អាជ្ញាធរខណ្ឌច្បារអំពៅ រាជធានីភ្នំពេញ បានចុះឃាត់ខ្លួនកម្មករវៀតណាម ៣នាក់ ដែលកំពុងធ្វើអាជីវកម្មបូមខ្សាច់នៅលើកប៉ាល់បូមខ្សាច់មួយក្នុងសង្កាត់វាលស្បូវ ខណ្ឌច្បារអំពៅ ក្នុងពេលអ្នកភូមិបាននាំគ្នាធ្វើបាតុកម្មប្រឆាំងនឹងការបូមខ្សាច់នេះ។ ក៏ប៉ុន្តែអាជ្ញាធរខណ្ឌបានដោះលែងកម្មករវៀតណាមទាំងនោះទៅវិញ នៅរសៀលថ្ងៃដដែល ដោយមិនបានប្រកាសប្រាប់មូលហេតុដល់អ្នកភូមិ។
ពលរដ្ឋប្រមាណ ១០០នាក់មកពីភូមិចំនួន ៤ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ធ្វើបាតុកម្មដុតកង់ឡាន នៅថ្ងៃទី៧ កញ្ញា ប្រឆាំងកប៉ាល់បូមខ្សាច់មួយក្នុងទន្លេមេគង្គ ក្បែរភូមិពួកគាត់ ព្រោះខ្លាចបាក់ដីផ្ទះ និងបាក់ដីភូមិចូលទឹកទន្លេ ដោយសារការបូមខ្សាច់ដែលគាត់សង្ស័យថា ជាការអាជីវកម្មលួចលាក់ខុសច្បាប់។
តំណាងអ្នកតវ៉ាភូមិស្វាយតាអុក គឺលោក អ៊ិន សំណាង អះអាងថា កប៉ាល់បូមខ្សាច់នោះធ្វើឲ្យប៉ះពាល់ទាំងសុវត្ថិភាពមនុស្សនិងភូមិឋាន៖ «ទី១ ផលប៉ះពាល់គឺសំឡេងរំខានដល់ប្រជាពលរដ្ឋ ពេលខ្លះការបូមខ្សាច់ដល់ម៉ោងយប់ជ្រៅក៏មាន ហើយមានសាឡង់ជាច្រើនទម្ងន់រាប់រយតោន យើងខ្ញុំមិនដឹងថា មានអាជ្ញាប័ណ្ណ ឬមិនមាន»។
លោកបន្តថា អ្នកភូមិបានធ្វើបាតុកម្មប្រឆាំងកប៉ាល់បូមខ្សាច់នេះ ម្ដងរួចមកហើយកាលពីថ្ងៃទី៣០ សីហា កន្លងមក ហើយបានទាមទារឲ្យអាជ្ញាធរជួយដោះស្រាយ តែអាជ្ញាធរមូលដ្ឋានឆ្លើយថាមិនដឹង។
ចំណែកអ្នកភូមិម្នាក់ឈ្មោះ សាន សុខសឿន មកពីភូមិព្រែកជើងព្រំ បញ្ជាក់ថា កប៉ាល់បូមខ្សាច់ដែលមានឧបករណ៍ទំនើបនោះ បានចូលមកបូមខ្សាច់ក្បែរច្រាំងទន្លេក្បែរភូមិគាត់ តាំងពីថ្ងៃទី៣០ សីហា មកម្ល៉េះ តែអាជ្ញាធរធ្វើមិនដឹងមិនឮ។
