុកឲ្យបានស្អាតជាងពេលបច្ចុប្បន្ន ដើម្បីស្វាគមន៍ភ្ញៀវទេសចរមកលេងកម្សាន្ត។ លោកបន្ថែមថា គម្រោងនេះត្រៀមដំណើរការក្នុងពេលឆាប់ៗ៖ « ព្រោះឃើញបញ្ហា នេះហើយ បានជា ខាងរដ្ឋបាលស្រុក និង អភិបាលខេត្ត បាត់ដំបង ស្នើ ទៅលោក ស ខេង សុំ ស្ពានបេតុង ទៅក្រសួងសាធារណៈ និង ដឹកជញ្ជូន ហើយខាងក្រសួងសម្រេច ផ្ដល់ស្ពានបេតុង ទទឹង ១០ម៉ែត្រ និងបណ្ដោយ ៧៥ម៉ែត្រ។ យើង កំពុងតែ សិក្សាពីគម្រោងកសាងស្ពាន ពីឥឡូវ នេះហើយ ។ បន្ទាប់ពី យើងធ្វើស្ពានរួច យើងនឹង រៀបចំរក អ្នកវិនិយោគ ដើម្បីធ្វើផ្សារប្រហុក នេះឲ្យ ទៅជា ផ្សារមួយមានស្តង់ដារ »។
លោកបន្ថែមថា ផ្សារមួយនេះមានតូបលក់ប្រហុករបស់អាជីវករចំនួន ៥៤តូប ហើយក្នុងមួយតូបៗលក់ប្រហុកប្រមាណពី ៥០ ទៅ ១០០តោនក្នុងមួយឆ្នាំ។ ចំណែកត្រីធ្វើប្រហុកវិញ មួយចំនួនធំដឹកមកពីបឹងទន្លេសាបក្នុងឃុំព្រៃចាស់ និងឃុំកោះជីវាំង ស្រុកឯកភ្នំ និងមួយចំនួនទៀតយកមកពីខេត្តពោធិ៍សាត់ និងខេត្តកំពង់ឆ្នាំង។ លោកបន្តថា សព្វថ្ងៃភ្ញៀវទេសចរអន្តរជាតិមកលេងកម្សាន្តផ្សារមួយនេះចន្លោះពី ១០ ទៅជាង ១០០នាក់ក្នុងមួយថ្ងៃ ដោយពុំមានបង់លុយចូលទស្សនានោះទេ។
ចំណែកពលរដ្ឋនៅជុំវិញផ្សារវិញ ទទួលផលប្រយោជន៍តិចតួចណាស់ពីភ្ញៀវទេសចរ គឺបានពីការលក់នំចំណី និងរត់ម៉ូតូឌុបដឹកភ្ញៀវម្ដងម្កាល។
ផ្សារមួយនេះមានទីតាំងជាប់ដងស្ទឹងសង្កែត្រើយខាងលិច នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ និងមានចម្ងាយប្រមាណ ៨គីឡូម៉ែត្រពីទីរួមខេត្តបាត់ដំបង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។