កម្មកររោងចក្រកាត់ដេរអូសេអង់ ហ្គាមិន (Ocean Garment) ប្រមាណ ១ពាន់នាក់ នៅតែប្រកាន់ជំហរតវ៉ាទាមទារអោយថៅកែក្រុមហ៊ុន យល់ព្រមផ្ដល់ប្រាក់ឈ្នួលប្រចាំខែអោយបាន ១០០ភាគរយ នៅពេលរោងចក្រព្យួរការងារ។
ការបន្តធ្វើកូដកម្មបាតុកម្មរបស់កម្មករនៅរោងចក្រនេះ គឺស្របពេលដែលការចរចារវាងតំណាងកម្មករ និងភាគីថៅកែរោងចក្រ បានបរាជ័យជាថ្មីនៅថ្ងៃទី៣ មិថុនា។
ការចរចាជាថ្មីទៀតរវាងតំណាងកម្មករ និងតំណាងភាគីរោងចក្រអូសេអង់ នឹងបន្តទៅព្រឹកថ្ងៃទី៤ ខែមិថុនា នៅពេលដែលក្រុមកម្មករអះអាងថា នឹងបន្តការទាមទាររហូតបានលទ្ធផលដែលពួកគេអាចទទួលយកបាន។
ប្រធានសហជីពប្រចាំរោងចក្រ លោក ឆេង ឈាន់ មានប្រសាសន៍ថា ភាគីក្រុមហ៊ុននៅតែប្រកាន់ជំហរផ្ដល់ប្រាក់ចំនួន ១៥ដុល្លារក្នុងមួយខែអោយទៅកម្មករក្នុងរយៈពេលរោងចក្រព្យួរការងារ ដែលក្រុមកម្មករមិនអាចទទួលយកបាន។ លោក ឈាន់ សង្ឃឹមថា ភាគីរោងចក្រនឹងបន្ធូរបន្ថយយោគយល់ដល់ផលវិបាកដែលកម្មករជួបប្រទះ ក្នុងអំឡុងពេលព្យួរការងារនេះ។
លោក ឆេង ឈាន់៖ «ខាងបងប្អូនកម្មករគាត់មិនមែនថាទាមទារយក ១០០ភាគរយដាច់អហង្ការទេ ដោយសារគាត់យល់ថា រោងចក្រអត់ការងារធ្វើចឹង គាត់នឹងបន្ធូរបន្ថយរង់ចាំខាងថៅកែរោងចក្រថា តើគាត់ឡើងអោយអស់ពីសមត្ថភាព អស់ពីបេះដូងរបស់គាត់ សម្ដែងការស្មោះត្រង់ជាបងប្អូនកម្មករដល់កម្រិតណា គឺគាត់នៅមើលគោលជំហររបស់រោងចក្រ។ បើសិនការជួបនៅម៉ោង៩ ស្អែកហ្នឹងអត់មានដំណោះស្រាយទេ ពួកគាត់នៅតែប្រកាន់ជំហរទាមទារ បានន័យថា នឹងធ្វើកូដកម្មរហូត»។
ប្រធានផ្នែករដ្ឋបាលនៃរោងចក្រអូសេអង់ លោក ជឹម សុផាត មិនបានឆ្លើយតបចំពោះសំណូមពរអោយមានការបន្ធូរបន្ថយយោគយល់គ្នាទៅវិញទៅមកជាមួយកម្មករនោះ លោកឲ្យដឹងថា ការសម្រេចបែបណាមួយរបស់ភាគីរោងចក្រ នឹងប្រកាសអោយដឹងនៅក្នុងការចរចានៅថ្ងៃទី៤ ខែមិថុនា។
កម្មករប្រមាណ ១ពាន់នាក់នៅម៉ោងប្រមាណ ៨ព្រឹកថ្ងៃទី៣ ខែមិថុនា បាននាំគ្នាហែក្បួនចេញពីរោងចក្រនៅម្ដុំភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ក្នុងបំណងទៅតវ៉ានៅខាងមុខក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំអន្តរាគមន៍ដោះស្រាយលក្ខខណ្ឌការងារ ដែលកម្មករបានទាមទារ។ ប៉ុន្តែក្បួនដង្ហែនោះ ត្រូវបានអាជ្ញាធររារាំង និងណែនាំអោយរង់ចាំលទ្ធផលការចរចា ដើម្បីរកដំណោះស្រាយវិញ។
កម្មការិនីម្នាក់ កញ្ញា សុខ សាវី មានប្រសាសន៍ថា កម្មករទាំងអស់ក៏មិនខុសពីរូបនាងដែរ គឺភ័យខ្លាចថា ការព្យួរការងារនៅពេលនេះ អាចជាលេសរបស់រោងចក្រ ដើម្បីគេចចេញពីការទទួលខុសត្រូវផ្ដល់សំណងដល់កម្មករ នៅពេលរោងចក្រឈានទៅបិទទ្វារ៖ «ខ្លាចពួកគេរត់ទៅបាត់ ពួកយើងអត់មានលុយផ្គត់ផ្គង់ជីវភាពគ្រួសារ ពិបាកអត់លុយចាយទៅមុខទៀត»។
កម្មកររោងចក្រអូសេអង់ បានចាប់ផ្ដើមធ្វើកូដកម្មនៅខាងមុខរោងចក្រ ចាប់ពីថ្ងៃទី២៤ ខែឧសភា បន្ទាប់ពីភាគីរោងចក្រប្រកាសព្យួរការងាររយៈពេល ១ខែ ពីថ្ងៃទី២៦ ខែឧសភា ដល់ទី២៦ ខែមិថុនា ដោយសំអាងហេតុផលថា រោងចក្រពុំមានអ្នកបញ្ជាទិញ។ លើសពីនេះ ពួកគេបានចែកវេនគ្នាទៅដេកនៅខាងមុខរោងចក្រ ដើម្បីការពារសម្ភារៈក្នុងរោងចក្រ ខ្លាចក្រែងភាគីរោងចក្រដឹកចេញ ឬលួចលាក់បិទទ្វាររោងចក្រស្ងាត់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។