រីឯចៅសង្កាត់វាលស្បូវ អ្នកស្រី យឹម ស៊ីមន ដែលបានចុះទៅទីកន្លែងអ្នកភូមិធ្វើបាតុកម្មនោះដែរ បានបដិសេធថា អ្នកស្រីមិនបានដឹងឈ្មោះក្រុមហ៊ុនដែលបានចូលមកបូមខ្សាច់ក្នុងមូលដ្ឋានអ្នកស្រីអស់រយៈពេលជិតកន្លះខែមកហើយដែរ តែអ្នកស្រីគ្រាន់តែដឹងថា កប៉ាល់បូមខ្សាច់នេះច្រើនចេញចូលបូមខ្សាច់នៅទន្លេក្នុងភូមិសាស្ត្រសង្កាត់អ្នកស្រីញឹកញាប់ណាស់កន្លងមក តែនៅលើកនេះអ្នកភូមិចាប់ផ្ទុះកំហឹងតវ៉ាម្ដងទៀត ទើបមានមុខអាជ្ញាធរខណ្ឌចុះមកអន្តរាគមន៍។
អ្នកស្រី យឹម ស៊ីមន៖ «ដល់លើកនេះវិធានការរបស់ខណ្ឌសង្កាត់រាយការណ៍ទៅ តាមប្រជាជនដុតកង់ឡាន សំណូមពរឲ្យអាជ្ញាធរជួយទប់ស្កាត់កុំឲ្យពួកបូមខ្សាច់ មកបូមលើទឹកដីវាលស្បូវ ព្រោះទឹកដីវាលស្បូវអត់មានទីតាំងបូមខ្សាច់ទេ តាំងពីណាពីណី នៅកៀនស្វាយមក អត់មានទីតាំងបូមខ្សាច់ទេ»។
អ្នកស្រីបន្តថា ភ្លាមៗនោះ អាជ្ញាធរខណ្ឌច្បារអំពៅ បានចុះមកចាប់ខ្លួនកម្មករវៀតណាម ៣នាក់នៅលើកប៉ាល់ យកទៅសាកសួរនៅខណ្ឌ ឃើញដូច្នោះអ្នកភូមិក៏នាំឈប់ធ្វើបាតុកម្មហើយត្រឡប់ទៅផ្ទះវិញទាំងអារម្មណ៍រីករាយ។ ក៏ប៉ុន្តែក្រោយមកនៅរសៀលថ្ងៃដដែល អ្នកស្រី យឹម ស៊ីមន បានឃើញកម្មករវៀតណាម ទាំង ៣នាក់ នោះត្រូវបានដោះលែងឲ្យមកកប៉ាល់វិញ ដោយអ្នកស្រីមិនដឹងមូលហេតុ។
វិទ្យុអាស៊ីសេរី មិនអាចទាក់ទងអាជ្ញាធរខណ្ឌច្បារអំពៅ បានទេនៅល្ងាចថ្ងៃទី៧ កញ្ញា ដើម្បីសុំការបញ្ជាក់ព័ត៌មានបន្ថែម ដោយលោកអភិបាលខណ្ឌ ណុប ផា ថាជាប់រវល់ និងអភិបាលរង លោក អ៊ាង ស៊ីផាន មិនលើកទូរស័ព្ទ។
មន្ត្រីជំនាញបរិស្ថានអះអាងថា រឿងរ៉ាងធ្វើអាជីវកម្មបូមខ្សាច់តាមទន្លេខុសបទដ្ឋានបណ្ដាលឲ្យច្រាំងទន្លេ ដីចម្ការ និងដីផ្ទះអ្នកភូមិបាក់ធ្លាក់ទន្លេ ជាញឹកញាប់កន្លងមក។
ជាក់ស្ដែងកាលពីដើមខែកុម្ភៈ ឆ្នាំ២០១៤ ផ្ទះ ៣ខ្នង នៅភូមិដើមគ សង្កាត់ជ្រោយចង្វារ ខណ្ឌឫស្សីកែវ បានបាក់ធ្លាក់ចូលទឹកទន្លេ ហើយដីជួរមាត់ទន្លេក្បែរនោះដែលមានផ្ទះជាង ២០ខ្នងផ្សេងទៀត មានស្នាមប្រេះនិងរង្គើ ដោយសារអាជីវកម្មបូមខ្សាច់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។